•   Hapo tji ku ṱuna vi indu tji mo zuu varwe amave tukana?

  •  Ami hi yandja kombango mena rokutja oviṋa mbi mba iririra.

  •  Mbi muna ko ouzeu kaṱiṱi, posi ya hi ve raere kutja ve ise okutukana.

  •  Ami hi yenene okuviiririra mena rokutja oviṋa ovivi.

•   Ovikando vingapi ove mbi u tukana?

  •  Ami hi tukana

  •  Opovikando tjiva

  •  Mbi tukana aruhe

•   Otja koumune woye, hapo u muna kutja okuungurisa eraka ehazendu otjiṋa otjivi?

  •  Kako

  •  Ii

 Hapo ove u muna kutja okuungurisa omambo omavi otjiṋa otjivi tjiri? Ove mape ya o tja, ‘Katjiṋa otjivi. Pe noviṋa ovingi ovivi kombanda yanao mouye mbwi okuripurira ko. Nu wina, ovandu avehe ve tukana.’ Hapo imbwo ouatjiri?

 Kutja mo kambura poo ko nokukambura, ndino pe novandu ovengi mbe ha ungurisa eraka ehazendu. Owo ve nomapu omawa nge tjita kutja ave ha tjiti nao, ngunda varwe ave he ripurire ko. Otjotjihorera:

•  Okutukana, kaku hungira omambo uriri. Omambo ngu mo ungurisa ye raisa ku varwe kutja ove omundu ngu ri vi. Okuungurisa eraka ehazendu ku raisa kutja ko ripurire komambo woye kutja maye ṱunu vi ku varwe. Hapo oove omundu ngu ri nao?

   Ombeibela i tja: ‘Ihi tji tji pitira motjinyo tjomundu tji za momutima we.’—Mateus 15:18.

•  Okutukana ku tjita kutja varwe ve kare noumune ouvi ohunga na ove. Embo rimwe ndi tjaera ovandu kutja ave ha ungurisa omambo omavi ri tja: “Omuano mbu tu hungira mau raisa kutja eṱunḓu retu novandu mbu tu ungura pamwe mave yenene okuturaisira ondengero poo indee. Wina omuano mbu tu hungira mau tjiti kutja tu mune oviungura poo indee, nokutja ovandu mbe hi nokututjiwa mave tu tjindi vi.” Oro wina ri tja: “Ripura omuini kutja andakuzu ko tukana, oupanga woye ku na varwe atja u rira ouwa.”

   Ombeibela i tja: ‘Iseye okuyambururasana.’—Ovaefese 4:31.

•  Okutukana kaku tjiti kutja u rire omundu omutjiukwa. Omutjange wembo ohunga nokukara novikaro oviwa wa tja: “Ovandu mbe tukana tjinene, ve tu ungura kouruvi.” Eye wina wa tja omundu ngu ungurisa eraka ehazendu oruveze aruhe “ka hungire oviṋa oviyorise, vyounongo, poo vyorusuvero. Indu tji u ungurisa omambo omavi oruveze aruhe, kaku tjiti kutja u rire omundu omusemba.”

   Ombeibela i tja: “Ngaamu hungire omambo omatwe novinyo vyeṋu.”—Ovaefese 4:29.

•  Okutwa po ondando. Rora okuisa okuungurisa eraka ehazendu oure womueze. Ungurisa okalenda poo ombapira okutjanga kutja wa yenenisa ondando yoye eyuva ndo poo indee. Posi ya, okuisa okuungurisa eraka ehazendu oparukaze, ove mape ya mo hepa okuungura ovingi. Otjotjihorera:

•  Nakaura omanyando nge ungurisa eraka ehazendu. Ombeibela i tja: “Otjikaro tjovandu ovavi tji zunḓa omihingo omiwa.” (1 Ovakorinte 15:33) Ihi katji kamburire mo ovandu uriri, nungwari wina tji kamburira mo ozomuvi nḓu u tarera, ozongeima nḓu u nyanda, nomisiki mbi u puratena. Kenneth wozombura 17 wa tja: “Oupupu okupuratena komusiki mbu wa suvera nokuhinokuyandja ombango komambo omavi nge ri meimburiro ndo.”

•  Ritjinda otjomundu ngwe kura mounongo. Ovandu tjiva ve muna kutja tji va ungurisa eraka ehazendu owo mave munika kutja ovandu mbe kura. Posi ya, imbwo kauatjiri. Ombeibela i tja ovandu mbe kura “ovandu mbe nozondunge nu mba iririra okupangura pokati kouwa nouvi.” (Ovaheberi 5:14) Owo kave ungurisa omambo omavi okutjita kutja varwe ve ve pe ondengero.

 Otjiperi kutja omambo omavi ye zunḓa omeripura womundu. Ovandu ovengi ve ripura noviṋa ovivi. Embo ndi Cuss Control ri tja: “Ko nokuhepa okuweza ko. Ove mo hepa okukondja otja pu mo yenene okuungurisa omambo omawa ku na varwe. Ove mo kara noumune ouwa ohunga na ove omuini, nu varwe mave vanga okukara pu na ove.”