1. Hapo omuapostele Paulus wa ri noumune uṋe ohunga novavatere vombongo?

 OVAVATERE vombongo ve ungura oviungura ovinanḓengu mozombongo. Omuapostele Paulus wa ri nondangi tjinene kovarumendu ovaṱakame mba. Otjotjihorera, indu tjaa tjanga kOvakriste moFilipi, eye wa tamuna ovakarere poo ovavatere vombongo pu novanene vombongo.—Fil. 1:​1, EEP.

2. Omurumendu omukambure wena Luis u fula vi okurira omuvatere wombongo?

² Ovarumendu ovakambure ovengi mba papitisiwa ve kara nondjoroka tjinene mena rokuvatera ombongo otjovavatere vombongo, nandarire kutja ovanene poo ovaṱiṱi motjiwondo. Otjotjihorera, Devan wa ri nozombura 18 indu tja zikwa otjomuvatere wombongo. Posi ya omurumendu omukambure warwe wena Luis, wa zikwa otjomuvatere wombongo indu tja ri nozombura zokombanda 50. Hapo Luis u fula vi okurira omuvatere wombongo? Eye wa tja: “Ami mbi tjaterwa tjinene okukarera ovakambure ovakwetu mombongo omuano mbwi. Owo ve ndji raisira orusuvero tjinene, nu nai ami mbi yenene okuveraisira orusuvero.” Ovavatere vombongo ovengi ve noumune mbwo wina.

3. Matu kahungirira komapuriro yeṋe morupa ndwi?

³ Ove mo yenene okukara nondando yokurira omuvatere wombongo indu tji u ri omurumendu omukambure ngwa papitisiwa. Ovikwaye mbi mavi ku hingi okukara nondando ndjo? Nu ovikaṋena viṋe mbi mo hepa kutja u rire omuvatere wombongo? Morupa ndwi matu kazira omapuriro ngo. Posi ya rutenga, ngatu tare koviungura omuvatere wombongo mbye ungura.

 OMUVATERE WOMBONGO U UNGURA YE?

4. Oviungura viṋe ovavatere vombongo mbi ve ungura? (Wina tara kotjiperendero.)

⁴ Omuvatere wombongo omurumendu omukambure ngwa papitisiwa, ngu zikwa i yombepo ondjapuke okuvatera ovanene vombongo noviungura ovingi ovinanḓengu mombongo. Ovavatere vombongo tjiva ve vatera ovazuvarise okukara noruveze ku mave kazuvarisa, nokuvevatera okukara nomambo nga yenene motjiungura tjokuzuvarisa. Varwe ve vatera okukohorora nokuṱuna Etuwo rOmerikotameneno. Ovavatere vombongo wina ve yakura ovandu nokuungura nozombako nozovidio pozombongarero zombongo. Oviungura ovingi ovavatere vombongo mbi ve ungura okuvatera varwe momiano pekepeke. Ovavatere vombongo ovarumendu mba suvera Jehova, nu mbe hupa otja komirari vye. Nu wina va suvera ovakambure ovakwao tjinene. (Mat. 22:​37-39) Hapo omurumendu omukambure ngwa papitisiwa ma yenene vi okurira omuvatere wombongo?

5. Omurumendu omukambure ma yenene vi okurira omuvatere wombongo?

⁵ Ombeibela i tu raera ovikaṋena omurumendu omukambure mbi ma hepa kutja ma rire omuvatere wombongo. (1 Tim. 3:​8-10, 12, 13) Indu tji mo vanga okuvatera varwe mokurira omuvatere wombongo, rihonga ovingi ohunga novikaṋena mbyo, nu okuzambo u ungure oukukutu okukara na vyo. Posi ya rutenga, ove mo hepa okuripura omuini kutja ongwaye tji mo vanga okurira omuvatere wombongo.

ONGWAYE TJI U VANGA OKURIRA OMUVATERE WOMBONGO?

