YOMARA novaṱena kwe Marcelo na Hiver, va tura mokaresevate mehi ndi Guatemala. Yomara wa uta okurihonga Ombeibela ku nOvahongonone va Jehova, nu kombunda ovaṱena kwe va kauta okurihonga Ombeibela. Posi ya pa ri nouzeu. Owo poutatu wawo vari ovapoṱu nu kaave yenene okulesa eraka rovapoṱu (braille). Ku nao, omundu ngwee ve hongo Ombeibela eeve lesere ozoparagrafa nomazeva wOmbeibela.

Ya ri ouzeu ku wo okuyenda kozombongarero zombongo. Owo kaave yenene okuyenda kEtuwo rOmerikotameneno ku wo oveni, kaaku kambura ozominute 40 okuvaza pEtuwo rOmerikotameneno. Posi yokutja ovakambure ovakwao mombongo, ve ve vatera kutja ve yenene okuvaza pozombongarero zombongo azehe. Nu indu tji va uta okupewa otupa pombongarero yomokati kotjivike, ovakambure ovakwao ve ve vatera kutja ve zemburuke otupa twawo.

Mu Mei 2019, ozombongarero zombongo za uta okukara mokaresevate kawo. Moruveze ndwo, ovakupasane ovakandjira va tjindira kokaresevate kawo. Owo kaave tjiwa okulesa nokutjanga eraka rovapoṱu, posi ya aave vanga okuhonga ovahongwa mbo. Ku nao owo va ya konganda yomambo nu va kamuna omambo ohunga neraka rovapoṱu, kutja ve yenene okurihonga nokuhonga varwe omuano wokuriungurisa.

Momieze omiṱiṱi, owo aveyetatu va uta okulesa eraka rovapoṱu, nu otjiṋa ho tje ve yandjera kutja ve yenene okukara noupanga ouwa ku na Jehova. a Yomara na Marcelo na Hiver nai ve karera otjovakandjira ovakarerere. Marcelo omuvatere wombongo. Owo ve kara norupa moviungura vya Jehova otjivike atjihe. Owo ve karera Jehova noupyuke, nu iho tji tjita kutja varwe ve tjite nao wina.

Owo ve nondangi tjinene korusuvero ndu va muna mombongo. Yomara wa tja: “Okuza koruveze ndu twa hakaena ku nOvahongonone va Jehova, owo va raisa orusuvero rwatjiri rOukriste.” Marcelo wa tja: “Tu nomapanga omawa mombongo, nu tu na eṱunḓu mouye auhe nda wana morusuvero.” Yomara novaṱena kwe ve undja okumuna omuano Jehova mu ma tjiti kutja ehi ndi ririre oparadisa.—Eps. 37:10, 11; Jes. 35:5.