1-2. Ovikwaye mbi tjita kutja ovakarere va Mukuru ve rire ovaṋingandu? (Jakobus 1:​22-25)

 JEHOVA nOmuna we omusuverwa ve vanga kutja tu rire ovaṋingandu mehupo. Omutjange wEpsalme 119:2 wa tja: “Ovaṋingandu imba mbe ṱakamisa omaraerero we, nu mbe nonḓuviro ku Ye nomitima vyawo avihe.” Jesus wina wa tja: “Ovaṋingandu komeho imba mbe zuva embo raNdjambi nave ṱakamisa ro!”—Luk. 11:28.

² Ovakarere va Jehova ovandu ovaṋingandu. Omena raye? Eṱe tu nomapu omengi, posi ya epu rimwe enanḓengu orondi rokutja tu lesa Embo ra Mukuru eyuva arihe nokukondja okuṱakamisa imbi mbi matu lese.—Lesa Jakobus 1:​22-25.

3. Ouwa waye mbu tu muna indu tji matu ṱakamisa imbi mbi twa lese mEmbo ra Mukuru?

³ Pe nomiano pekepeke mu tu muna ouwa indu tji twa rire “ovayenenise vaindi embo.” Otjotjihorera, indu tji matu ṱakamisa imbi mbi twe rihongo okuza mEmbo ra Mukuru, tu yorokisa Jehova nu iho wina tji tu yorokisa. (Omuzuv. 12:13) Nu wina indu tji matu kongorere ondunge okuza mEmbo ra Mukuru, tu kurisa oupanga ku na imba oveṱunḓu retu novakambure ovakwetu mombongo. Iho mape ya tja tjitwa mehupo roye. Kombanda yanao, tu yepa omauzeu omengi nge ya ku imba mbe hi nonḓuviro komatwako wa Jehova. I ri tjimuna omambo Ombara David nga hungira. Kombunda yokutamuna omatwako, omaraerero, nozombanguriro za Jehova meimburiro, komaandero eye wa tja: “Mokuzeṱakamisa omu mu nondjambi onene.”—Eps. 19:​7-11.

4. Ongwaye tje ha rire oupupu aruhe okuṱakamisa imbi mbi twa lese mEmbo ra Mukuru?

⁴ Kaaruhe tje rira oupupu okulesa Embo ra Mukuru nokuṱakamisa imbi mbi twe rihongo, mena rokutja tu kara noviungura  ovingi. Eṱe tu hepa okutwa po oruveze okulesa nokukonḓonona Ombeibela kokutja tu zuve imbi Jehova mbi ma vanga kutja tu tjite. Ku nao, ngatu tare komiano tjiva mbi mavi yenene okutuvatera okulesa Ombeibela eyuva arihe. Nu wina matu katara koviṋa mbi mavi tu vatere okuripura ohunga noviṋa mbi twa lese nokutja matu yenene vi okuviṱakamisa mehupo retu.

TWA PO ORUVEZE OKULESA EMBO RA MUKURU

5. Omerizirira yeṋe nge kambura oruveze rwetu oruingi?

⁵ Ovakarere va Jehova ovengi ve kara noviungura ovingi. Eṱe tu ungurisa oruveze rwetu oruingi okuungura oviṋa Ombeibela mbi tja ovinanḓengu. Otjotjihorera, otjingi tjetu tu ungura oviungura okuritumba oveni noveṱunḓu retu. (1 Tim. 5:8) Ovakriste ovengi ve tjevera ovazamumwe vawo mba vera poo ovakurundu. Nu atuhe tu hepa okuṱakamisa ouveruke wetu, tji tji ri otjiṋa tji tji kambura oruveze. Nu wina tu nomerizirira mombongo. Omerizirira yemwe omananḓengu, okuzuvarisa ombuze ombwa otja pu matu yenene. Hapo ove mo yenene vi okutwa po oruveze okulesa Ombeibela eyuva arihe, okuripurira ko oukoto, nokuṱakamisa imbi mbi we rihongo nandarire kutja u nomerizirira omengi?