6. Otjikwaye tji matji sokukuhinga okuvatera ovakambure ovakweṋu? (Mateus 20:28; wina tara kotjiperendero.)

⁶ Jesus Kristus ngu ri otjihorera tjetu otjiwatjiwa, aa hingwa i yorusuvero ndwa ri na rwo ku Ihe na kovandu. Orusuvero ndwo rwe mu hinga kutja ma ungure oukukutu, nu nandarire ma ungurire varwe oviṋa mbyaavi munika tjimuna oviungura vyokehi. (Lesa Mateus 20:28; Joh. 13:​5, 14, 15) Indu tji u vanga okurira omuvatere wombongo mena rorusuvero, Jehova me ku sere ondaya nu me ku vatere kutja u yenenise ondando yoye ndjo.—1 Kor. 16:14; 1 Petr. 5:5.

7. Ongwaye tje ri navi komurumendu omukambure okuvanga okurira omuvatere wombongo mena rokuvanga okutangwa i varwe?

⁷ Ovandu mouye potuingi va suvera ovandu mbe tjita kutja varwe ve ve mune tjimuna ovananḓengu. Posi ya ovakarere va Mukuru kave ri  nao. Omurumendu omukambure ngwa suvera varwe tjimuna Jesus, ka vanga okuhonaparera po varwe, poo okumunikwa aayo omunanḓengu. Indu omundu otja ingo tja zikwa otjomuvatere mombongo, eye mape ya a ha ungura oviungura vyokehi, poo oviungura vyarwe mbi mavi heperwa po okuṱakamisa ozonḓu za Jehova. Eye mape ya a munu kutja omunanḓengu okuungura oviungura tjiva mbyo. (Joh. 10:12) Jehova kamaa sere ondaya ozongondjero zomundu ngu ripurira ku ye omuini.—1 Kor. 10:​24, 33; 13:​4, 5.

8. Jesus wa yandja eronga riṋe kovaapostele ve?

⁸ Povikando tjiva, nandarire imba mba ri omapanga wopopezu wa Jesus aave vanga okumuna omerizirira tjiva, posi ya kava ri nomapu omawa ngaaye ve hingi okutjita nao. Tara ku imbi omuapostele Jakobus na Johanes mbi va tjita. Owo va ningira Jesus okuvepa otuveze otunanḓengu mOuhona we. Jesus ke na pe ve raera kutja onawa okuningira otjiṋa ho. Nungwari, eye wa kahurura kovaapostele avehe 12 ku tja: “Ingwi ngu ma vanga okurira omunene povakwao, u sokurira omukarere wovakwao. Nu ngu ma vanga okurira omutenga mokati keṋu, u sokurira omukarere waavehe.” (Mar. 10:​35-37, 43, 44) Ovarumendu ovakambure mbe nonḓero yokukarera varwe mave vatere ombongo momiano omingi pekepeke.—1 Tes. 2:8.

OVIKWAYE MBI MAVI KU VATERE OKUKARA NONḒERO YOKUVATERA OVAKAMBURE OVAKWEṊU?

9. Ove mo yenene vi okukara nonḓero yokukarera otjomuvatere wombongo?

⁹ Otjingaperi kutja ove wa suvera Jehova nu u vanga okuvatera varwe. Posi ya, ove mape ya o ha kara nonḓero yokuungura oviungura vyomuvatere wombongo. Ovikwaye mbi mavi ku vatere okukara nonḓero ndjo? Ripura ohunga nondjoroka ndji mo kara na yo, indu tji mo vatere ovakambure ovakweṋu. Jesus wa tja: “Mokuyandja mu nenyando tjinene pokupewa.” (Oviung. 20:35) Nu Jesus omuini wa tjita nao. Eye wa ri nondjoroka tjinene mena rokutja aa vatere varwe, nu ove wina mo yenene okukara nondjoroka ndjo.

