“Enda ulih ku ngereja tu!” ku sabak anak nuan. “Pedis mat! Tusah aku ka belajarka tu!” Iya jampat deka putus asa lebuh iya ngasaika nya tusah. Nuan enggai meda anak nuan tusah, tang nuan dekaka iya belajar baka ni mutarka penanggul. Kati nuan patut nulung iya tekala nya? Kati nuan patut nejuka iya putus asa aja? Tauka baka ni nuan ngajar anak nuan ngambika berusaha?

 Usaha nya penting. Lebuh apai indai ngajar anak sida ngemansangka pengelandik sida nengah pengawa ti bagas, anak nya deka ngereja manah agi ba sekula, gaga agi ati sereta bepengerai, lalu bisi kaul ti manah enggau orang bukai. Tang, enti apai indai enda ngemendarka anak sida ngasaika penusah sereta enggai meda sida enda mujur, anak nya senang agi nyadi tusah ati, ngumbai diri enda pandai, lalu kurang puas ati enggau diri empu maya sida udah besai.

 Usaha nya ulih ditegapka agi. Indah anak ke agi mit pan ulih ngeringka pengeran sida nguji ngereja utai ti tusah lalu mutarka penanggul. Nitihka siti pansik, anak mit ke beumur 15 bulan, deka berusaha ngereja utai ti tusah lebuh sida meda apai indai ngereja utai ti tusah, ari ke meda apai indai ngereja pengawa nya enggau senang.

 “Aku agi ingat, maya aku ngajar dua iku anak indu aku ngikat tali kasut sida. Tu ukai pengawa ke ulih dipelajarka nuan dalam sehari aja. Tiap kali sida deka ngikat tali kasut, sida patut duduk dia pengelama 10 ngagai 15 minit, kena ngingatka utai ke patut digaga. Udah nya baru aku nulung sida. Tu begunaka beberapa bulan alai belajar, lalu ketegal sida tusah ngereja nya sida pan kala nyabak. Tang pengujung sida mujur. Aku ulih ngenyenangka pengidup aku, enti aku melika sida kasut ke enda betali. Tang kekadang, sebagai apai indai, kitai pan patut berusaha seraya kitai ngajar anak kitai berusaha.”—Colleen.

 Usaha ulih nyadi lemi. Sekeda apai indai enda sengaja ngelemika usaha ke digaga anak sida. Baka ni? Ketegal sida dekaka anak sida berasai beguna, sekeda apai indai engka berumban “nulung” anak sida ngambika sida enda tusah ati tauka ngasaika diri enda pandai. Tang tu ukai chara ti manah. Siku penulis ke benama Jessica Lahey madah, “Tiap kali kami nulung . . . anak kami ari napi penguji, kami baka ke madah ngagai anak kami, kami enda pechaya tauka andal ke iya ulih ngereja nya.” a Nama asil iya? Bala anak deka jampat putus asa lebuh sida bisi penanggul dudi hari, laban sida ngasaika sida begunaka orang ke besai tuai nulung sida.

 Meransang iya bebendar gawa. Apai indai ulih ngajar anak sida berusaha lebuh meri sida pengawa ke ngena enggau umur anak sida. Ngambika chunto, anak ke beumur entara tiga ngagai lima taun ulih diasuh nusun gari nitihka ripih enggau nyimpan ayam sida. Pia mega, anak mit ke besai agi ulih diasuh nulung nusun barang-barang dapur ke baru dibeli, nyediaka mija makai, muai sampah, sereta ngelap utai kamah ke mimit. Bala nembiak ulih diasuh ngereja pengawa ke tusah mimit baka meresi enggau ngerepair. Anak enda selalu iya rindu ngaga pengawa ke diberi, tang sida bulih penguntung lebuh sida betanggungjawap nulung apai indai ngereja pengawa ba rumah kenyau ari sida biak. Baka ni bala anak bulih penguntung? Sida belajar bebendar gawa, sereta enda jampat putus asa lebuh sida bisi penanggul ba kereja sida maya sida dewasa ila.

 Prinsip Bup Kudus: “Enti nuan gawa, nuan deka bulih pengidup [penguntung].”—Jaku-Dalam 14:23.

