Otja tji pa tamunwa motupa tu twa kapita, ovandu ve kondja okupaha oruyaveze oruwa mokukara nongamburiro moviṋa tjimuna omauṋingandu, omahongero, outumbe, nokurira omundu omuwa. Indu tji mo kondjo okupaha oruyaveze oruwa mokuungurisa oviṋa otja imbyo, i ri tjimuna tji mo i koruveze ndu hi nokutjiwa nu amo ungurisa otjikarata tjehi tji tji he ri tjo. Hapo iho matji hee kutja katu nomuhunga omusemba woruyaveze? Kako.

Indu tji matu twa po ozondando, povikando ovingi tu kapura komundu omunene nu ngu nounongo pweṱe. Momuano tjingewo, eṱe matu yenene okupaha omuhunga omusemba ohunga noruyaveze okuza komundu ngu ri omunene nu onongo pweṱe. Eṱe matu yenene okulesa ondunge ye membo ndi isanewa kutja Ombeibela nda tjangwa ozombura ape 3 500 nḓa kapita.

Ongwaye tji mo yenene okukambura mOmbeibela? Mena rokutja, oyo ya za komundu omunenenene nu onongo mevaverwa. Eye u tamunwa otja “umwe ngwa kurupa tjinene” ngu ri Ndjambi “aruhe nga aruhe.” (Daniel 7:⁠9; Epsalme 90:⁠2) Eye “wa mema omayuru, Eye ongu ri Ndjambi. Eye wa zezenga nu wa ungura ehi.” (Jesaja 45:​18) Eye we tu raera kutja ena re oJehova.​—⁠Epsalme 83:⁠18.

Ombeibela kai tja ombazu imwe poo omuhoko umwe omunanḓengu pomukwao. Mena rokutja, oyo ya za komundu umwe ngwa mema ovandu avehe. Ondunge yOmbeibela aruhe i ungura nu ovandu momahi ayehe va muna mo ouwa. Oyo i ri momaraka omengi nu oyo ya handjauka tjinene okukapita omambo warwe. a Ihi matji hee kutja ovandu koṋa akuhe mave yenene okulesa nokuhongorerwa po i yOmbeibela. Imbi vi hitasana na imbi Ombeibela mbi hungira kutja:

“Ndjambi u vara ovandu avehe pu pe ṱeki pamwe. Eye u yakura omundu auhe ngu nondira ku Ye, nu ngu tjita ousemba.”​—OVIUNGURA 10:34, 35.

Otja ovanene mba suvera nokuvatera ovanatje vawo, Jehova Mukuru oIhe worusuvero ngu tu vatera okupitira mEmbo re Ombeibela. (2 Timoteus 3:​16) Ove mo yenene okukambura mEmbo re, mena rokutja eye we tu mema nu u tjiwa oviṋa mbi tu pa ondjoroka.

Ovikwaye mbi mo sokutjita kutja u kare noruyaveze ndwo? Tara korupa ndu maru kongorere ko.