10. Jesus wa raisa vi kutja wa ri nondjoroka okuvatera varwe? (Markus 6:​31-34)

¹⁰ Tara komuano Jesus ma raisa kutja wa ri nondjoroka okuvatera varwe. (Lesa Markus 6:​31-34.) Otjikando tjimwe Jesus novaapostele ve va urirwe. Owo va ri mondjira okuyenda koruveze ndwa ri kokure novandu, kutja ve kasuve. Posi ya otjimbumba tjovandu tjaatji vanga okuhongwa i Jesus, tja tenga po okuvaza poruveze paave sokuyenda. Jesus atja panḓa okuvehonga, mena rokutja eye novaapostele ve kava ri “noruveze nangarire ingwi okurya ovikurya.” Poo Jesus etje ve honga otjiṋa tjimwe poo vivari uriri. Posi ya, mena rokutja we ve suverere, eye wa “uta okuvehonga oviṋa ovingi.” Nu wa kayenda komurungu okuvehonga nga ‘eyuva tji ra toko.’ (Mar. 6:35) Eye wa tjita nao mena rokutja ee ve ‘ṱire ondjenda,’ nungwari kamena rokutja aa sokutjita nao. Eye aa vanga okuvehonga mena rokutja we ve suverere. Okuvatera varwe aaku mu etere ondjoroka tjinene.

11. Omomuano uṋe Jesus ma vatera ovandu? (Wina tara kotjiperendero.)

¹¹ Jesus wa vatera ovandu mokuvehonga ohunga na Mukuru, posi ya eye wina we ve vatera momiano omingi vyarwe. Eye wa yandja ovikurya kovahongewa ve, nu okuzambo e ve ningire okuhaṋa movandu. (Mar. 6:41) Mokutjita nao, eye wa honga ovahongewa ve omuano wokukarera varwe. Eye wina we ve raisira kutja oviungura otja imbyo, tjimuna oviungura vyovavatere vombongo mbi ve ungura, ovinanḓengu. Ripura nondjoroka ovaapostele ndji va ri na yo okuungura pu na Jesus mokuyandja ovikurya kovandu, mbi “va rya nu ave kuta.” (Mar. 6:42) Ihi otjihorera tjimwe tjomuano Jesus me ripurira kozonḓero zavarwe, pendje nokuripurira  ku ye omuini. Eye wa tjita nao oure womuinyo we kombanda yehi. (Mat. 4:23; 8:16) Jesus wa ri nondjoroka okuhonga varwe nokuvevatera novihepwa vyawo. Ove wina mo kara nondjoroka tjinene, indu tji u nonḓero yokukarera varwe otjomuvatere wombongo.

12. Ongwaye tji tu ha sokuripura kutja katu novikaṋena mbi mavi heperwa po okuvatera ombongo?

¹² Indu tji mo munu kutja ko notjikaṋena tjapeke tji matji ku vatere kutja u rire omuvatere wombongo, o u momuinyo. Ove mape ya u novikaṋena vyarwe mbi mo yenene okuungurisa okuvatera ombongo. Ripura ohunga na imbi Paulus mbya hungira mOvakorinte ovatenga 12:​12-30, nu okuzambo ningira Jehova okukuvatera okumuna kutja omomuano uṋe oviṋa mbyo mu mavi ṱunu kove. Omambo wa Paulus ye raisa oukahu kutja oove omunanḓengu, nu u hepwa mombongo tjimuna ovakarere varwe va Jehova. Indu tji u hi nokuyenena okukarera otjomuvatere wombongo nai, mena rokutja mo hepa okuungurira kovikaṋena tjiva mbi mavi heperwa po, o yumbu ohama. Nungwari, kondja pu mo yenene okukarera Jehova nokuvatera ovakambure ovakweṋu. Kara nongamburiro kutja ovanene vombongo mave ripura ohunga na ove, nu mave ku pe oviungura mbi mo yenene okuungura. —Rom. 12:​4-8.