6. Omomuano uṋe mu mo yenene okutjita kutja u lese Ombeibela eyuva arihe? (Wina tara kotjiperendero.)

⁶ Omalesero wOmbeibela, ooviṋa “mbi ri oviwaviwa” poo ovinanḓengu kweṱe otjOvakriste, ku nao eṱe matu sokukondja okuilesa. (Fil. 1:10) Ohunga nomundu omuṋingandu, epsalme ri tja: “Omuṋingandu ingwi ngu muna ondjoroka mokuṱakamisa omatwako waMuhona, nu ngu rizemburuka na wo [poo “okulesa,” NWT] omutenya nouṱuku.” (Eps. 1:​1, 2) Oukahu kutja tu sokutwa po oruveze okulesa Ombeibela. Oruṋe tje ri oruveze oruwa okulesa Ombeibela? Omundu auhe mape ya a toorora oruveze ndu ri orusemba ku ye. Posi ya otjiṋa otjinanḓengu, okutoorora oruveze ndu maru tjiti kutja i rire oupupu kove okulesa Ombeibela eyuva arihe. Omurumendu omukambure wena Victor wa tja: “Ami mba suvera okulesa Ombeibela yandje  omuhukomunene. Nandarire kutja hi ya suvera okupenduka rukuru, indo ooruveze tji pe hi noviṋa ovingi mbi mavi ndji nana ombango. Ozoiri nḓo mbi kara katumba nu mbi yenena okuyandja ombango nawa.” Mape ya ove wina u tjita nao. Ripura omuini kutja, ‘Oruṋe tje ri oruveze orusemba kwami okulesa Ombeibela?’

RIPURIRA OUKOTO KU IMBI MBI MO LESE

7-8. Ovikwaye mbi mape ya avi tjiti kutja atu ha munu mo ouwa okuza mu imbi mbi twa lese? Sasaneka.

⁷ Otjiperi kutja povikando tjiva tu lesa oviṋa ovingi nokuhinokuripurira ko oukoto. Hapo ove wa rora okulesa otjiṋa okuzambo o ha yenene okuzemburuka oviṋa mbi wa lese? Atuhe twa rora okukara mongaro otja indjo. Iho wina matji yenene okutjitwa indu tji matu lese Ombeibela. Otjotjihorera, mape ya atu twa po kutja matu lese omakondwa tjiva wOmbeibela eyuva arihe. Iho otjiṋa otjiwa okutjita. Eṱe matu sokutwa po ozondando natu kondjo okuzeyenenisa. (1 Kor. 9:26) Posi yokutja, eṱe matu sokuungura ovingi pendje nokulesa Ombeibela uriri indu tji matu vanga okumuna ouwa mu imbi mbi matu lese.

⁸ Tara kotjisasanekero hi: Omiti potuingi vi hepa omeva kutja vi hape. Posi ya indu ombura tji ya roko tjinene moruveze orusupi, ehi ri nyingena tjinene. Nu iho tji tja tjitwa, omiti kavi hapa nawa. Onawa indu ombura tji hi nokuroka nomasa, mena rokutja omeva maye hiti mehi nu maye vatere omiti okuhapa. Momuano tjingewo, indu tji matu lese Ombeibela, katu sokuhakahana mena rokutja kamaatu kara noruveze okuripurira ko, okuzemburuka, nokuungurisa imbi mbi twa lese.—Jak. 1:24.

9. Matu sokutjita vi indu tji twa munu kutja tu lesa Ombeibela amatu hakahana?

⁹ Hapo ove povikando tjiva u lesa Ombeibela amo hakahana? Mo sokutjita vi? O hakahana okulesa Ombeibela kokutja u yenene okuripurira ku imbi mbi wa lese, poo twa po oruveze kombunda yokulesa kutja u ripurire ku imbi mbi wa lese. Ihi katji sokurira otjiṋa otjizeu okutjita. Ove mape ya o tye kutja mo ungurisa oruveze oruingi indu tji mo lese Ombeibela kokutja u kare noruveze okuripurira  ko oukoto. Poo mape ya o toorora okulesa omazeva omaṱiṱi uriri, nu o ungurisa oruveze ndwa sewa po okuripurira ku imbi mbi wa lese. Victor ngwa tamunwa rukuru wa tja: “Ami mbi tjita kutja omalesero wandje wOmbeibela ye rire omasupi, povikando mbi lesa ekondwa rimwe uriri. Mena rokutja mbi lesa omuhukomunene, mbi yenene okuripurira ko oure weyuva arihe.” Kainatja kutja u lesa momuano uṋe, otjiṋa otjinanḓengu okulesa momuano mbu mau ku yandjere okuripurira ku imbi mbi mo lese.—Eps. 119:97; tara kokawongo nga, “ Omapuriro ngu mo yenene okuripura.”

