John 11:1-57
11 Nyadi sekali, siku lelaki ke benama Lasarus sakit. Iya enggau menyadi indu iya, Maria seduai Marta, diau ba genturung pendiau ke dikumbai Betani.
2 Maria meh ke udah nuang minyak wangi ba kaki Tuan Jesus lalu ngendas kaki Jesus ngena buk iya. Lasarus ke benung sakit nya menyadi lelaki iya.
3 Nya alai, Marta enggau Maria ngirumka pesan tu ngagai Jesus: “Tuan, kaban ke dikesayauka nuan benung sakit.”
4 Tang lebuh Jesus ninga nya, ku iya bejaku: “Penyakit nya enda ngujungka pemati, tang mai mulia ngagai Petara. Enggau nya, Anak Petara deka dimuliaka.”
5 Jesus sayauka Marta, Maria, enggau Lasarus.
6 Tang lebuh iya ninga Lasarus sakit, iya mengkang ba endur ti alai iya diau nya dua hari da agi.
7 Udah nya iya bejaku ngagai bala murid iya: “Aram kitai pulai baru ngagai Judea.”
8 Ku bala murid iya bejaku enggau iya: “Rabbi,* baru-baru tu orang Judea deka nuku nuan ngena batu, tang diatu nuan deka kin baru?”
9 Disaut Jesus: “Endaka kitai bisi 12 jam maya siang hari? Barang sapa bejalai maya siang hari enda labuh, laban iya meda penampak dunya tu.
10 Tang barang sapa bejalai maya malam hari deka labuh, laban penampak nadai ba dalam iya.”
11 Pengudah bejaku munyi nya, ku iya madahka: “Kaban kitai Lasarus udah tinduk, tang aku deka mansang kin ngerak iya.”
12 Bala murid iya lalu bejaku: “Tuan, enti iya benung tinduk, iya deka gerai.”
13 Kebendar iya, Jesus bejaku pasal Lasarus ke udah mati. Tang sida ngumbai iya madahka Lasarus benung tinduk.
14 Nya alai Jesus lalu beterus-terang bejaku ngagai sida: “Lasarus udah mati.
15 Ketegal kita, aku gaga laban aku nadai ba din. Enggau nya, pengarap kita deka tegap agi. Aram kitai mupuk ngagai iya kin.”
16 Nya alai Thomas, ke dikumbai Sapit, lalu bejaku ngagai bala murid ke bukai: “Aram kitai mega mupuk, ngambika kitai sama mati enggau iya.”
17 Lebuh Jesus datai, iya nemu Lasarus udah diengkah dalam kubur pengelama empat hari.
18 Betani enda jauh ari Jerusalem. Penyauh iya kira-kira tiga kilometer.*
19 Mayuh orang Judah datai ngelantangka ati Marta enggau Maria laban menyadi lelaki seduai iya udah mati.
20 Lebuh Marta ninga Jesus datai, iya lalu pansut betemu enggau Jesus. Tang Maria diau ba rumah.
21 Marta bejaku enggau Jesus: “Tuan, enti nuan bisi ba ditu, menyadi aku tentu enda mati.
22 Taja pia, aku agi arap Petara deka meri nama-nama utai ke dipinta nuan.”
23 Jesus bejaku ngagai iya: “Menyadi nuan deka idup baru.”
24 Ku Marta bejaku: “Aku nemu iya deka idup baru ba hari ti penudi.”*
25 Jesus madah ngagai iya: “Aku meh pengidup enggau pengangkat ari mati. Barang sapa ke arapka aku deka idup baru taja pan iya udah mati.
26 Genap iku orang ke idup lalu arapka aku enda sekali-kali deka mati. Kati nuan arapka tu?”
27 Marta lalu nyaut: “Au Tuan, aku arapka nuan nya Kristus, Anak Petara. Nuan meh ke disemaya datai ke dunya.”
28 Pengudah Marta bejaku munyi nya, iya lalu ngiga menyadi iya Maria. Ku iya nelai Maria: “Pengajar udah datai lalu iya ngiga nuan.”
29 Pengudah Maria ninga nya, iya lalu beguai angkat betemu enggau Jesus.
30 Maya nya, Jesus bedau datai ba genturung pendiau nya. Iya agi ba endur Marta ke betemu enggau iya.
31 Lebuh orang Judah ke ngelantangka ati Maria ba rumah meda Maria beguai angkat lalu pansut, sida pan nitihka iya. Sida ngumbai iya deka ngagai kubur lalu nyabak ba dia.
32 Lebuh Maria datai ba endur Jesus lalu meda iya, Maria besugang ba kaki Jesus. Ku iya: “Tuan, enti nuan bisi ba ditu, tentu menyadi aku enda mati.”