13. Ovikwaye mbi matu tjiwa ohunga novikaṋena mbi undjirwa ko kovavatere vombongo?

¹³ Wina ripura ohunga notjiṋa hi. Ovikaṋena ovingi mbi ri mOmbeibela mbi undjirwa ko komuvatere wombongo, ovikaṋena Ovakriste avehe mbi mave sokukara na vyo. Ovakriste avehe mave sokutumbuka popezu na Jehova, okukara nondjoroka okuyandja ku varwe, nokuhupa otja komirari vya Mukuru. Ku nao, ove mape ya u novikaṋena ovingi mbi undjirwa ko kutja u rire omuvatere wombongo. Ovikwaye omurumendu omukambure mbi ma yenene okutjita kutja ma rire omuvatere wombongo?

MO YENENE VI OKURIRA OMUVATERE WOMBONGO?

14. Hapo ‘okukara notjikaro otjiwa’ ku heya tjike? (1 Timoteus 3:​8-10, 12)

¹⁴ Nambano ngatu tare kovikaṋena tjiva mbi ri mu 1 Timoteus 3:​8-10, 12. (Lesa.) Omuvatere wombongo ma ‘sokurira omupupurukwe,’ poo ma “sokukara notjikaro otjiwa.” (ONT) Omambo nga mape ya wina aye torokwa kutja “omundu ngu nomerizirira,” poo “omundu ngu ritjinda momuano varwe mu mave yenene okumuraisira ondengero.” Ihi katji nokuheya kutja ove ko nokuyenena okuyora, poo okuyorokera ehupo. (Omuzuv. 3:​1, 4)  Nungwari, maku hee kutja ove mo sokuungura oukukutu okuyenenisa omerizirira woye ayehe. Indu ove aruhe tji u mana oviungura mbi wa pewa nu tji u vi ungura nawa, ovakambure mombongo mave yenene okuṱaṱera kove nu mave ku raisire ondengero.

15. Omambo nga ‘okuhungira pevari’ ‘nokuhinokunanukirwa i yovimariva’ ye heya tjike?

¹⁵ Okurira omundu ngu “ha hungire pevari” ku heya kutja oove omuṱakame, nu u nouatjiri. Ove u tjita imbi mbi wa tja mo tjiti, nu ko korere varwe ovizeze. (Omiano 3:32) ‘Okuhinokunanukirwa i yovimariva’ maku hee kutja ove u nouatjiri indu tji mo ungura ongetjefa pu na varwe, na momuano mu ungurisa ovimariva. Ove ko sokuungurisa omapanga woye mombongo kutja u tjite ovimariva.

16. (a) ‘Okuhinokunwa omavinu omengi’ ku heya tjike? (b) Okukara “nomeritjiviro womomutima omawa” ku heya tjike?

¹⁶ ‘Okuhinokunwa omavinu omengi’ ku heya kutja ove ko nu omavinu okukapitisa etota, nu ko tjiukwa otjomundu ngu nwa tjinene. Okukara “nomeritjiviro womomutima omawa” ku heya kutja ove u hupa otja komirari vya Jehova. Nandarire kutja oove omundu omunauvi, ove u noupanga ouwa ku na Mukuru nu otjiṋa ho tji ku pa ohange momuinyo.

17. Omambo nga “rutenga ve sokurorwa” ye heya tjike? (1 Timoteus 3:10; wina tara kotjiperendero.)

¹⁷ “Rutenga ve sokurorwa” maku hee kutja ovanene vombongo va muna omuano mu ungura nawa oviungura mbi wa pewa, nokutja mave yenene okuṱaṱera kove. Ku nao, ovanene vombongo tji ve ku pe otjiungura, kongorera omuhunga mbu ve ku pe na imbwi wotjira tja Jehova. Kondja okutjiwa kutja ovikwaye mbi mo hepa okutjita, nokutja oruṋe tji mo hepa okumana otjiungura ho. Indu tji mo ungura oviungura vyoye nawa nonḓero, ovakambure mombongo mave munu kutja ove wa utu okurira omurumendu ngu nomerizirira. Vanene vombongo, kondjeye okuhonga ovarumendu ovakambure mba papitisiwa. (Lesa 1 Timoteus 3:10.) Hapo pe novanatje ovakambure ovazandu mba papitisiwa mombongo yeṋu mbe nozombura 14, poo kehi yanao? Hapo owo ve tjita omakonḓononeno wawo wOmbeibela aruhe nokurirongerisa nawa kozombongarero zombongo? Hapo owo ve zira aruhe pozombongarero zombongo nokukara norupa motjiungura tjokuzuvarisa? Indu tji pe ri nao, ve peye oviungura mbi mave yenene okuungura otja kozombura zawo. Ovarumendu ovakambure omitanda mba mave yenene okuraisa  kutja owo ve nomerizirira. Ku nao, indu tji va rire ovanene owo mave yenene okurira ovavatere vombongo.

