Kenyau ari mit, anak nuan engka beratika sekeda orang ngelayan orang bukai enggau chara ti bebida nitihka warna kulit tauka penatai menua iya. Baka ni nuan ulih nulung anak nuan ngambika enda nitihka runding ke baka tu? Nama utai ulih digaga nuan enti anak nuan dilayan enggau enda manah ketegal iya bebansa bukai?

Ba artikel tu

•  Chara berandau enggau anak pasal mayuh macham kaum

•  Chara nerangka laya entara kaum ngagai bala anak

•  Chara nyadi teladan

•  Enti anak nuan nyadi mansa prasangka kaum

 Utai ke ulih diterangka nuan. Ba serata dunya, bisi mayuh macham adat enggau gamal. Bida tu ngasuh sekeda orang ngelayan orang bukai enggau enda manah nitihka gamal tauka ulah sida.

 Tang Bup Kudus ngajar, semua mensia bisi aki ini ti sama. Pandakka jaku, semua kitai diri menyadi.

 “Kami ulih meda, lebuh bala anak kami begulai enggau orang ari mayuh macham chara pengidup, sida ulih meda kediri empu tiap iku orang patut dilayan enggau pengerindu sereta basa.”—Karen.

 Enda ngira diatu tauka ila, anak nuan deka ninga berita pasal utai ke enda lurus sereta jenayah ketegal pemenchi ngagai kaum bukai. Baka ni nuan ulih nerangka utai ke nyadi? Nuan ulih nerangka enggau chara ti bebida bepanggai ngagai umur anak nuan.

•   Umur 3-5 taun. “Anang ngumbai anak mit enda nemu utai ke lurus enggau utai ke enda lurus. Tu muka peluang ti manah berandau pasal utai ti enda lurus,” ku Dr. Allison Briscoe-Smith, ke diambi ari majalah Parents.

•   Umur 6-12 taun. Anak mit ke beumur entara 6 ngagai 12 taun endang balat bisi asai ati ti deka nemu. Kekadang sida nanya tanya ti tusah deka disaut. Naka ulih meh nyaut tanya sida. Berandau enggau anak pasal utai ke dipeda sida ba sekula enggau media sosial. Tu meh peluang nuan nerangka, prasangka ngagai kaum bukai nya salah.

•   Umur 13-19 taun. Nembiak ba umur ti baka tu ulih faham isu ke tusah agi. Nyadi, tu peluang ti manah ke nuan berandauka berita pasal prasangka ngagai kaum bukai.

 “Kami berandau enggau anak pasal laya entara kaum, laban enda ngira diatu tauka ila sida deka napi nya, ba barang alai sida diau. Enti enda, sida engka berengkah berunding baka orang bukai ke ngembuan runding ti salah. Orang ulih meri mayuh penerang ti bula ngagai bala anak kami lalu ngumbai nya betul.”—Tanya.

 Bala anak belajar ari teladan. Nyadi, amat penting ke apai indai berunding enggau manah pasal jaku sereta ulah diri empu. Chunto iya:

•   Kati nuan betundi pasal orang ari bansa bukai tauka ngemelika sida? “Bala anak nuan meda ulah enggau ninga jaku nuan. Automatik sida deka nitihka teladan nuan, ku Akademi Psikiatri Kanak-Kanak dan Remaja Amerika Syarikat.

•   Kati nuan rindu begulai enggau orang ari menua bukai? Siku lutur anak mit, Alanna Nzoma madahka, “Enti nuan deka anak nuan ngembuan kaul ti [manah] enggau orang ari mayuh macham chara pengidup, sida mega patut meda nuan ngereja utai ti sama.”

 “Pengelama betaun-taun, kami sebilik ngelayan temuai ke datai ari serata dunya. Kami belajar pasal pemakai sereta musik sida, indah ngena gari asal sida. Lebuh berandau enggau bala anak pasal orang bukai, kami enda fokus ngagai bansa sida. Kami mega enda kelalu temegahka adat diri empu.”—Katarina.

 Taja pan mayuh orang madah patut dilayan enggau sama rata, tang laya entara kaum agi balat nyadi. Tu reti iya, anak nuan engka dilayan enggau enda manah kelebih agi enti iya dikumbai sebagi ari raban bansa ti lain ari orang bukai.

 Pansik. Kati orang nya sengaja tauka iya bejaku enggau enda berunding? (James 3:2) Kati orang nya patut betanggungjawap ke ulah iya? Tauka, ulihka utai ke nyadi nya enda dikingatka agi?

 Reti iya, nuan patut nemu berunding. Bup Kudus meri lalau ti manah tu, “Anang lengkar.” (Pengajar 7:9) Anang ngumbai laya entara kaum nya enda penting. Tang, tu ukai reti iya enti tiap kali nuan ngasaika sesiku orang bejai tauka ngelayan nuan enggau enda lurus, tu ketegal iya begedika bansa nuan.

 Endang amat, tiap situasi enda sebaka. Nya alai, pansik dulu utai ke amat-amat nyadi sebedau nuan ngaga pemutus ngereja sesiti utai.

 Pengudah bulih pansik, tanya diri empu:

•   ‘Enti anak aku ngumbai semua orang salah sangka ngagai iya, kati utai tu meri penguntung ngagai iya?’

•   ‘Kati anak aku bulih penguntung enti nitihka lalau Bup Kudus tu, “Anang ibuhka semua utai ti disebut orang.”’—Pengajar 7:21.

 Baka ni enti orang nya baka ke sengaja? Tulung anak nuan sedar, situasi ulih nyadi manah agi tauka jai bepanggai ba reaksi iya. Kekadang, sesiku orang ngemeli, buli, tauka bejai orang bukai ketegal deka meda reaksi iya. Ba situasi ke baka tu, engka manah agi enda ngayanka reaksi.

 Tang enti nya selamat, manah agi enti anak nuan ulih berandau enggau orang ke membuli iya. Engka anak nuan ulih madahka enggau chara ti tenang, “Asai aku, utai ke disebut nuan tauka ulah tu enda manah.”

 Baka ni enti nuan deka ngeriput utai ke nyadi tu? Enti situasi nya bahaya ke anak nuan, tauka nuan ngasaika utai tu enda patut dilakka aja, berandau meh enggau piak sekula tauka indah ngagai piak polis enti nya patut.