KOVAKUPASANE
3: Ondengero
MAVI KAMBURIRE MOYE
Ovakupasane mbe nondengero ve vaterasana , nandarire kutja kave nokuzuvasana. Embo ndi Ten Lessons to Transform Your Marriage ratja: “Ovakupasane mba kave kondjo okukara auhe kuye muini nokuhaha. “Nungwari, ve kaenda komurungu okuhungira kumwe ohunga nouzeu mbu ve nawo. Owo ve puratenasana nondengero nu ve paha omazengururiro nga pu kuwo aveyevari.”
OMURARI WOMBEIBELA: “Orusuvero . . . Karuripahere ombwiro yaro.”—1 Ovakorinte 13:4, 5.
“Okuyandja ondengero komukazendu wandje, eendu tji me muvara otjomundu. Kunao hivanga okutjita otjiṋa tji matji mu hihamisa poo tji matji zunḓa orukupo rwetu.”—Micah.
ONGWAYE TJERI OHEPERO
Tji pe hina ondengero, ehungi pokati kovakupasane ri kakara nomambo wondjambu, omatwe, nu wina ngu maye ṋeṋuna omundu—omukonḓonone umwe watja ozongaro otja inḓo ze twara komahaṋikiro worukupo.
“Okunyanda nomambo omavi, kuna omukazendu woye, maye teya oundu we, ongamburiro ye, norukupo rweṋu.”—Brian.
MOYENENE OKUTJITAVI
RIKONḒONONA OMUINI
Yandja ombango komambo na kovitjitwa vyoye oure wotjivike. Tjazumba uripure omuini kutja:
-
‘Hapo ovikando vingapi mbi mba kwekurura omurumendu poo omukazendu wandje, nu ovikando vingapi mbi mbe mutanga?’
-
‘Nu omomiano viṋe vya peke mu mbi raisira omurumendu poo omukazendu wandje ondengero?’
PURASANEYE OMAPURIRO NGA
-
Ovitjitwa nomambo yeṋe ngu maye mu vatere okumuna kutja mwa tengasana?
-
Ovitjitwa nomambo yeṋe ngu maye mu vatere okumuna kutja kamu tengasanene?
ONDUNGE
-
Tjanga omiano vitatu mu movanga okuraisirwa ondengero. Omukweṋu nga tjite nao wina. Omundu auhe nga kambure ombapira yomukwao, nu auhe ma kondje okuraisa ondengero koviṋa omukwao mbya tjanga.
-
Tjanga ongaro ndji ku tjatera ohunga nomukweṋu. Nu u raere omukweṋu kutja ongaro ndjo i ku tjatera pupeṱapi.
“Okuyandja ondengero komurumendu wandje eendu tji me mu raisire movitjitwa vyandje, kutja mbi mu vara otjomundu nu mbi vanga kutja ma kare nondjoroka. Kaaruhe tji mbi hepa okutjita otjiṋa otjinene; rumwe oviṋa oviṱiṱi uriri vi yenena okuraisa ondengero yatjiri.”—Megan.
Komaandero, kapena ku heya kutja ove omuini morivara otjomundu ngu raisa poo ngu haraisa ondengero; otjiṋa otjinanḓengu eendu omurumendu woye tji ma munu kutja ove we mu tenga.
OMURARI WOMBEIBELA: “Otji mamu sokukara notjari nounyaṋutima nomerisusuparisiro noupore nomuretima.”—Ovakolose 3:12.
