Petara milih sekeda orang Kristian ke tetap ati niki ke serega. Pengudah sida mati, sida deka diangkatka idup ba serega. (1 Peter 1:3, 4) Pengudah sida dipilih, sida patut idup nitihka ajar sereta standard Petara. Enggau chara nya, peluang sida niki ke serega deka mengkang belama iya.—Epesus 5:5; Pilipi 3:12-14.

Nama pengawa sida ke niki ngagai serega?

 Sida deka merintah begulai enggau Kristus nyadi raja sereta imam pengelama 1,000 taun. (Pemandang 5:9, 10; 20:6) Sida deka numbuhka siti perintah ba serega. Perintah tu deka merintah “dunya baru” iya nya semua mensia. Sida ke merintah ba serega deka nulung mensia nyadi sempurna, laban nya meh tuju asal Petara.—Isaiah 65:17; 2 Peter 3:13.

Berapa penyampau orang ke diangkatka idup ba serega?

 Bup Kudus madahka, bisi 144,000 iku orang deka diangkatka idup ba serega. (Pemandang 7:4) Ba Pemandang 14:1-3, rasul John meda genera “Anak Bedus bediri ba Bukit Sion enggau 144,000 iku orang.” “Anak Bedus” nya ngambarka Jesus ti udah diangkatka idup baru. (John 1:29; 1 Peter 1:19) Lalu “Bukit Sion” ngambarka penuduk ti tinggi ke enggi Jesus enggau 144,000 iku orang ke merintah enggau iya ba serega.—Masmur 2:6; Hebrew 12:22.

 Sida tu “orang ke dikangau enggau ke dipilih Petara,” pia mega dikumbai “raban ti mit.” (Pemandang 17:14; Luke 12:32) Tu nunjukka, penyampau orang ke dipilih ngagai serega semina mimit aja enti dibandingka enggau bedus Jesus ke bukai.—John 10:16.

Penemu ti salah pasal orang ke niki ngagai serega

 Penemu ti salah: Penyampau 144,000 ke disebut ba bup Pemandang nya semina tanda aja, ukai amat-amat.

 Iya ke amat: Taja pan ba bup Pemandang ngembuan mayuh penyampau kena ngambarka sesiti utai aja, tang sekeda ari penyampau ba bup nya ukai tanda aja, tang amat-amat penyampau ke udah ditetapka. Chunto iya, bup Pemandang bisi nyebut pasal “12 iti nama, iya nya nama 12 iku rasul Anak Bedus.” (Pemandang 21:14) Peratika sekeda bukti ke nunjukka penyampau 144,000 nya ukai semina tanda, tang amat-amat.

 Ba Pemandang 7:4 madahka, “Aku ninga bisi 144,000 iku orang [tauka sida ke niki ngagai serega] ke udah dichop.” Pia mega, ba bagi ti sama bisi nyebut pasal raban kedua, iya nya “seraban orang ti mayuh nyentukka enda alah diitung sapa-sapa.” Sida ke nyadi sebagi ari ‘raban orang ti mayuh’ tu mega deka diselamatka Petara. (Pemandang 7:9, 10) Enti penyampau 144,000 tu semina tanda aja tauka semina deka nunjukka sesiti raban ba sesiti penyampau aja, nyadi nadai guna mandingka dua iti penyampau tu. a

 Kelimpah ari nya, Bup Kudus madahka 144,000 iku orang nya “dibeli ari bala mensia nyadi buah ti keterubah.” (Pemandang 14:4) Leka jaku “buah ti keterubah” nunjukka penyampau ti mit orang ke dipilih. Ari tu kitai nemu, orang ke enggau Jesus merintah ba serega deka merintah amat mayuh mensia ba dunya, nyentukka penyampau sida enda ulih diitung.—Pemandang 5:10.