OURE wozombura ozengi ovapirukire vOmbeibela aave tja, Ombara Belsasar ngwa tamunwa membo ra Daniel kena wa hupire. (Dan. 5:1) Owo va ri noumune mbo mena rokutja ovakonḓonone woviṋa ovikuru kaave munu oviṋa mbi mavi raisa kutja eye tjiri wa hupire. Posi yokutja mombura ndji 1854, omamuino ngo ya runduruka. Omena ra ye?

Mombura ndjo omukuramene po wa British, wena J. G. Taylor wa muna oviṋa ovikuru motjihuro otjikuru tja Ur, nai tji tjiukwa otja Iraq komamuho. Motjindjuwo otjinene owo va muna mo ovitjuma vyomunoko pekepeke. Ovitjuma avihe vya ri noure wozosentimeta omurongo nu vya tjangerwe. Otjitjuma tjimwe kwa tjangerwe ongumbiro kutja Ombara ya Babilon, Nabonidus nomuatje we omuzandu omunene Belsasar ngave hupe orure. Oviṋa mbyo aa vi raisa kutja Belsasar wa hupire, nandarire ovapirukire aave sokuyakura otjiṋa ho.

Posi yokutja Ombeibela kai raisa uriri kutja Belsasar wa hupire nungwari wina i raisa kutja wa ri Ombara. Nu ovapirukire va ri nomakeyakeyero rukwao. Otjotjihorera, meserewondo 19 omunongonone William Talbot wa tjanga kutja, “Belsasar wa nanene puna ihe wena Nabonidus. Posi yokutja kape notjiṋa nandarire tjimwe tji tji raisa otjiṋa ho.”

Ombata ndjo ya zengururwa, indu omatjangero kombanda vyovitjuma vyomunoko tji vya raisa kutja ihe ya Belsasar Ombara Nabonidus wa ire kotjihuro ohongora oure wozombura kaaṋi. Hapo pa tjitwa tjike oruveze eye ndwa ire? Embo ndi Encyclopaedia Britannica ri tja, “Indu Nabonidus tja ya moutaure, eye wa zika Belsasar kotjihavero tje nokuhonaparerapo orupa rovita.” Kunao moruveze ndo Belsasar ongwa ri omuhonapare moBabilon. Omukonḓonone woviṋa ovikuru nu weraka wena Alan Millard wa tja, “Embo ra Daniel ri sora tji ri isana Belsasar ‘otjombara.’”

Ombeibela ondi ri Embo enanḓengu Ovakarere va Mukuru ku va tara ko okutjiwa kutja embo ra Daniel ri nouatjiri nu ra tjangwa nombatero yombepo ya Mukuru.—2 Tim. 3:16.