OVANDU ovengi ve tjiwa kutja Jesus wa paperwa komuti pokati komarunga yevari. (Mat. 27:35-38) Posi yokutja, ovandu ovengi ve kambura kutja Ombeibela i ri posyo indu tji i tja, orutu rwa Jesus rwa rongerisiwa na ru kapakwa meyendo.—Mar. 15:42-46.

Ovandu tjiva mbaave pirukire Omaevangeli kaave kambura kutja, omundu ngwa paperwa komuti aa yandjerwa okupakwa momuano omusemba poo meyendo. Ku nao, ovapirukire mbo aave kambura kutja omundu ngwa paperwa komuti otjomurunde, aa tjindwa momuano warwe. Omuwonge wozombuze wena Ariel Sabar, wa tjanga membo ndi Smithsonian okukahurura kutja ongwaye tjiva tji ve noumune mbo. Eye wa tja: “Okupaperwa komuti ya ri omberero ndjaai yandjewa kovandu vongaro ombi motjiwaṋa, nu ozonongo tjiva za tja ouyova okuripura kutja Ovaroma aave yandja ondjozikiro kovandu mbo okupakwa momuano omusemba.” Ovaroma aave vanga okuyamburura ovarunde mbo. Ku nao otutu twawo aatu isiwa komuti kutja tu riwe i yovipuka vyokuti. Okuzambo oviṋepo vyokorutu mbya sewa ko aavi yumbwa meyendo.

Posi yokutja, omakonḓononeno yoviṋa ovikuru ya raisa otjiṋa tjarwe ohunga nomaṱupa wOvajuda tjiva mba zepewa. Mombura ndji 1968, omaṱupa womurumendu ngwa papererwe komuti meserewondo etenga ya munikwa. Oyo ya munikwa meyendo rimwe reṱunḓu rOvajuda popezu na Jerusalem. Oyo ya ri motjikesa maamu tuwa omaṱupa wovaṱi. Eṱupa rotjipanḓe ra ri mokati kawo. Oro ra tonenwe nomboha youre wozosentimeta 11.5 kotjindimbu tjomuti. Sabar wa tja: “Eṱupa rotjipanḓe romurumendu wena Yehochanan ra vatera okuzengurura ombata ohunga nouatjiri mbu ri mOmaevangeli wokutja Jesus wa pakwa meyendo. Ku nao, eṱupa rotjipanḓe tja Yehochanan, otjiraisiro tjomurumendu ngwa paperwa komuti indu Jesus tja ri kombanda yehi, Ovaroma ngu va yandjera okupakwa komuhingo wOvajuda.”

Pe noumune pekepeke ohunga nomuano Jesus ma paperwa komuti otja eṱupa rotjipanḓe ra Yehochanan tji ri raisa. Posi yokutja, pe noukahu wokutja ovateye voveta tjiva mba paperwa komuti va pakwa, nu kave imbirahirwe uriri. Oukahu kutja Ombeibela mbi i hungira ohunga norutu rwa Jesus kutja rwa pakwa meyendo, ouatjiri. Oviraisiro mbya kayenda po vi ṋunisa imbi Ombeibela mbi i heya.

Otjiṋa otjinanḓengu tjinene, Jehova wa hunganeka kutja Jesus ma pakwa meyendo romurumendu omutumbe. Nu kape nomundu ngu ma yenene okutjaera embo ra Mukuru okuyenenisiwa.—Jes. 53:9; 55:11.