Oviṋa mbi mavi ku vatere okutjita omakonḓononeno woye otjivike atjihe
HAPO i rira ouzeu kove okukara nomakonḓononeno woye wOmbeibela otjivike atjihe? Atuhe tu fula nao povikando tjiva. Posi ya ripura ohunga noviṋa vyarwe mbi tu tjita aruhe, tjimuna okurikoha. Otjiperi kutja okurikoha ku toora oruveze nozongondjero, posi ya ripura nomuano mbu tu fula indu tji twa zu nokurikoha. Omakonḓononeno wOmbeibela wina ye yenena okutjita kutja tu fule nawa. (Ef. 5:26) Tara koviṋa tjiva mbi mavi yenene okutuvatera:
Twa po oiri ndji mo tjiti omakonḓononeno woye. Omakonḓononeno wOmbeibela i vimwe vyoviṋa “mbi ri oviwaviwa” Omukriste mbi ma sokutjita. (Fil. 1:10) Okukuvatera kutja o ha zembi okutjita omakonḓononeno woye, tjanga eyuva noiri pombapira nu i twa poṋa pu mo yenene okuimuna aruhe. Poo twa ko oalarama kongoze yoye ndji mai ku zemburukisa oruveze ndu mo sokutjita omakonḓononeno woye wOmbeibela.
Toorora oiri nomuano wokukonḓonona mbu ri omupupu kove. Otjotjihorera, hapo oupupu kove okutjita omakonḓononeno woye oure woiri? Poo oupupu kove okutjita omakonḓononeno woye oure woruveze orusupi, posi ya u tjita nao aruhe? Ove mo tjiwa ongaro mu u ri. Ku nao, twa po oruveze ndu mo rihongo otja kongaro mu u ri. Indu tji u hi nombango okutjita omakonḓononeno woye moiri ndji wa twa po, mo yenene okukondja okutjita omakonḓononeno woye oure wozominute omurongo uriri. Nandarire kutja we rihongo oure wozominute omurongo nḓo, ove mo yenene okurihonga oviṋa ovingi. Nu indu tji wa utu okutjita omakonḓononeno, ove mo kara nonḓero yokukayenda komurungu.—Fil. 2:13.
Toorora oviṋa mbi mo kakonḓonona komurungu woruveze. Indu tji wa undju nga indu oruveze rwoye rwomakonḓononeno tji rwa yenene, ove komoo ungurisa oruveze rwoye “momuhingo omusemba.” (Ef. 5:16) Tjanga oviṋa tjiva mbi mo vanga okukonḓonona. Otjotjihorera, indu tji u nepuriro ohunga notjiṋa tji u ha zuu nawa, tjanga epuriro ndo. Nu komaandero womakonḓononeno woye ayehe, mape ya ove o eta oviṋa vyarwe ovipe mbi mo vanga okukonḓonona.
Tjita omarundurukiro indu tji maye heperwa po. Otjiṋa otjinanḓengu okutjita omakonḓononeno woye otjivike atjihe. Kutja u tjite nao, mo hepa okurundurura eyuva noiri ndji mo tjiti omakonḓononeno woye, nokutja orure ndu ṱa pi, poo omapu yeṋe ngu mo konḓonona.
Tu muna ouwa mokutjita omakonḓononeno wetu otjivike atjihe. Oupanga wetu ku na Jehova u kurira ko, tu rihonga okutjita ozondando ozombwa mehupo retu, nu tu yanḓiparisiwa.—Jos. 1:8.
