2 Raja 4:1-44
4 Bisi sekali, siku ari bala nabi* udah nadai. Nyadi, balu iya datai ngagai Elisa lalu madahka: “Tuan, laki aku udah nadai. Nuan empu nemu iya orang ke seruran nangika Jehovah. Tang, orang ke nyali duit ngagai laki aku udah datai, laban deka ngambi dua iku anak aku nyadika ulun iya.”
2 Elisa lalu nanya iya: “Nama utai ke ulih digaga aku ke nuan? Padahka meh ngagai aku, nama utai ke bisi ba rumah nuan?” Balu nya pan nyaut: “Nadai utai ba rumah aku. Aku semina bisi sebutul minyak aja.”
3 Udah nya, Elisa madahka: “Alai nuan minta sarang ti kusung ari semua jiran nuan. Pinta mayuh ka agi au.
4 Udah nya, nuan enggau anak lelaki nuan mesti tama ke rumah lalu nutup pintu. Isika minyak ngagai semua sarang ti kusung nya, lalu engkah ke tisi sarang ke udah penuh.”
5 Balu nya pan mupuk.
Pengudah iya enggau bala anak lelaki iya tama ke rumah, sida pan nutup pintu. Bala anak iya meri sarang ti kusung nya ngagai iya, lalu iya pan ngisi semua sarang nya.
6 Lebuh sarang nya penuh, iya madah ngagai siku ari anak iya: “Bai siti da agi sarang ngagai aku kitu.” Tang, anak iya nyaut iya: “Nadai agi sarang ti kusung.” Maya nya, minyak pan ngetu mengalir.
7 Balu nya pan madah utai ke nyadi ngagai Elisa, lalu nembiak Petara ti bendar nya madahka: “Jual minyak nya ngambika nuan ulih mayar utang nuan. Laluh duit nya ulih dikena nuan enggau bala anak nuan beridup.”
8 Bisi sekali, Elisa ngagai Sunem. Ba dia, bisi siku indu ke kaya sereta dikelala mayuh orang. Indu nya bebendar ngasuh Elisa makai ba rumah iya. Nya alai, tiap kali Elisa mansa endur nya, iya tentu deka ngetu lalu makai ba rumah indu nya.
9 Indu nya madah ngagai laki iya: “Aku nemu lelaki ke selalu mansa rumah kitai nya nembiak Petara ti kudus.
10 Aram kitai ngaga siti bilik mit ba perabung, lalu ba dia kitai ngengkahka katil, mija, kerusi, enggau penuduk lampu. Nyadi, tiap kali iya datai kitu, iya ulih diau ba dia.”
11 Bisi sekali, Elisa datai kia. Iya tama ngagai bilik ba perabung, lalu gali ba dia.
12 Udah nya, iya bejaku enggau penulung iya ke benama Gehasi: “Kangauka indu Sunem nya.” Nyadi, Gehasi pan ngangauka indu nya, lalu indu nya datai ngagai Gehasi.
13 Elisa madah ngagai Gehasi: “Padah ngagai indu nya: ‘Kiruh amat nuan laban kami. Nama utai ke ulih digaga aku ke nuan? Kati nuan ka aku bejaku enggau raja tauka ketuai soldadu iya ngarika nuan?’” Ku indu nya nyaut: “Enda ibuh, laban aku diau likun enggau bala aku empu.”
14 Elisa lalu nanya: “Nyadi, nama utai ke ulih digaga aku ke iya deh?” Ku Gehasi nyaut: “Iya nadai anak lelaki, lalu laki iya pan nyau tuai.”
15 Elisa pan terus madah: “Kangauka indu nya.” Nyadi, Gehasi pan ngangauka indu nya, lalu indu nya bediri ba depan pintu.
16 Ku Elisa madahka: “Taun baru, ba maya tu, nuan deka ngadaka siku anak lelaki.” Ku indu nya nyaut: “O tuan, nembiak Petara ti bendar, anang ngemulaka aku.”
17 Pengudah sesiti timpuh, indu nya pan ngandung. Indu nya ngadaka siku anak lelaki, ngam-ngam setaun pengudah Elisa bejaku enggau iya. Utai ke dipadah Elisa ngagai iya amat nyadi.
18 Anak nya pan mansang besai. Bisi sekali, iya mansang ngagai apai iya ke benung begulai enggau orang ke ngetau.
19 Iya majak madah ngagai apai iya: “Pedis, pala aku pedis!” Udah nya, apai iya madah ngagai siku pekereja: “Bai iya ngagai indai iya.”
20 Pekereja nya mai iya ngagai indai iya. Indai iya mangku iya sampai tengahari, lalu iya pan mati.
21 Udah nya, indai iya niki ke atas lalu ngalika iya ba katil nembiak Petara ti bendar. Pengudah nutup pintu, indai iya pan mupuk.
22 Indu nya ngangauka laki iya lalu madahka: “Jampat, asuh siku pekereja mai siku keledai kitu. Aku deka betemu enggau nembiak Petara ti bendar. Udah nya, aku pulai baru.”
23 Tang laki iya nanya: “Nama kebuah nuan deka betemu enggau iya seharitu? Seharitu ukai pengerami bulan baru tauka Hari Sabat.” Ku iya nyaut: “Anang irau. Nadai nama-nama.”
