Sekeda utai ke disebut nya amat balat. Chunto, berita tauka cherita pelesu ti ulih bejai nama nuan. Taja pan utai ke dikerandauka nya engka ukai utai ti balat. Tang, nya agi ulih ngemediska ati nuan, kelebih agi enti nya datai ari kaban rapat nuan.—Masmur 55:12-14.

 “Aku nemu, kaban rapat aku madahka orang bukai pasal aku enda ibuhka orang bukai. Pedis amat ati aku! Enda nemu nama kebuah iya munyi nya.”—Ashley.

 Fakta: Enda ngira orang ke madahka berita nya kaban rapat nuan tauka ukai, nuan tentu pedis ati enti dikerandauka orang bukai.

 Sekeda orang berandauka orang bukai ketegal:

 Ibuh. Kitai endang rindu begulai. Nya alai, bejaku pasal seseiku orang ngagai orang bukai nya endang suah nyadi. Bup Kudus mega meransang kitai, “berunding mega ke orang bukai.”—Pilipi 2:4.

 “Bejaku pasal orang bukai nya ngerinduka ati!”—Bianca.

 “Aku ngaku, aku rindu ninga pasal seseiku orang lalu madahka cherita nya ngagai orang bukai. Aku empu pan enda nemu kebuah iya, tang aku rindu.”—Katie.

 Nadai pengawa. Ba jeman Bup Kudus, sekeda orang “semina madahka tauka ningaka penemu ti baru.” (Kereja Rasul 17:21) Kemayaharitu mega sama!

 “Kekadang nadai cherita ti ngerinduka ati, nya kebuah kami ngaga macham-macham cherita ngambika ulih berandau.”—Joanna.

 Enda pechaya diri. Bup Kudus nangkan kitai ngambi enda mandingka diri enggau orang bukai. (Galatia 6:4) Sayau amat, sekeda orang mutarka asai ati ti enda pechaya diri enggau madahka berita ti enda meransang.

 “Kesuah iya, orang ke selalu berandauka orang bukai ketegal sida chemburu ngagai orang ke dikerandauka nya. Sida baka nya ngambika sida tampak manah agi dibandingka ari orang bukai.”—Phil.

 Fakta: Enda ngira nuan deka tauka enda, orang bukai tentu bejaku pasal orang bukai nyengkaum nuan.

 Nuan engka enda ulih nyeliahka ari dikerandauka orang bukai. Tang, nuan ulih milih chara napi nya. Enti nuan dikerandauka, abis nadai nuan bisi dua iti pilih.

 PILIH 1: Tejuka aja. Kesuah iya, chara ti pemadu manah iya nya, tejuka aja. Kelebih agi enti utai ke dikerandauka nya ukai pekara ti besai. Bup Kudus ngelalau kitai ngambika enda “lengkar” tauka jampat ringat.—Pengajar 7:9.

 “Aku tedingaka bisi berita madahka aku benung besulu enggau seiku lelaki ke enda kala ditemu aku! Aku ngasaika nya cherita lucu. Udah nya, aku nejuka berita nya.”—Elise.

 “Ngetanka nama ti manah ulih ngelaban cherita pelesu pasal nuan. Taja pan bisi orang berandauka nuan, enti nuan majak ngayanka pemanah, sekeda aja orang arapka cherita nya. Nyau kelama, orang tentu nemu cherita ti bendar pasal nuan.”—Allison.

 Chara: Tuliska (1) berita ke ditusi orang pasal nuan enggau (2) asai ati nuan pasal berita nya. Pengudah nuan ‘berandau enggau ati nuan empu ba peninduk nuan,’ nuan deka berasai senang agi enda ingatka nya.—Masmur 4:4.

 PILIH 2: Betemu enggau orang ke ngepunka cherita nya. Kekadang nuan engka ngasaika cherita nya amat balat, lalu nuan patut betemu enggau orang ke ngepunka cherita nya.

 “Enti nuan betemu enggau orang ke berandauka nuan, sida nemu utai ke disebut sida nya tentu ulih ditemu nuan mega. Enggau chara nya, nuan engka ulih ngetuka cherita nya lalu mutarka utai ti ngasuh saru runding tu nyadi.”—Elise.

 Sebedau betemu enggau orang ke berandauka nuan, perundingka dulu prinsip Bup Kudus sereta sekeda tanya tu:

•   “Enti nuan enda mending dulu, nuan beli.” (Jaku Dalam 18:13) “Kati aku bisi semua fakta? Kada enda orang ke madahka aku cherita nya saru runding enggau penerang ke didinga iya?”

•   “Enda tau enda jampat mending, lubah mansutka jaku, lubah ringat.” (James 1:19) “Kati tu maya ti ngena betemu enggau orang ke nusi cherita nya? Kati ulih aku mutarka pekara tu tang enda dikuasa asai ati diri? Kati manah agi enti aku nganti dulu, lalu ngiga maya asai ati aku baik agi?”

•   “Kereja ngagai orang baka ke dikedekaka kita kereja orang ngagai kita.” (Matthew 7:12) Gambarka nuan empu orang ke nusi cherita nya lalu tanya meh diri empu, “Enti orang nya deka berandau enggau aku, baka ni chara iya? Baka ni chara ti ngasuh aku nyamai agi berandau pasal pekara nya? Nama leka jaku tauka ulah ti ulih diterima aku?”

 Chara: Sebedau betemu enggau orang nya, tuliska dulu utai ti deka disebut nuan ngagai iya. Pengudah seminggu tauka dua minggu, bacha baru utai ke udah ditulis nya lalu ubah baru utai ti diasaika nuan patut. Kelimpah ari nya, berandau dulu enggau apai indai tauka bala kaban ti bepenemu lalu minta lalau ari sida.

 Fakta: Ukai semua utai ulih diseliahka nuan ba pengidup, nyengkaum enti bisi orang berandauka nuan. Tang, anang meh nejuka berita ti ditusi orang nya nguasa nuan!