10. Yandja otjihorera tjokutja omomuano uṋe mu mo yenene okuṱakamisa imbi mbi we rihongo. (1 Ovatesalonika 5:​17, 18)

¹⁰ Kainatja kutja u lesa ruṋe Ombeibela yoye nu u ungurisa oruveze ndu ṱa pi, kondja okupaha omiano okuṱakamisa imbi mbi wa lese. Otja tji mo lese orupa rwEmbo ra Mukuru, ripura omuini kutja, ‘Omomuano uṋe mu me yenene okuṱakamisa ondjivisiro ndji ndino poo moruyaveze?’ Okusasaneka, ngatu tje wa zu nokulesa 1 Ovatesalonika 5:​17, 18. (Lesa.) Kombunda yokulesa omazeva yevari ngo, ove mo yenene okuripura ohunga novikando mbi u kumba, nokutja u kumba oukoto pu pe ṱa pi. Nu wina, mo yenene okuripurira koviṋa mbi u nondangi na vyo. Mape ya ove o tye kutja mo tja ndangi ku Jehova koviṋa vitatu. Nandarire kutja u noruveze oruṱiṱi okuripurira ku imbi mbi we rihongo mOmbeibela, okutjita nao maku ku vatere okuzuva nawa Embo ra Mukuru nokutjita imbi mbi ma ri ku raere. Nu eyuva arihe tji mo ṱakamisa imbi mbi wa lese okuza mOmbeibela, ove mo rire omukarere wa Jehova omusemba otja oruveze tji maru kayenda. Posi ya, hapo mo tjiti vi indu tji pe noviṋa ovingi mbi mo hepa okuungurira ko?

KARA NOZONDANDO NḒU MO YENENISA

11. Ongwaye tji mape ya atu munu ko ouzeu okutjita omarundurukiro povikando tjiva? Yandja otjihorera.

¹¹ Indu tji mo lese Ombeibela, povikando tjiva mape ya o u momuinyo mena rokumuna kutja pe noviṋa ovingi mbi mo hepa okuungurira ko. Otjotjihorera, ngatu tje momalesero woye wOmbeibela ndino wa lese ohunga nokuhinokukara nondoorora poo ombangu. (Jak. 2:​1-8) Nu o munu kutja mo hepa okutjita omarundurukiro momuano mu u tjinda varwe. Tjiri iho otjiṋa otjiwa. Nu eyuva ndi mari kongorere ko, o lese omazeva ngu maye raisa ounanḓengu wokutjevera oviṋa mbi mo hungire. (Jak. 3:​1-12) Nu o munu kutja povikando u hungira oviṋa mbi he ri oviwa poo mbi teya varwe ombango. Ku nao, o tye kutja mo utu okuhungira oviṋa mbi mavi tunduuza varwe. Nu eyuva rarwe omalesero woye  wOmbeibela aye ku rakiza ohunga nokurira epanga rouye. (Jak. 4:​4-12) O munu kutja mo hepa okutoorora nawa oviṋa mbi mo lese, mbi mo tarere, nokupuratena. Eyuva ndi mari kongorere ko, ove mape ya o munu kutja ouzeu okutjita omarundurukiro ayehe nga.

12. Omena raye tji u ha sokuwa momuinyo indu omalesero woye wOmbeibela tji maye raisa kutja mo hepa okutjita omarundurukiro? (Wina tara komambo wokehi.)