 “Anang mansau jam meri anak pengawa ke semina ngasuh sida kisuk. Nadai sapa-sapa indah anak mit pan enda rinduka tu. Beri sida pengawa ke bisi tuju. Enti anak nuan betubuh mit, asuh iya ngelap debu ke ulih dijapai iya. Enti nuan nuchi kerita, asuh iya nuchi ba begian ke tusah dituchi nuan. Udah nya, enggau jampat puji meh pengawa ke dikereja anak nuan.”—Chris.

 Iring anak nuan lebuh iya ngereja pengawa ti tusah. Kekadang, anak jampat putus asa laban iya enda nemu baka ni chara nembuka pengawa nya. Nya alai, lebuh nuan ngajar anak nuan pengelandik ti baru, uji meh chara tu. Keterubah, kereja meh pengawa nya seraya anak nuan ngemataka nuan. Kedua, kereja nya begulai. Ketiga, peratika anak nuan ngereja pengawa nya, lalu padahka ngagai iya chara ke ulih nulung iya ngereja pengawa nya enggau manah agi. Ke penudi, asuh anak nuan nembuka pengawa nya kediri empu.

 Prinsip Bup Kudus: “Aku udah netapka teladan ke kita, kita mega patut ngereja utai ke udah dikereja aku ngagai kita.”—John 13:15.

 “Ari pengalaman aku, sebagai apai indai kitai patut netapka teladan enti kitai dekaka anak kitai berusaha. Kitai patut nunjukka perangai ke dikedekaka kitai ba sida.”—Doug.

 Tulung anak nuan sedar, nya utai ti biasa enti berusaha tang kekadang enda mujur. Padahka ngagai anak nuan pasal utai ke tusah ba nuan tang nuan terus berusaha, lalu bulih penguntung ketegal enda putus asa. Terangka ngagai anak nuan, nya endang pekara biasa bisi penanggul lebuh ngereja utai ti baru lalu ngaga penyilap. Tang penyilap tu ulih ngajar iya. Asuh iya andal, enti iya enda mujur ba sesiti utai, pengerindu nuan ke iya tetap enda kurang. Baka buah isi ke majak kering ketegal ngereja mayuh pengawa, pengelandik anak nuan mega majak mansang enti nuan nejuka iya berusaha napi penanggul. Nya alai, lebuh anak nuan napi penanggul, ari ke terus nulung iya, beri meh iya awak terus berusaha taja pan iya tusah napi nya. Baka ke ditulis ba bup How Children Succeed, “Ngambika ulih nyadi kering sereta matang, sida ke biak patut nguji utai ke baka ke enda ulih dikereja sida.”

 Prinsip Bup Kudus: “Manah kitai belajar liat ati lebuh kitai agi biak.”—Sabak Kenang 3:27.

 “Lebuh nuan nejuka anak nuan terus nguji sesiti utai taja pan nya tusah, lalu nemu apai enggau indai bisi semak sida lalu sedia nulung, bala anak deka bulih penguntung. Nyau kelama, utai ke tusah nya deka nadai agi, lalu sida bulih pengelandik sereta yakin diri lalu usaha sida enda lebu.”—Jordan.

 Puji usaha, ukai pemandai. Ngambika chunto, ari ke nyebut, “Manah markah ujian nuan! Nuan amat pandai!”, nuan engka ulih madah, “Manah markah ujian nuan! Aku amat alit ati meda usaha nuan belajar.” Nama kebuah muji usaha nya penting agi ari pemandai? Munyi ku Dr. Carol Dweck, muji pemandai bala anak “ngasuh sida kakang ati pasal diri empu seraya sida napi utai ti tusah tauka utai ke enda ulih dikereja sida.” Ku iya nyambung baru, “Enti apai indai deka meri anak sida hadiah, utai ke pemadu manah ti ulih diberi sida nya, ajar anak sida rinduka cabaran, belajar ari penyilap, rindu berusaha, nguji ngiga chara bukai, lalu terus belajar. Enggau chara nya, anak sida enda dikuasa jaku puji aja.” b

 Prinsip Bup Kudus: “Sesiku orang dipuji nitihka ulah iya ngagai jaku puji ke diterima iya.”—Jaku-Dalam 27:21, NWT.