18. Omambo nga ‘okuhinomundu ngu me ku kuramene momurungu’ ku heya tjike?

¹⁸ ‘Okuhinomundu ngu me ku kuramene momurungu’ maku hee kutja kape nomundu ngu me ku kuminine kutja wa tjiti otjiṋa otjivi. Otjingaperi kutja Ovakriste mape ya ave kumininwa. Jesus aa kumininwa, nu eye wa hunganeka kutja ovemukongorere mave kumininwa wina. (Joh. 15:20) Posi ya, indu ove tji wa kayenda komurungu okuritjinda nawa tjimuna Jesus tja tjita, mo kara nena ewa mombongo.—Mat. 11:19.

19. Ku heya tjike indu Ombeibela tji mai tja omurumendu omukambure ngwa kupa ma sokurira “omurumendu womukazendu umwe”?

¹⁹ “Omurumendu womukazendu umwe.” Indu Jehova tja zikamisa orukupo orutenga, eye wa tja orukupo maru sokukara pokati komurumendu umwe nomukazendu umwe. Nu ihi otjiṋa Ovakriste avehe tji mave sokukongorera. (Mat. 19:​3-9) Omurumendu Omukriste ka sokukatuka orukupo. (Hebr. 13:4) Ihi wina matji hee kutja eye aruhe ma sokurira omuṱakame komukazendu we. Ku nao, eye kamaa roro okunyanda orombe ku nomukazendu warwe.—Job 31:1.

20. Omomuano uṋe omurumendu omukambure me kurisa “ovanatje ve nawa nokuṱakamisa onganda ye nawa”?

²⁰ “Nga rise ovanatje ve nawa nokuṱakamisa onganda ye nawa.” Indu tji u ri otjiuru tjeṱunḓu, ove mo sokuyandja ombango tjinene komerizirira woye. Kara nomakonḓononeno weṱunḓu aruhe. Zuvarisa pu nomukazendu woye novanatje veṋu aruhe, otja pu mo yenene. Vatera ovanatje voye okukara noupanga wopopezu ku na Jehova. (Ef. 6:4) Omurumendu ngu yandja ombango keṱunḓu re u raisa kutja eye ma yenene okuvatera ombongo.—Sasaneka 1 Timoteus 3:5.

21. Ovikwaye mbi mo yenene okutjita indu tji u ha karere otjomuvatere wombongo?

²¹ Varumendu ovakambure, indu tji mu ha karere otjovavatere vombongo, arikaneye leseye orupa ndwi nawa nokukumba ku Jehova ohunga notjiṋa hi. Konḓononeye ovikaṋena mbi heperwa po kutja u rire omuvatere wombongo nu ungureye oukukutu kutja mu yenenise ovikaṋena mbyo. Ripura ohunga nomuano mbu wa suvera Jehova novakambure ovakweṋu. Kurisa orusuvero rwoye kovakambure ovakweṋu, nu ripura kutja omena raye tji mo vanga okuvekarera. (1 Petr. 4:​8, 10) Ungura oukukutu okurira omuvatere wombongo, nu ove mo kara nondjoroka tjinene ndji za mokukarera ovakambure ovakweṋu mombongo. Tjiri Jehova nga sere ozongondjero zoye zokuvanga okukarera otjomuvatere wombongo ondaya.—Fil. 2:13.