Ii otjiperi, mena rokutja Mukuru u vanga kutja ovandu ve rikotamene pamwe. Ombeibela i tja: “Ngatu rikenderasane mokupanḓiparisasana morusuvero na moviungura oviwa. Atu isa okuyenda kozombongarero zombongo.”—Ovaheberi 10:24, 25.

 Jesus wa raisa kutja ovemukongorere ve mave kara norupa motjimbumba tjongamburiro, indu tje ve raera kutja: “Tji mwa suverasana, indino avehe otji mave tjiwa kutja oweṋe ovahongewa vandje.” (Johanes 13:35) Otja omuano wokuraisa orusuvero ndwi, ovahongewa va Kristus ve worongana pamwe. Owo ve haṋewa mozombongo nḓe worongana aruhe okurikotamena pamwe. (1 Ovakorinte 16:19) Owo avehe pamwe va rira eṱunḓu rovakambure mouye auhe.—1 Petrus 2:17.

Pe heperwa ko ovingi kombanda yokurira okaṋepo kongamburiro

 Nandarire kutja Ombeibela i raisa kutja ovandu mave sokuworongana pamwe okurikotamena ku Mukuru, oyo kai hongo kutja omundu ma hepa okurira okaṋepo kongamburiro kutja ma tjate ku Mukuru. Kutja ma yakurwe i Mukuru omundu ma sokuhupa otja kongamburiro ye. Otjotjihorera, Ombeibela i tja: “Ihi tji tji ri otjoukarere wa Ndjambi, otjikohoke notjipwe komurungu wa Ndjambi Tate, otjo hi: Okuvarura ozosewa novahepundu mouzeu wawo, nokuritjevera kouye mbwa zunḓaka.”—Jakobus 1:27.