¹² Indu tji mo hepa okutjita omarundurukiro kaaṋi, otjiṋa ho atji ku wisa momuinyo. Mena rokutja ove wa munu kutja mo hepa okutjita omarundurukiro, iho matji raisa kutja oove omurisusuparise nu u nondando ombwa. Indu tji tu ri overisusuparise, matu lese Omatjangwa nokupaha kutja ovikwaye mbi matu hepa okuungurira ko. a Wina, zemburuka kutja eṱe matu sokukayenda komurungu okurihwikika “omundu omupe.” (Kol. 3:10) Ovikwaye mbi mavi ku vatere kutja u rire omuyenenise wa indi Embo?

13. Omuano uṋe umwe mbu mau ku vatere okuṱakamisa imbi mbi we rihongo? (Wina tara kotjiperendero.)

¹³ Pendje nokukondja okuṱakamisa oviṋa avihe mbi wa lese moruveze rumwe, ove mo yenene okuungurira kotjiṋa tjimwe poo vivari. (Omiano 11:2) Kondja okutjita nai: Kara noviṋa mbi mo hepa okuungurira ko, okuzambo u toorore otjiṋa tjimwe poo vivari mbi mo ungurire ko rutenga, nu imbyo vyarwe u ungurire ko kombunda. Hapo mo utire pi?

14. Ozondando zeṋe nḓu mape ya o utu na zo?

¹⁴ Ove mape ya o utu nondando ndji ri ombupu kove okuyenenisa. Poo ove mape ya o toorora okuungurira kotjiṋa tji mo munu kutja matji hepa ombango onyingi. Indu tji wa tye kutja mo vanga okuungurira ku ye, tjita omakonḓononeno momambo wetu. Ove mo yenene okuungurisa o-Watch Tower Publications Index, poo Okambo komakonḓononeno  kOvahongonone vaJehova. Kumba ku Jehova nu mu ningira kutja me ku pe “ombango nomasorero okuyenenisa ondyero ye.” (Fil. 2:13) Nu okuzambo kondja okuungurira ku imbi mbi we rihongo. Indu tji wa ungurire kondando yoye ondenga, iho mape ya atji ku hingi kutja u kare nonḓero okuungurira kondando yoye yarwe. Otjiperi kutja indu tji wa tjiti omarundurukiro mehupo roye otjOmukriste poo motjikaṋena tjimwe tjOukriste, iho matji tjiti kutja i rire oupupu okutjita omarundurukiro mozongaro zarwe.

EMBO RA MUKURU NGA RI ‘UNGURE MU EṊE’

15. Omomuano uṋe ovakarere va Jehova mu va panguka kovandu ovengi mbe lesa Ombeibela? (1 Ovatesalonika 2:13)

¹⁵ Ovandu tjiva va lesa Ombeibela povikando ovingi. Posi ya hapo tjiri owo ve kambura mu imbi Ombeibela mbi honga? Hapo owo ve kondja okuhupa otja ku imbi Ombeibela mbi honga nokurundurura ehupo rawo? Kako. Ovandu ovengi kave kongorere imbi Ombeibela mbi honga. Posi ya ovakarere va Jehova ve noumune mbwa panguka ohunga nOmbeibela. Tjimuna Ovakriste veserewondo etenga, eṱe tu yakura Ombeibela otja “embo raNdjambi.” Kombanda yanao, eṱe tu kondja pu matu yenene okuṱakamisa omaronga wOmbeibela mehupo retu.—Lesa 1 Ovatesalonika 2:13.

16. Ovikwaye mbi mavi tu vatere okuyenenisa indi Embo?

¹⁶ Kaaruhe tje rira oupupu okulesa nokuṱakamisa Embo ra Mukuru. Eṱe mape ya atu munu ouzeu okutwa po oruveze okuilesa. Poo mape ya tu hakahana okulesa Ombeibela, natu ha kara noruveze okuripurira ku imbi mbi twa lese. Poo mape ya atu u momuinyo mena romarundurukiro omengi ngu matu sokutjita. Kainatja kutja u nomauzeu yeṋe, nombatero ya Jehova, mo yenene okutuurunga. Ngatu rimanene okuyakura ombatero ye, atu ha puratene kEmbo uriri, nungwari tu ri yenenise. Otjiperi kutja, otja tji matu lese Embo ra Mukuru nokuriṱakamisa mehupo retu, matu munu mo ouwa.—Jak. 1:25.