Omapuriro okuza kovalese
Omomuano uṋe “Jerusalem” tji tja tamunwa mu Jesaja 60:1 mu tji “sekama” ‘nokuyera’?
Jesaja 60:1 ri tja: “Sekama, Jerusalem, u yere otja eyuva; orondu ondjerera yoye ye ya, nongeṋangeṋeno yaMuhona mai yere kombanda yoye!” Otjihuro ohongora tja Juda oruveze ndwo aatji kuramene po otjiwaṋa atjihe. (Jes. 60:14; 62:1, 2) Matu katara komapuriro yevari ohunga netjangwa ndwo. Etenga, oruṋe nu omomuano uṋe Jerusalem mu tja “sekama” nokuyera? Oritjavari, hapo omambo wa Jesaja ye yenenisiwa momuano omuhimise ndino?
Oruṋe nu omomuano uṋe Jerusalem mu tja “sekama” nokuyera? Jerusalem nondjuwo ondjapuke ya Muhona vya ri mongaro ombi ngunda Ovajuda ave ri mouhuura moBabilon oure wozombura 70. Posi ya kombunda yaindu Babilon tji tja huurwa i yOvamedi nOvapersi, Ovaisrael mba turire ongondoroka na Babilon va yandjerwa okuyaruka koJerusalem nokukerikotamena ku Jehova rukwao. (Esra 1:1-4) Pomautiro wombura ndji 537 K.O.Z., ovandu ovaṱakame okuza momihoko avihe 12 va tjita nao. (Jes. 60:4) Owo va uta okutjita ozombunguhiro ku Jehova, okuzemburuka omayuva omanene, nokutungurura ondjuwo ondjapuke ya Muhona. (Esra 3:1-4, 7-11; 6:16-22) Nu rukwao, ongeṋangeṋeno ya Jehova ya uta okuyera kombanda ya Jerusalem, tja tji kuramena po ovakarere ve. Ku nao, owo va rira ondjerera koviwaṋa mbi hi na aavi tjiwa Jehova.
Posi ya, omaprofetero wa Jesaja kaye yenenisirwe okuura oruveze ndwo. Otjingi tjOvaisrael kave kayendere komurungu okukara nonḓuviro ku Mukuru. (Neh. 13:27; Mal. 1:6-8; 2:13, 14; Mat. 15:7-9) Kombunda, owo nandarire va nakaura Messias, ngu ri Jesus Kristus. (Mat. 27:1, 2) Mombura ndji 70 O.Z., Jerusalem nondjuwo ondjapuke ya Muhona vya nyonwa rukwao.
Jehova wa hunganeka kutja otjiṋa ho matji tjitwa. (Dan. 9:24-27) Oukahu kutja kaya ri ondando ya Mukuru komaprofetero nge ri mu Jesaja 60 okuyenenisiwa okuura oruveze ndwo.
Hapo omambo wa Jesaja ye yenenisiwa momuano omuhimise ndino? Ii, posi ya ye yenenisiwa ku “Jerusalem, ihi tjomeyuru.” Omuapostele Paulus wa tjanga ohunga na tjo kutja: “Otji tji ri mama.” (Gal. 4:26) Jerusalem tjomeyuru orupa rwotjira tja Mukuru tjomeyuru, tji tji kamburira mo oviutwa vyombepo oviṱakame. Ovanatje ve mave kamburire mo Jesus nOvakriste ovatwirisiwa 144 000, mbe nomaundjiro wokukahupa meyuru tjimuna Paulus. Ovakriste ovatwirisiwa owo “otjiwaṋa otjiyapuke,” tji tji ri “otjiwaṋa tjatjiri tjalsrael!”—1 Petr. 2:9; Gal. 6:16.
Omomuano uṋe Jerusalem tjomeyuru mu tji “sekama” ‘nokuyera’? Otjo tja tjita nao okupitira movanatje vatjo ovatwirisiwa vokombanda yehi. Tara komuano ovitjitwa vyawo mu vi hitasana ku nomaprofetero nge ri mu Jesaja ekondwa 60.
