Tanya pasal tuju pengidup bisi mayuh bengkah, ambika chunto, Nama kebuah kitai bisi ditu? tauka Kati pengidup aku bisi tuju? Bup Kudus nunjukka tuju pengidup kitai iya nya ngembuan kaul enggau Petara. Peratika sekeda batang pemendar ke bisi ba Bup Kudus.

•   Petara nya Penempa kitai. Bup Kudus madahka: “[Petara] ngaga kitai, lalu kitai endang enggi Iya.”​—Masmur 100:3; Pemandang 4:11.

•   Petara bisi tuju ke tiap iti utai ti ditempa Iya, nyengkaum kitai.​—Isaiah 45:18.

•   Petara nempa kitai ngambika kitai begunaka iring ari Iya, lalu tu nyengkaum pengingin deka nemu tuju pengidup. (Matthew 5:3) Iya deka nulung kitai ba pekara tu.​—Masmur 145:16.

•   Kitai deka bulih iring ari Petara enggau ngemansangka kaul enggau Iya. Sekeda orang engka ngumbai diri tusah deka nyadi pangan Petara, tang Bup Kudus meri kitai jaku peransang tu: ‘Datai semak ngagai Petara, lalu Iya deka datai semak ngagai kita.’​—James 4:8; 2:23.

•   Ngambika ulih nyadi pangan Petara, kitai enda tau enda idup sejalai enggau tuju Iya ke kitai. Bup Kudus nyebut pasal tuju tu ba Pengajar 12:13: ‘Nangika Petara, lalu ngasika pesan Iya, laban nya endang kebuah kitai mensia digaga.’

•   Jemah ila, kitai amat ulih ngasaika tuju asal Petara ke kitai lebuh Iya muai pemerinsa lalu meri pengidup ti meruan belama iya ngagai bala pangan Iya, iya nya orang ke nyembah Iya.​—Masmur 37:10, 11.