LISA * wa tja: “Ouwa ovakambure Ovakriste mbwaave raisa we ndji ṱuna tjinene.” Eye aa hungirire kotjiṋa otjitenga tji tje mu nanena kouatjiri. Anne wina wa tja: “Otjiṋa otjitenga tji tje ndji nanena kouatjiri, ya ri mena romuano Ovahongonone maave ndji raisire ouwa, nungwari kaya ri mena roviṋa mbyaave hongo.” Ndino ovakazendu ovakambure vevari mba, ve tjaterwa okulesa Ombeibela nokuripurira ko oukoto, posi ya otjiṋa tji tje ve ṱuna tjinene ya ri ouwa mbu va raisirwa.

Omomuano uṋe mu matu yenene okuraisa otjari kutja tu tunduuze varwe? Ngatu tare komiano vivari mu matu yenene okutjita nao. Omutenga, omoviṋa mbi matu hungire, nu omutjavari omovitjitwa vyetu. Nu wina matu katara kutja matu sokuraisa ouwa koouṋe.

Omukazendu omusore ngwa tamunwa mOmiano ekondwa 31, u hingwa i “etwako rouwa” tji ma hungire. (Omiano 31:26, NW) Eye u yandjera kutja “etwako” ndi, ri ṱune komuano we wokuhungira nomambo ngu ma hungire. Ovarumendu mbe novanatje wina mave sokuyandjera kutja “etwako” ndi, ri ṱune komuano wawo wokuhungira. Ovanene ovengi ve tjiwa nawa kutja omambo omakukutu ye yenena okuhihamisa omuatje. Nu iho tji tjita kutja omuatje aha puratene ku wo. Indu ovanene tji mave hungire momuano omuwa, i rira oupupu kovanatje okupuratena nokuraisa onḓuviro ku wo.

Kutja u novanatje poo ko na wo, omomuano uṋe mu mo yenene okuhungira momuano omuwa? Orupa orutenga rOmiano 31:26 ri tja: “Tji ma hungire, u hungira nounongo.” Iho matji kamburire mo okutoorora nawa omambo ngu matu hungire nomuano mu matu ye hungire. Ma rire nawa tji twe ripura oveni kutja, ‘Hapo omambo ngu me hungire maye pindikisa ovapuratene poo maye eta ohange?’ (Omiano 15:1) Tjiri onawa okuripura ngunda atu hi ya hungira.

Etjangwa rarwe rOmiano, ri tja: “Omambo nge hi nomeripura ye tuvakaṋa tjimuna engaruvyo.” (Omiano 12:18) Indu tji matu ripura ohunga nomuano omambo wetu nombosiro yeraka mu vi ṱuna ku varwe, iho matji rundurura omuano mbu tu hungira. Indu tji twa ṱakamisa “etwako rouwa” iho matji tu vatere okuhinokuungurisa omambo omavi ngu maye hihamisa varwe. (Ef. 4:31, 32) Nu atu pingenisa omeripura nomambo omavi ku nomambo omawa nomatunge. Jehova we tu raisira otjihorera otjiwa tja tunduuza omukarere we Elia indu tjaa tira. Omuengeli ngwaa kuramene po Jehova wa hungira momuano ‘omutarazu’ nomupore. (1 Ozomb. 19:12) Nungwari, okuraisa ouwa ku kamburira mo ovingi pendje nokuhungira momuano omuwa uriri. Eṱe wina matu sokuraisa movitjitwa vyetu. Omomuano uṋe?

Eṱe tu horera ku Jehova okuhungira omambo omawa nokuraisa ouwa movitjitwa vyetu. (Ef. 4:32; 5:1, 2) Lisa, ngwa tamunwa rukuru, wa hungirira kouwa mbwa raisirwa i yOvahongonone. Eye wa tja: “Indu eṱunḓu retu tji ra ningirwa okupita mohakahana, ovakupasane vevari mombongo kave i re koviungura nu ve ya okutuvatera okupaka. Oruveze ndwo kee rihongo  Ombeibela.” Ongaro ombwa ndjo ya tjita kutja Lisa ma vange okurihonga ouatjiri.

Anne, ngwa tamunwa pomautiro, wina u nondangi kouwa mbwa raisirwa i yOvahongonone. Eye wa tja: “Mena romuano ovandu mouye mu ve ritjinda, ami mba ri nomakeyakeyero, nu ya ri ouzeu ku ami okukara nongamburiro movandu.” Eye wina wa tja: “Indu tji mba hakaena ku nOvahongonone hi mba ri nongamburiro mu wo. Ami ee ripura kutja ‘Ongwaye tji mave ndji tjindi nawa nao?’ Posi yokutja omuano omundu ngwee ndji hongo Ombeibela me ndji raisira ouwa, wa tjita kutja mbi kare nongamburiro mu ye.” Nu kwa kongorera tjike? Anne wa tja: “Kombunda, ami mba uta okuyandja ombango ku imbi mbyee rihongo.”

