•  Utai ke patut ditemu nuan

•  Utai ke ulih digaga nuan

•  Runding bala apai indai

 Bisi sekeda anak ngembuan kaul ti rapat enggau apai indai sida, lalu deka ningaka penemu ari apai indai. Taja pia, bisi mega bala anak deka ngiga tauka minta penemu ari orang ke serambau sida.

 Enti anak senang agi minta penemu ari orang ke serambau, sida tusah deka bebasaka lalau ari apai indai. Nambahka nya, bisi sekeda apai indai ngasaika diri nadai tanggung pengawa agi ngagai anak ke mansang besai. Tu ketegal anak sida mayuh agi awak begulai enggau nembiak bukai. Sida baka ke dibesaika nembiak bukai tang ukai apai indai sida empu.

 Nama kebuah bala anak ngasaika diri senang agi rapat enggau orang ke serambau, ari apai indai sida empu? Perundingka sekeda kebuah tu.

•   Sekula. Enti bala anak mayuh agi awak begulai enggau bala kaban iya ba sekula, sida berengkah rapat enggau pangan diri, sereta senang agi nerima penemu orang ke serambau ari apai indai. Ulah sida tu majak nyadi maya sida mansang besai.

•   Enda mayuh awak begulai. Mayuh ruang bilik, apai indai sida sama bela kereja. Nya kebuah, mayuh ari anak sida berasai sunyi ba rumah maya sida pulai ari sekula.

•   Jeman nembiak. Maya bala anak mansang ngagai jeman nembiak, sida senang ningaka jaku orang ke serambau pasal chara begari, chara bejaku, sereta ulah. Sida beberatka runding orang ke serambau ari apai indai.

•   Iklan. Ba dunya kemayaharitu, mayuh utai sereta mayuh bengkah pemerindang endang sigi kena narit ati bala nembiak aja. Ketegal tu, runding bala anak sereta apai indai tusah deka sejalai. Nitihka ku seiku Doktor Robert Epstein, “Pengawa dagang ke bejuta dolar deka bankrap enti nadai orang nembiak.” a

•   Jaga kaul ti rapat enggau anak nuan.

   Bup Kudus madah: “Kingatka pesan ti diberi aku ngagai kita sehari tu. Ajar pesan nya ngagai anak kita. Kita enda tau enda betanduka pesan nya lebuh kita di rumah, enggau lebuh kita bejalai kebukai, lebuh kita belelak, enggau lebuh kita gawa”—Ulang Adat 6:6, 7.

   Taja pan orang ke serambau ulih nyadi kaban anak nuan, ukai reti iya sida patut ngambi tanggungjawap nuan ke nyadi apai indai. Nitihka pansik, mayuh ari bala anak mit sereta nembiak bebasaka apai indai sereta deka ngagaka ati sida. Nya kebuah, anang meh ngalahka diri. Enti nuan enggau naka ulih nyaga kaul ti rapat enggau bala anak, anak nuan deka agi nitihka nuan ari ke nitihka orang serambau sida.

   “Nuan patut begulai enggau anak nuan maya ngereja sesiti pengawa baka bepandukka pemakai, meresi, tauka nulung sida ngaga kereja sekula. Gaga meh utai ti ngagaka ati baka main game, meda TV tauka wayang. Anang ngumbai chukup mimit aja awak begulai enggau bala anak, lalu ngumbai ‘nya aja awak ti amat berega.’ Kingatka, ka iya nama digaga nuan, enti enda chukup awak diberi nuan ngagai anak, nya nadai guna.”—Lorraine.

•   Tentuka anak nuan ukai semina begulai enggau ke serambau aja.

   Bup Kudus madah: “Anak mit endang selalu ngereja utai ti beli.”—Jaku Dalam 22:15.

   Sekeda apai indai gaga meda anak sida mayuh kaban. Taja anak nuan endang patut ngembuan kaban ke serambau, taja pia sida mega begunaka kaban ba mayuh bengkah umur, ngambi iya bulih mayuh agi penemu. Orang ke serambau enda ulih ngiring anak nuan sama baka apai indai ti bisi pengerindu.

   Kaban ke serambau enggau anak nuan engka pintar, taja pia iya tetap nadai peneleba ba pengidup, bedau kala ngasai mayuh utai, sereta penemu kena nulung orang ke serambau ti bukai. Enti bala anak bisi iring ari apai indai, sida ulih mansang besai sereta bisi penemu ti ngena enggau umur sida.”—Nadia.

•   Bejimat meri iring.

   Bup Kudus madah: Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida.—Jaku Dalam 13:20.

   Bala anak deka bulih penguntung enti nuan selalu begulai enggau sida, taja pan sida mansang besai. Nya alai, nyadi meh teladan ti manah ke sida.

   “Apai indai teladan ti pemadu beguna ke bala anak. Enti bala anak diajar nemu beterima kasih sereta bebasaka apai indai, maya sida mansang besai, sida mega deka ngayanka ulah ti sama dudi hari.”—Katherine.