24 Nyadi, iya pan nyediaka keledai iya, lalu madah ngagai pekereja iya: “Jampat mupuk. Anang lubah enti aku enda ngasuh nuan lubah.”
25 Iya mupuk betemu enggau nembiak Petara ti bendar ba Gunung Karmel. Lebuh nembiak Petara ti bendar tepedaka iya ari jauh, iya lalu madah ngagai penulung iya, Gehasi: “Peda nuan nyin! Indu Sunem nya datai.
26 Alai nuan jampat betemu enggau iya, lalu tanya iya: ‘Baka ni gaya nuan, laki nuan, enggau anak nuan?’” Ku indu nya nyaut: “Semua manah magang.”
27 Lebuh iya betemu enggau nembiak Petara ti bendar ba gunung nya, iya lalu megai kaki nembiak Petara nya. Gehasi pan datai deka ngeju iya, tang nembiak Petara ti bendar madahka: “Awakka iya, laban iya balat tusah ati. Tang aku enda nemu nama kebuah, laban Jehovah bedau madahka aku.”
28 Udah nya, indu nya madah: “Aku nadai kala minta anak lelaki ari nuan. Endaka aku udah madah: ‘Anang meri aku harapan pelesu’?”
29 Elisa lalu terus madah ngagai Gehasi: “Tanchangka gari nuan ba punggung nuan lalu bai tungkat aku. Engkahka tungkat aku ba mua nembiak lelaki nya. Enti nuan tetemuka orang ba rantau jalai, anang meri jaku tabi ngagai iya. Lalu enti bisi orang meri jaku tabi ngagai nuan, anang nyaut iya.”
30 Ku indu nya madahka: “Aku besumpah atas nama Jehovah, Petara ti idup, sereta atas nama nuan,* aku enda mupuk enti nuan enda enggau.” Nya alai, Elisa pan nitihka iya.
31 Gehasi mupuk dulu lalu ngengkahka tungkat Elisa ba mua nembiak lelaki nya, tang nadai nama-nama utai ke nyadi. Nya alai, Gehasi nikal baru lalu betemu enggau Elisa. Ku iya madah: “Nembiak nya enda dani.”
32 Lebuh Elisa tama ke dalam rumah, iya meda nembiak ke udah mati nya ba atas katil iya.
33 Elisa tama ke dalam bilik lalu nutup pintu. Iya berengkah besampi ngagai Jehovah.
34 Udah nya, iya lalu ningkapka diri ba atas tubuh nembiak nya. Mulut iya ba atas mulut nembiak nya, mata iya ba atas mata nembiak nya, lalu tapa jari iya ba atas tapa jari nembiak nya. Nya meh utai ke dikereja iya sampai tubuh nembiak nya berasai angat.
35 Udah nya, iya bejalai kin kia ba dalam rumah nya, lalu ningkapka diri baru ba atas nembiak nya. Nembiak nya pan engkasi tujuh kali, lalu iya enchelakka mata iya.
36 Elisa ngangauka Gehasi lalu madahka: “Kangauka indu Sunem nya.” Nyadi, Gehasi pan ngangauka indu nya. Lebuh indu nya tama, Elisa madahka: “Ambi anak nuan.”
37 Indu nya pan besugang ba depan Elisa lalu mai anak iya pansut.
38 Lebuh Elisa pulai baru ngagai Gilgal, lapar pungkang nyadi ba endur nya. Bala nabi benung duduk ba depan iya, lalu iya bejaku ngagai penulung iya: “Panduk sup ba periuk ti besai ke bala nabi.”
39 Nyadi, siku ari sida pan ngagai ladang laban deka ngumpul herba, lalu iya tetemuka sejenis buah labu ke enda dikelala iya ba sebengkah utai tumbuh. Iya ngumpul labu nya, lalu nyimpan labu nya ke dalam gari iya sampai penuh. Udah nya, iya pulai. Iya nyirap labu nya, lalu nabakka buah labu nya ke dalam periuk.
40 Udah nya, sup nya pan dienahka ngagai bala sida. Tang lebuh sida ensepi sup nya, sida terus madahka: “O nembiak Petara ti bendar, berachun sup tu.” Udah nya, sida enda agi makai sup nya.
41 Nyadi, Elisa pan madahka: “Bai tepung ngagai aku kitu.” Iya pan nabakka mimit tepung nya ngagai periuk. Udah nya, iya madahka: “Nahka baru sup nya ngagai orang.” Sup nya nadai agi berachun.
42 Bisi siku lelaki datai ari Baal-salisah, lalu iya bisi mai 20 iti tuku roti barli. (Barli nya asil ketau ti keterubah.) Iya mega bisi mai sekantung bijirin ti baru. Udah nya, Elisa madahka: “Sadung pemakai tu ke diempa orang.”
43 Taja pia, penulung iya madahka: “Nadai chukup pemakai tu ke diempa 100 iku orang.” Ku Elisa madahka: “Sadung aja pemakai nya ke diempa sida, laban tu utai ke dipadahka Jehovah: ‘Sida deka makai, lalu pemakai nya deka bisi laluh.’”
44 Penulung nya pan ngenahka pemakai nya ke sida. Sida makai pemakai nya, lalu pemakai nya bisi laluh, baka ke dipadahka Jehovah.
Nota Kaki
^ Tauka “atas nama nuan ti idup.”
