Ongurameno i heya omirari poo ozoveta omundu nḓa toorora okuungurisa mehupo re. Otjotjihorera, hapo u kondja okukara nowatjiri moviṋa avihe? Ngahino u vanga okuhonga ongaro ndjo movanatje voye.

Ongurameno wina i kamburira mo okukara noveta osemba. Otjotjihorera, omundu ngu noveta ndja zikama urira epatje, u kara nowatjiri, nu u ripurira ku varwe. Ozongaro nḓo ze nyomoka nawa ngunda omuatje eri omuṱiṱi.

OMURARI WOMBEIBELA: “Honga omuatje omuhingo mbu ma hupu na wo, neye me u zemburuka aruhe mounene we.”—Omiano 22:6

Moruveze rwoviungurisiwa vyouye wa kandino, ongurameno youndu onahepero. “Ongaro ombi i yenena okuvazewa mouyendjezewa oruveze aruhe,” omunene umwe wena Karyn watja nao. “Ovanatje vetu mave yenene okuhaama meṋe yetu ngunda a mave tarere oviṋa ovivi!”

OMURARI WOMBEIBELA: Ovandu ovanene . . . Okutja ovandu mbe nozondunge nu mba iririra okupangura pokati kouwa nouvi.”—Ovaheberi 5:14.

Ongaro youndu onahepero wina. I kamburira mo ongaro (tjimuna okutja “arikana” poo okutja “okuhepa”) nokurikendera ku varwe ndji ri ongaro ndja zenga, mena rokutja ovandu ve yandja ombango koviungurisiwa vyouye wa kandino pendje nokuyandja ombango kovandu.

OMURARI WOMBEIBELA: “Tjiteye kovakweṋu otja punga amamu vanga kutja owo ve tjite ku eṋe.”—Lukas 6:31.

Raisa ongaro youndu woye. Otjotjihorera, ongonḓononeno imwe ya raisa kutja omitanda vi yenena okukara kokure notuvakiro ngunda avi hiya kupwa indu tjiva raerwa nawa kutja ongaro otja indjo iri posyo.

ONDUNGE: Ungurisa otji tjitwa atjihe tji tji ripo okuuta ehungi ohunga nongaro youndu. Otjotjihorera, indu ombuze tji ya tjivisa ohunga nozongaro zokuhina okuvangasana, ove mo yenene okutja nai: “Katjiṋa otjiwa okumuna omuano ovandu muve raisa omapindi wawo ku varwe. Hapo u ripura kutja otjikwaye tji tjitjita kutja ovandu ve raise ongaro ndjo?”

“Ouzeu kovanatje okutoorora pokati kouwa nouvi indu tji ve hina okutjiwa mbi ri oviwa na mbi ri ovivi.”—Brandon.

Honga ongaro osemba. Ovanatje ovaṱiṱi wina mave yenene okurihonga okutja “arikana” poo okutja “okuhepa” nokurikendera ku varwe. Embo ndi Parenting Without Borders ratja: “Ovanatje tji mave utu okumuna kutja ve norupa movitjitwa ongondoroka nawo, meṱunḓu, moskole, na motjiwaṋa otji mave utu okutjita oviṋa mbi mavi yeta ouwa ku varwe, nu ka kuwo oveni uriri.”

ONDUNGE: Yandja oviungura kovanatje woye mbi mavi ve vatere okutjiwa ounahepero wokuvatera varwe.

“Indu ovanatje vetu tji va iririre okuungura nai, mave ke rivatera indu tji va utu okukara kuwo oveni. Tjive rihongo omerizirira nai mave karira ovandu mbe nongurameno.”—Tara.