Nitihka bup ke penudi dalam Bup Kudus, 666 nya nama siku jelu ti mangah ke pansut ari tasik. Jelu ti mangah nya bisi sepuluh iti tanduk enggau tujuh iti pala. (Pemandang 13:1, 17, 18) Jelu nya ngambarka politik dunya ke merintah “semua raban bansa, menua, jaku, enggau bansa.” (Pemandang 13:7) Nama 666 tu nunjukka, politik ba dunya tu nadai pemujur ba mata Petara. Nama kebuah?

  Ukai semina nama. Nama ke diberi Petara bisi reti iya empu. Ngambika chunto, jeman kelia, Petara ngubah nama seiku lelaki ari Abram nyadi Abraham. Abram reti iya, “Apai ti Dikemesaika.” Abraham mai reti, “Apai ke Mayuh Orang.” Petara ngubah nama Abraham laban Iya udah besemaya, Abraham deka nyadi “apai mayuh bengkah bansa.” (Pemungkal 17:5) Pia mega, Petara meri jelu mangah nya nama 666, laban nama nya ngambarka ulah jelu nya.

  Lumur enam mai reti ti enda sempurna. Dalam Bup Kudus, lumur dikena ngambarka sesiti tanda. Kesuah iya, lumur tujuh ngambarka utai ti sempurna. Lumur enam kurang ari tujuh, nya alai ulih dikena ngambarka utai ti enda sempurna sereta bisi penimpang ba mata Petara. Lumur enam mega bisi kaul enggau bala munsuh Petara,—1 Bansa Israel 20:6; Daniel 3:1.

  Tiga kali disebut kena nerangka nya enggau nyemetak. Kekadang, dalam Bup Kudus, enti sesiti utai deka diterangka enggau nyemetak, iya deka disebut tiga kali. (Pemandang 4:8; 8:13) Nya alai, nama 666 amat diterangka Petara enggau nyemetak. Iya nya, politik ba dunya tu endang nadai pemujur. Mensia enda ulih mai pemaik sereta pengelikun ti tan belama iya. Semina Perintah Petara aja ulih mutarka semua penanggul nya.

Tanda jelu ti mangah

 Bup Kudus madahka, “orang ke bisi kelai jelu” deka rinduka jelu nya, lalu nyembah iya. (Pemandang 13:3, 4; 16:2) Sida ngereja nya enggau chara kelalu temegahka menua diri, tanda-tanda menua, sereta pengering bala soldadu sida. Baka ke dipadahka ba The Encyclopedia of Religion, “Semengat politik baka siti pengarap ti amat kering ke ulih nyungkak dunya ke penuh enggau pemansang kemayaharitu.” a

 Nama reti iya, maya bisi orang nerima tanda tu ba jari kanan tauka ba kening sida? (Pemandang 13:16) Petara kala ngasuh orang Israel, “tanchangka sida ba lengan kita. Lekatka sida ba kening kita kena ngingatka sida.” (Ulang Adat 11:18) Tang tu ukai reti iya, orang Israel patut nandaka lengan tauka kening sida enggau ngengerang. Reti ba ditu, sida patut ngemendarka pesan Petara ngiring semua pengawa tauka ulah sida. Sama mega, orang ke nerima tanda jelu ti mangah nya, enda ibuh ngengerang nanda tubuh iya enggau lumur 666. Tang enti ulah iya nunjukka iya nyukung politik dunya, sereta nejuka dunya tu nguasa pengidup iya. Tu udah chukup nyadika tanda, iya munsuh Petara.—Pemandang 14:9, 10; 19:19-21.