Bup Kudus nadai madahka haribulan Jesus ada, tauka pasal kitai ke patut ngintu hari pengada iya. Bup pansik McClintock and Strong’s Cyclopedia madahka: “Petara nadai madah kitai patut ngintu hari Krismas, lalu Krismas nadai disebut dalam Sempekat Baru.”

 Iya ke amat, enti mansik pasal sejarah Krismas, kitai ulih meda nya bepun ari pengarap pelesu jeman kelia. Bup Kudus ngajar, enti kitai nguji deka nyembah Iya enggau chara ke enda diterima Iya, kitai ngemediska ati Iya.—Pemansut 32:5-7.

1.   Nyambut hari pengada Jesus: “Orang Kristian dulu suba enda nyambut hari pengada [Jesus] laban sida ngumbai, pengawa ngintu hari pengada orang nya bepun ari pengarap pelesu.”—The World Book Encyclopedia.

2.   25 Disember: Nadai bukti nunjukka Jesus ada ba haribulan nya. Bala tuai gerija engka milih haribulan tu nyadika hari Krismas laban nya meh haribulan ke endang udah dikena orang pengarap pelesu kelia ngintu pengerami ke dikumbai solstis kena musin chelap, iya nya maya mata panas enda tampak sereta amat chelap.

3.   Betukar hadiah, makai besai enggau berami: Bup The Encyclopedia Americana madahka: “Mayuh adat Krismas diambi ari pengerami Saturnalia, siti pengerami alai orang Rome makai besai ba tengah bulan Disember. Ambika chunto, adat pasal begulai makai besai, betukar hadiah enggau nunu lilin bepun ari pengerami nya.” Bup Encyclopædia Britannica madahka “semua bisnis tutup lalu semua orang chuti” maya pengerami tu.

4.   Lampu Krismas: Nitihka bup The Encyclopedia of Religion, orang ba Eropah ngias rumah sida “ngena lampu sereta bemacham-macham daun ijau” kena ngintu solstis musin chelap sereta kena muru antu.

5.   Daun mistletoe enggau holly: “Orang Druid ngumbai daun mistletoe bisi kuasa magik. Daun holly ke mengkang ijau indah maya musin chelap dikumbai sida siti jamin pasal musin angat deka pulai baru, lalu nyembah nya.”—The Encyclopedia Americana.

6.   Pun Kayu Krismas: “Orang Eropah ke megai pengarap lama suah nyembah pun kayu, lalu adat tu agi dipegai sida pengudah sida nyadi orang Kristian.” Siti chara sembah ngagai pun kayu terus diintu orang, iya nya enggau “ngengkahka pun kayu ba penama rumah sida, tauka dalam rumah sida maya pengerami musin chelap.”​—Encyclopædia Britannica.