Sekeda agama ngumbai Mikael nya “Saint Mikael.” Reti nya, Mikael tu nama ke diberi ngagai Jesus sebedau iya datai ke dunya enggau pengudah iya niki ke serega. a Mikael mega kala bekelikuh enggau Sitan pengudah Moses mati. Iya mega kala nulung seiku melikat madahka pesan Petara ngagai nabi Daniel. (Daniel 10:13, 21; Jude 9) Ketegal iya ngetanka Perintah Petara lalu ngelaban bala munsuh Petara, Mikael idup sejalai baka reti nama iya, iya nya “Sapa baka Petara?”—Daniel 12:1; Pemandang 12:7.

 Nama kebuah kitai tau nyimpulka Jesus nya Tuai Melikat ke benama Mikael? Peda meh sekeda saut tu.

•   Mikael nya “tuai melikat.” (Jude 9) Gelar “tuai melikat” mina dua kali aja ayan ba Bup Kudus. Gelar tu ukai mai reti mayuh, tang semina dituju ngagai seiku melikat. Siti ari ayat Bup Kudus ke madah, Tuan Jesus udah diangkatka idup baru “nurun ari serega enggau nyawa ti inggar, enggau nyawa tuai melikat.” (1 Tesalonika 4:16) Ayat tu nyebut, Jesus “enggau nyawa tuai melikat” laban iya empu meh ke tuai melikat nya, Mikael.

•   Mikael ngiring semua melikat ke bukai. Dalam Bup Kudus madahka, “Mikael enggau bala melikat iya beperang ngelaban naga nya,” iya nya Sitan. (Pemandang 12:7) Tu nunjukka, Mikael nya bisi kuasa ti besai. Bup Kudus pan ngumbai iya “tuai melikat.” (Daniel 10:13, 21; 12:1) Munyi ku seiku pakar Bup Kudus, David E.Aune, gelar tu nunjukka Mikael nya tuai tauka panglima bala soldadu di serega.

   Kelimpah ari Mikael, dalam Bup Kudus mega nyebut siti agi nama orang ke bekuasa ngagai soldadu ba serega. Bup Kudus nyebut, ‘Tuan Jesus nurun ari serega enggau bala melikat iya ti bekuasa dalam daun api ti mau, ngukum orang.’ (2 Tesalonika 1:7, 8; Matthew 16:27) Nambahka nya, lebuh Jesus niki ke serega, “semua melikat, semua perintah enggau semua kuasa” ngasika iya. (1 Peter 3:21, 22) Ketegal Petara udah milih Jesus nyadi tuai melikat, Iya tentu enda ngiga seiku da agi tuai melikat ke benama Mikael. Nya alai, kitai ulih nyimpulka, kedua-dua nama tu iya nya Jesus enggau Mikael, dituju ngagai orang ti sama.

•   Mikael deka “pegari” maya “penusah ti besai” nyadi. (Daniel 12:1) Ba bup Daniel, bisi jaku “deka pegari” suah dipeda kena nerangka, siku raja deka pegari ngereja sesiti pengawa. (Daniel 11:2-4, 21) Jesus Kristus, ke mega dikumbai ‘Jaku Petara’ deka nyadi “Raja ke semua raja.” Iya deka ngerusak semua munsuh Petara lalu nyaga nembiak Petara. (Pemandang 19:11-16) Iya deka ngereja tu ba maya “penusah ti besai . . . ti nadai udah kala nyadi kenyau ari penumbuh dunya.”—Matthew 24:21, 42.