Ovakriste ovatwirisiwa aave ‘sokusekama’ mena rokutja va ri monḓorera indu Ovakriste mba isa okurikotamena ku Jehova tjaave handjaura ozombuze zovizeze kombunda yaindu ovaapostele avehe tji va ṱa. (Mat. 13:37-43) Oruveze ndwo, owo va ri kehi youvara wa Babilon Otjinene, tji tji ri ozongamburiro azehe zoposyo mouye. Ovatwirisiwa va kara kehi youvara mbwi nga koruveze ‘rwomaandero wouye.’ Oruveze ndwi rwa uta mombura ndji 1914. (Mat. 13:39, 40) Ousupi kombunda yanao, mombura ndji 1919, owo va kuturwa ku Babilon Otjinene, nu tjimanga va uta okuyera mokuungura oukukutu okuzuvarisa ombuze ombwa yOuhona. a Oure wozombura ozengi, ovandu okuza moviwaṋa avihe ve ya kondjerera ndji. Nu nandarire otjiwaṋa tja Israel tji tja sewa ko, mbe ri ‘ozombara’ nḓa tamunwa mu Jesaja 60:3 tje ya kondjerera ndji.—Omavan. 5:9, 10.
Moruyaveze, Ovakriste ovatwirisiwa mave yerisa ondjerera okuza ku Jehova momuano omuhimise. Omomuano uṋe mu mave tjiti nao? Indu tji va zu nokuṱa, owo ve rira orupa rwa “Jerusalem otjipe,” poo omuvarekwa wa Kristus ngu kuramena po imba 144 000 mbu mave kahonapara otjozombara novapristeri.—Omavan. 14:1; 21:1, 2, 24; 22:3-5.
Jerusalem otjipe matji kara norupa orunanḓengu momayenenisiro wa Jesaja 60:1. (Sasaneka Jesaja 60:1, 3, 5, 11, 19, 20 ku nOmavandururiro 21:2, 9-11, 22-26.) Tjimuna Jerusalem tjokombanda yehi mu tja ri ohoromende ya Israel otjikuru, ku nao Jerusalem otjipe na Kristus, matji rire ohoromende youye oupe. Omomuano uṋe Jerusalem otjipe mu matji “zu keyuru okuza ku Ndjambi”? Omokutoora omikambo mbi mavi ṱunu kehi. Ovandu mbe nonḓuviro ku Mukuru okuza moviwaṋa avihe mave “ryanga mondjerera yatjo.” Owo mave kuturwa kouvi nonḓiro. (Omavan. 21:3, 4, 24) ‘Oviṋa avihe mavi yarurwa koupe,’ otja komahunganekero wa Jesaja novaprofete varwe. (Oviung. 3:21) Omarundurukiro omanene ngo ya uta indu Kristus tja rira Ombara, nu maye yanda komaandero wOzombura Eyovi zOuhonapare we.
a Omerikotameneno wouatjiri nga utwa rukwao mombura ndji 1919 wina ya hungirwa mu Esekiel 37:1-14 na mOmavandururiro 11:7-12. Esekiel wa hunganeka kutja Ovakriste ovatwirisiwa avehe mave kotorwa komerikotameneno wouatjiri, kombunda yokukara kehi youvara wa Babilon Otjinene oure woruveze orure. Omaprofetero nge ri mOmavandururiro ye hungirira kokambumba okaṱiṱi kovarumendu ovatwirisiwa mbaave hongorere po otjira tja Jehova kombunda yaindu tji ve hi na aave yenene okuungura oukukutu motjiungura tja Jehova oure woruveze orusupi, mena rokupaterwa monḓorongo. Mombura ndji 1919, owo va zikwa ‘otjomukarere omuṱakame nomunazondunge.’—Mat. 24:45; tara embo ndi Pure Worship of Jehovah —Restored At Last!, pomuk. 118.
