Dua Timoti 4:1-22
4 Ba mua Petara enggau ba mua Jesus Kristus ke deka ngakim orang ke idup enggau orang ke mati, maya iya enggau Perintah iya dipandangka, aku meri nuan pesan tu:
2 Tusui jaku Petara enggau lengkas enda ngira ba maya ti senang tauka ba maya ti tusah. Rara meh orang lalu beri jaku tangkan sereta jaku lalau. Kereja nya enggau amat sabar sereta ngena chara ngajar ti landik.
3 Laban siti timpuh deka datai, alai orang enggai agi mendingka ajar ti manah,* tang sida deka nitihka pengingin diri lalu ingin deka dikelingi bala pengajar ke madahka utai ti deka didinga sida.
4 Sida enggai agi mendingka pemendar tang sida deka beratika cherita ti bula.
5 Tang nuan, jaga meh runding nuan ba semua pekara, liat ati napi penusah, kereja pengawa ke digaga orang ke nyadi penginjil,* lalu kereja pengawa nuan enggau silik.
6 Aku udah dituang baka pemeri wain lalu maya alai aku dilepaska udah semak amat.
7 Aku udah bebendar belaban. Aku udah belanda nyentuk ke ujung lalu aku udah nitihka ajar ke dipechayaka kitai.
8 Kenyau ari diatu, bisi makota pengelurus udah disedia ke aku. Ba hari nya, Tuan, iya nya hakim ti lurus, deka meri aku makota nya nyadika upah, ukai aja ke aku, tang mega ke semua sida ke nganti maya iya mandangka diri.
9 Uji meh enggau naka ulih datai kitu ngagai aku enggau lengkas.
10 Demas udah ninggalka aku laban iya rinduka dunya* tu lalu iya udah mupuk ngagai Tesalonika. Kresen udah mupuk ngagai Galatia lalu Titus udah mupuk ngagai Dalmatia.
11 Semina Luke aja bisi enggau aku. Bai mega Mark enggau nuan laban iya mayuh nulung aku ba pengawa aku.
12 Aku udah nganjung Tikikus ngagai Epesus.
13 Lebuh nuan datai, bai baju jubah ke ditinggalka aku ba rumah Karpus ba Troas. Bai mega gulung surat, kelebih agi gulung surat ke digaga ari kulit.
14 Aleksander, tukang temaga nya, udah balat ngemediska aku. Jehovah deka malas iya setipak enggau pengawa iya.
15 Nuan mega patut bejimat enggau iya laban iya balat amat ngelaban pesan ke ditusui kitai.
16 Lebuh aku keterubah iya ngetanka diri, nadai siku pan orang datai nyukung aku. Semua sida ninggalka aku. Ngarapka sida enda dikumbai besalah ketegal nya.
17 Taja pia, Tuan bediri semak aku lalu meri aku kuasa ngambika nengah aku, pengawa nginjil ulih dipejalaika enggau silik lalu semua bansa ulih ninga pesan ke ditusui. Aku mega udah diselamatka ari mulut singa.
18 Tuan deka nyelamatka aku ari tiap iti pengawa ti jai. Iya deka nyelamatka aku lalu mai aku ngagai Perintah iya ba serega. Ngarapka iya dimuliaka nyentuk ke belama iya. Amin.
19 Kirumka salam aku ngagai Priska enggau Akuila, sereta ngagai sida Onesiporus serumah.
20 Erastus mengkang diau ba Korint. Tang, aku ninggalka Tropimus ba Miletus laban iya sakit.
21 Uji meh enggau naka ulih ngambika datai sebedau musin chelap.
Eubulus ngirumka salam ngagai nuan. Pia mega enggau Pudens, Linus, Klaudia, enggau semua bala menyadi ke bukai.
22 Bala menyadi, ngarapka Tuan merekatka runding enggau ulah* ke diayanka kita lalu kita nerima pemanah ati iya ti besai.
Nota Kaki
^ Tauka “ti mai penguntung.”
^ Tauka “terus nusui Berita Manah.”
^ Tauka “jeman; sistem dunya.” Peda Penerang Leka Jaku, “Sistem dunya.”
^ Jaku Gerika, “pneu′ma.” Peda Penerang Leka Jaku, “Pneu′ma.”
