Kati pemutus deka nyerahka diri ngagai Jehovah sereta dibaptisa ngasuh nuan irau? Enti ya, artikel tu deka nulung nuan mutarka pengirau nya.

Ba artikel tu

•  Baka ni enti aku ngereja dosa ti besai pengudah dibaptisa?

•  Baka ni enti aku berasai takut megai mayuh tanggungjawap pengudah dibaptisa?

•  Baka ni enti aku ngasaika diri enda layak nyembah Jehovah?

•  Nama ku nembiak serambau nuan

 Kebuah irau: Nuan engka ngelala seiku orang ke udah ngereja dosa ti besai, lalu dibuai ari gerempung. (1 Korint 5:11-13) Nuan engka irau, utai ti sama deka nyadi ba nuan.

 “Keterubah iya, maya berunding pasal baptisa, aku takutka diri ngereja dosa ti besai pengudah baptisa. Aku nemu, utai tu deka ngemaluka apai indai aku.”—Rebekah.

 Ayat kunchi: ‘Awakka orang ke jai, ninggalka jalai pengidup sida . . . Awakka sida nguingka diri ngagai Jehovah Petara kitai. Iya endang kasih, lalu jampat ngampun.’—Isaiah 55:7.

 Pikirka: Taja pan orang ke ngereja dosa ti besai sereta enda nesal ati deka dibuai ari gerempung, tang Jehovah agi kasihka sida ti baruh ati, nesal, sereta sanggup nerima jaku rara.—Masmur 103:13, 14; 2 Korint 7:11.

 Kelimpah ari nya, taja pan nuan enda sempurna, tang enggau tulung Jehovah nuan ulih ngelaban penguji. (1 Korint 10:13) Nambahka nya, sapa ke nentuka pengawa nuan? Orang bukai? Tauka nuan empu?

 “Aku irau, aku deka ngereja dosa ti besai pengudah dibaptisa. Tang aku sedar, aku silap enti aku nagang diri ari dibaptisa. Aku enda patut nejuka asai takut enggau utai ti deka nyadi nagang pemansang ke patut digaga aku diatu.”—Karen.

 Nyadika simpul: Baka mayuh penyembah Jehovah, nuan mega ulih milih nyeliahka diri ari ngereja dosa ti besai.—Pilipi 2:12.

 Begunaka mayuh agi bantu? Peda “Baka Ni Aku Nulak Penguji?”

 Kebuah irau: Nuan engka ngelala bala nembiak ke udah pindah jauh ari diri sebilik enggau bala kaban, ngambika ulih ngereja mayuh agi ke Jehovah. Nuan irau, orang bukai engka ngarapka utai ti sama ari nuan.

 “Orang Kristian ke udah dibaptisa, layak ngereja mayuh agi ke Jehovah. Tang sekeda orang bedau besedia deka ngemansangka pengawa sida ngagai Jehovah, tauka bisi kebuah ke nagang sida empai ulih ngereja nya.”—Marie.

 Ayat kunchi: “Genap iku orang patut meresa pengawa diri, lalu enggau nya, iya deka gaga ati ketegal utai ti udah digaga iya, ukai ketegal iya mandingka diri enggau orang bukai.”—Galatia 6:4, NWT.

 Pikirka: Ari ke mandingka diri empu enggau orang bukai, perundingka Mark 12:30 ti madah: ‘Kita enda tau enda rinduka Jehovah Petara kita, enggau pengabis ati kita.’

 Peratika, nuan patut gawa ngagai Jehovah enggau pengabis ati. Enti nuan amat rinduka Jehovah, nuan deka gawa ke Iya enggau naka ulih nuan.

 “Taja pan baptisa nya pemutus ti besai, tang nya ukai ma ti berat. Enti nuan milih kaban ti betul, sida ulih nulung nuan. Iya ke amat, enti nuan deka megai tanggungjawap enggau beringkat, nuan deka gaga ati. Enti nuan nyeliahka diri ari dibaptisa, nuan ngerugika diri empu.”—Julia.

 Nyadika simpul: Beterima kasih meh ngagai pengerindu ke udah diayanka Jehovah ngagai nuan. Enggau chara nya, nuan teperansang meri utai ti pemadu manah, ke ulih diberi nuan ngagai Jehovah.—1 John 4:19.

 Begunaka mayuh agi bantu? Peda “Kati Aku Orang ke Betanggungjawap?”

 Kebuah irau: Mensia amat mit sereta enda penting enti dibandingka enggau Jehovah, Pemerintah Alam Semesta ti Pemadu Bekuasa. Nyadi, nuan engka berunding, sekalika Jehovah nemu nuan bisi tauka enda.

 “Apai indai aku Saksi-Saksi Jehovah, nyadi aku irau aku semina murih sida lebuh bepangan enggau Jehovah, lalu ngumbai ukai Jehovah empu ke mai aku datai semak Iya.”—Natalie.

 Ayat kunchi: ‘Nadai orang ulih datai ngagai aku enti Apai ke udah ngirumka aku, enda ngasuh iya.’—John 6:44.

 Pikirka: Lebuh nuan berundingka pemutus deka dibaptisa, tu engka nunjukka Jehovah benung ngiring nuan ngagai Iya sereta deka ngerapatka kaul enggau nuan. Kati nuan deka nerima kangau tu?

 Kingatka, Jehovah ke nentuka standard sapa ke diiring ngagai Iya, ukai nuan tauka orang bukai. Nambahka nya, jaku Iya ngasuh nuan andal, enti nuan ‘datai semak ngagai Petara . . . Iya deka datai semak ngagai nuan.’—James 4:8.

 “Kingatka, lebuh nuan ngelala Jehovah sereta diiring ngagai Iya, tu bukti Iya rinduka nuan. Nyadi enti nuan ngasaika diri enda layak nyembah Jehovah, ingat meh, tu ukai runding Jehovah pasal nuan.”—Selina.

 Nyadika simpul: Nuan layak nyembah Jehovah enti nuan nitihka syarat Bup Kudus pasal baptisa. Nambahka nya, Jehovah endang bisi hak nerima sembah ari nuan.—Pemandang 4:11.

 Begunaka mayuh agi bantu? Peda “Nama Kebuah Aku Patut Besampi?”