33 Lebuh Jesus meda Maria nyabak lalu orang Judah ke enggau iya mega nyabak, iya berasai balat sinu sereta tusah ati.
34 Ku iya nanya: “Dini alai kita ngengkahka bangkai iya?” Sida lalu nyaut: “Aram Tuan, ngambika nuan meda iya.”
35 Jesus pan lalu nyabak.
36 Nya alai orang Judah bejaku: “Peda kita! Iya amat sayauka Lasarus.”
37 Tang sekeda ari sida bejaku: “Iya ulih ngeraika mata orang ke buta. Nya alai, nama kebuah iya enda ulih nagang orang tu ari mati?”
38 Ati Jesus balat sinu baru, lalu iya mupuk ngagai kubur Lasarus. Kebendar iya, kubur nya siti lubang gua ke ditutup ngena batu ti besai.
39 Jesus lalu bejaku: “Baringka batu nya ke tisi.” Marta, menyadi lelaki ke mati nya, lalu bejaku: “Tuan, bangkai iya tentu udah bau but, laban iya udah mati empat hari.”
40 Ku Jesus bejaku: “Endaka aku udah madahka, enti nuan arap, nuan deka meda mulia Petara?”
41 Nya alai, sida pan maringka batu nya. Jesus engkadah ke langit lalu bejaku: “Apai, aku beterima kasih ngagai Nuan laban Nuan ningaka sampi aku.
42 Aku nemu Nuan seruran ningaka sampi aku. Tang aku bejaku munyi nya ketegal orang mayuh ke bediri ngelingi aku, ngambika sida arap Nuan meh ke udah ngirumka aku.”
43 Pengudah nyebut nya, iya ngangau enggau nyawa ti inggar: “Lasarus, pansut nuan!”
44 Lelaki ke mati nya pan pansut. Kaki enggau jari iya agi dibalut ngena kain. Lalu mua iya mega agi dibalut ngena kain. Jesus bejaku ngagai sida: “Buka kain nya ngambika iya ulih bejalai.”
45 Nya alai, mayuh orang Judah ke datai ngagai Maria arapka Jesus, pengudah meda utai ke digaga Jesus.
46 Tang sekeda ari sida betemu enggau orang Parisi lalu madahka utai ke udah digaga Jesus.
47 Nyadi bala tuai imam enggau bala orang Parisi lalu ngempuruka Raban Kunsil Orang Judah. Ku sida: “Nama patut digaga kitai? Orang nya udah ngereja mayuh pengawa ajih.
48 Enti kitai nejuka iya, semua orang deka arapka iya. Pengujung iya, orang Rome deka datai lalu ngerampas Rumah Sembiang sereta bansa kitai.”
49 Tang siku ari sida, iya nya Kaiapas, ke nyadi imam besai taun nya, lalu bejaku: “Kita nadai nemu utai.
50 Endaka kita nemu, manah agi enti siku orang mati ke bansa kitai ari ke semua bansa kitai dipunaska?”
51 Kebendar nya, utai ke disebut Kaiapas nya ukai datai ari runding iya empu. Tang laban iya nyadi imam besai taun nya, iya benabi pasal Jesus ke deka mati ke bansa Judah.
52 Iya ukai semina mati ke bansa Judah aja, tang mega deka ngempuru sereta nyerakupka bala anak Petara ke udah pambar ba mayuh endur.
53 Nyadi kenyau ari sehari nya, sida ngiga chara kena munuh Jesus.
54 Nya alai, Jesus enda agi ngayanka diri ba mua orang Judah lebuh iya bejalai. Tang iya mupuk ari endur nya ngagai nengeri Efraim, ke semak enggau menua puang. Lalu iya diau ba dia enggau bala murid iya.
55 Maya nya, Pengerami Paska orang Judah nyau semak. Mayuh orang ari menua pesisir datai ngagai Jerusalem. Sida deka nuchi diri nitihka Adat sebedau pengerami nya berengkah.
56 Orang mayuh begigaka Jesus. Lalu lebuh bediri ba Rumah Sembiang, sida bejaku enggau pangan diri: “Nama runding kita? Kati iya deka datai ngagai pengerami tu?”
57 Tang bala tuai imam enggau orang Parisi udah meri pesan: Barang sapa nemu endur Jesus, patut madah ngagai sida ngambika sida ulih nangkap iya.
Nota Kaki
^ Tauka “Pengajar.”
^ Jaku Asal, “kira-kira 15 stadium.” Siti stadium kira 185 m (606.95 kaki).
^ Nya siti timpuh maya jemah ila.