Lisa na Anne va ṱunwa tjinene i youwa mbu va raisirwa i yovakambure mombongo, nu iho tje ve vatera kutja ve vange okurihonga ouatjiri. Ouwa mbwo wina we ve vatera kutja ve kare nongamburiro mu Jehova na movakarere ve.

Ovandu tjiva ve ungurisa omambo omawa nokumeṱameṱa mena romuano mbu ve kurisiwa. Onawa kutja ovandu tjiva ve kurisiwa nao,  posi yokutja iho katji hee kutja matu horere ku Mukuru.—Sasaneka nOviungura 28:2.

Okuraisa ouwa poo oupore otjikaṋena tjombepo ondjapuke. (Gal. 5:22, 23) Kutja tu raise ouwa, eṱe matu hepa ombepo ya Mukuru ondjapuke okutuvatera. Indu tji twa tjiti nao, eṱe matu horere ku Jehova na Jesus. Nu tjimuna Jesus, eṱe wina tu raisa onḓero mu varwe. Ku nao, eṱe tu hingwa i yorusuvero ndu tu na rwo ku Jehova Mukuru na kovakwetu. Nu iho tji tjita kutja indu tji matu raisa ouwa, u ze komutima nu u yakurwe i Mukuru.

Mape ya a rire oupupu okuraisa ouwa ku imba mbe tu raisira ouwa poo ku imba mbu matu tjiwa. (2 Sam. 2:6) Omuano umwe mu matu yenene okutjita nao, okutja ndangi ku wo. (Kol. 3:15) Hapo tjike indu tji matu munu kutja omundu ngo ke ya pwa okuraisirwa ouwa?

Tara ku imbi: Jehova ongu ri otjihorera otjisemba tjomuano wokuraisa ouwa nu Embo re ri tu honga ounanḓengu wokuraisa otjikaṋena ho. Embo ndi “otjari” poo ouwa ra ungurisiwa povikando ovingi mOmatjangwa wOtjigrike. Mukuru u tu raisira vi ouwa?

Ripura ohunga novandu omangete omengi Jehova ke raisa ko ouwa mokuvepa imbi mbi mave hepa kutja ve kare nomuinyo. (Mat. 5:45) Nandarire ngunda atu hi ya tjiwa Jehova, eye we tu raisira ouwa. (Ef. 2:4, 5, 8) Otjotjihorera, eye wa yandja Omuna we omukwatwaerike okuṱira ovandu avehe. Omuapostele Paulus wa tjanga kutja Jehova wa yandja otjisuta tjonguturiro ‘otja kouingi wotjari tje.’ (Ef. 1:7) Nu wina nandarire kutja tu zunḓa nokuhihamisa Jehova, eye u kayenda komurungu okutuhongorera po nokutuhonga. Omaronga nomambo we, ye ri tjimuna “omata” wombura. (Deut. 32:2) Eṱe tjiri kamaatu yenene okumusuta kouwa auhe mbwe tu raisira. Nu eṱe matu tjiwa kutja andakuzu Jehova ke tu raisire ouwa, eṱe katja tu kara nomaundjiro.—Sasaneka 1 Petrus 1:13.

Tjiri ouwa wa Jehova wa kapita oviṋa avihe nu u tu hinga kutja tu raise ouwa. Pendje nokuraisa ouwa kovandu tjiva uriri, eṱe matu sokuhorera ku Jehova mokuraisa ouwa ku varwe eyuva arihe. (1 Tes. 5:15) Indu tji matu raisa ouwa aruhe, i ri tjimuna omuriro mbu yandja oupyu tji ku nombepera. Tu yenena okuhuhumiṋa omaṱunḓu wetu, ovakambure ovakwetu, ovandu mbu tu ungura pamwe, ovandu mbu tu hita pamwe oskole, novararanganda vetu.

Ripura na imba oveṱunḓu roye poo ovakambure mombongo mbu mave yenene okumuna ouwa mena romambo woye omawa novitjitwa vyoye. Mape ya pe nomundu mombongo yoye ngu ma hepa ombatero ponganda na motjikunino tje poo okukaranderwa oviṋa kostora. Indu tji wa hakaene ku nomundu motjiungura tjokuzuvarisa ngu ma hepa ombatero yoye, mo yenene okumuvatera?

Tjimuna Jehova, omambo novitjitwa vyetu aruhe nga vi hingwe i ‘yetwako rouwa.’