Okurira omundu omuwa maku ku kwizikire okukara noruyaveze oruwa rwondjeverero?
Ozombura nḓa kapita, ovandu ovengi aave munu kutja okurira omundu omuwa oomuano wokurikwizikira oruyaveze oruwa rwondjeverero. Otjotjihorera, ovandu ovengi moAsia aave kupasana nomambo nga hungirwa i yomuhonge omutjiukwa wena Confucius (551-479 K.O.Z.) ngwa tja: “Oviṋa mbi u ha vanga kutja vi tjitwe kove, o tjiti komundu warwe.” a
OVENGI VE TJITA OVIṊA OVIWA KUTJA VE KARE NORUYAVEZE RWONDJOROKA
Ovengi ve muna kutja indu tji ve ritjindi nawa owo mave munu oruyaveze oruwa rwondjeverero. Owo ve kondja okukara nondengero, okukara novikaro oviwa, okukondja okuyenenisa omerizirira wawo, nokukara nomeritjiviro omawa womomutima. Omukazendu wena Linh ngwa tura moVietman wa tja: “Ami aruhe ee munu kutja indu tji mba kara nouatjiri, me kara nehupo ewa.”
Tjiva ve kondja okutjita oviṋa oviwa mena rozongamburiro zawo. Omurumendu wena Hsu-Yun ngwa tura moTaiwan wa tja: “Ami mba raerwa kutja indu omundu tja tjiti oviṋa oviwa eye ma kara nondjoroka indu tja ṱu, posi yokutja indu tja tjiti oviṋa ovivi eye ma hihamwa.”
OVIKWAYE MBI KONGORERA KO?
Ouatjiri kutja, indu tji twa tjiti oviṋa oviwa ku varwe tu muna mo ouwa. Posi yokutja imba mbe kondja okutjita ouwa ku varwe, ve kamuna kutja kaaruhe tji ve katjindwa nawa momuano mbu va ri amave undjire ko. Omukazendu wena Shiu Ping ngwa tura moHong Kong wa tja: “Ami mbe rihongera okuza kwami omuini kutja imba mbe tjita ouwa kaaruhe tji ve kamuna ouwa. Ami mba kondja okutjevera eṱunḓu randje nokutjita oviṋa oviwa, posi yokutja orukupo rwandje rwa teka nu omurumendu wandje we ndjesa nomuatje wandje.”
Ovengi va muna kutja kavandu avehe mbe ri mozongamburiro mbe rira ovandu ovawa. Omukazendu wena Etsuko ngwa tura moJapan wa tja: “Ami mbe rikuta kongamburiro nu mba uta okuzikamisa ovitjitwa vyomitanda. Ami mba urumine tjinene okumuna kutja ovandu tjiva mongamburiro aave ritjindi momuano omuvi, aave vanga okukara mounane, nokuungurisa ovimariva momuano omuvi.”
“Ami mba kondja okutjevera eṱunḓu randje nokutjita oviṋa oviwa, posi yokutja orukupo rwandje rwa teka nu omurumendu wandje we ndjesa nomuatje wandje.”—SHIU PING, HONG KONG
Tjiva mbe ri mozongamburiro nu mbe kondja okutjita oviṋa oviwa va kahihamwa, indu oviṋa ovivi tji vya tjitwa ku wo. Omukazendu wena Van ngwa za koVietnam wa ri noumune mbwo. Eye wa tja: “Eyuva arihe ee randa ovihape, ovimbloma nokuyandja ovikurya kovaṱi vandje mokumuna kutja me kayorokera oruyaveze oruwa. Kehi yoviṋa avihe oviwa mbi mba tjita nokurikotamena kovaṱi oure wozombura ozengi, omurumendu wandje wa vera omutjise omuzeu tjinene. Okuzambo omuatje wandje omukazona wa ṱa ngunda eye ee rihonga kehi rarwe.”
Indu okurira omundu omuwa tji ku hi ya yenena okukukwizikira oruyaveze oruwa rwondjeverero, ovikwaye mbi mavi ku kwizikire kutja u kare noruyaveze oruwa rwondjeverero? Okumuna omaziriro komapuriro ngo, matu hepa ondjivisiro ndji nouatjiri okuzira omapuriro ohunga noruyaveze oruwa rwondjeverero. Omuhunga otja imbwo matu u vaza pi?
a Okurihonga ovingi ohunga noviṋa Confucius mbya hungira, tara kekondwa 7, oparagrafa 31-35 membo ndi Mankind’s Search for God, nda pitisiwa i yOvahongonone va Jehova nu ndi ri korungovi ndwi www.pr2711.com.
