John 20:1-31
20 Kena tumu pagi Hari Minggu,* lebuh hari agi petang, Maria Magdalin datai ngagai kubur Jesus. Iya meda batu ke dikena nutup kubur nya udah dibaringka.
2 Nya alai, iya belanda mansang ngagai Simon Peter enggau ngagai siku murid ke dikesayauka Jesus, lalu madah ngagai seduai iya: “Sida udah mansutka Tuan ari kubur, lalu kami enda nemu dini endur sida udah ngengkahka iya.”
3 Peter enggau murid nya lalu mupuk ngagai kubur.
4 Seduai iya sama belanda kin, tang murid nya belanda laju agi ari Peter lalu dulu agi datai ba kubur.
5 Iya nilik ke dalam kubur lalu meda kain linin ba dia, tang iya enda tama ke dalam kubur nya.
6 Udah nya, Simon Peter pan datai lalu tama ke dalam kubur nya. Iya mega meda kain linin nya ba dia.
7 Kain ke dikena malut pala Jesus digulung. Tang kain nya enda diengkah begulai enggau kain ke dikena malut bangkai iya.
8 Udah nya, murid ke dulu agi datai ba kubur nya mega tama. Iya meda semua utai nya lalu pechaya.
9 Tang seduai iya agi enda meretika ayat Bup Kudus ke madahka Jesus patut diidupka baru ari mati.
10 Nya alai, seduai iya pulai ngagai rumah diri empu.
11 Tang Maria agi bediri nyabak ba luar kubur. Lebuh iya nyabak, iya nilik ke dalam kubur,
12 lalu meda dua iku melikat ke ngena gari burak duduk ba endur bangkai Jesus diengkahka sebedau tu. Siku ba senentang pala, lalu siku da agi ba senentang kaki.
13 Seduai iya bejaku ngagai Maria: “Nama kebuah nuan nyabak?” Ku Maria nyaut: “Bisi orang udah ngambi bangkai Tuan aku, lalu aku enda nemu dini endur sida udah ngengkahka iya.”
14 Pengudah bejaku munyi nya, iya nguing lalu meda Jesus bediri ba dia. Tang iya enda sedar, orang nya Jesus.
15 Jesus bejaku ngagai iya: “Nama kebuah nuan nyabak? Sapa digiga nuan?” Maria ngumbai orang nya tukang kebun. Nya alai Maria bejaku: “Tuan, enti nuan udah ngambi bangkai iya, padahka ngagai aku endur bangkai iya diengkahka ngambika aku ulih ngambi iya.”
16 Jesus ngangauka iya: “Maria!” Maria nguing lalu bejaku ngagai iya dalam jaku Hebrew: “Rabboni!” (reti nya “Pengajar!”)
17 Jesus bejaku ngagai iya: “Anang megai aku, laban aku bedau agi mupuk ngagai Apai. Mupuk meh ngagai bala menyadi aku lalu padah ngagai sida, ‘Aku deka mupuk ngagai Apai aku ke mega Apai kita, ngagai Petara aku ke mega Petara kita.’”
18 Nya alai, Maria Magdalin mupuk lalu madah ngagai bala murid Jesus: “Aku udah meda Tuan!” Udah nya, iya madah ngagai sida pasal utai ke udah dipadah Jesus ngagai iya.
19 Ba hari ti sama, iya nya kena Hari Minggu, bala murid Jesus begelumu lebuh hari udah lemai. Sida ngunchi pintu laban takutka orang Judah. Taja pia Jesus ayan ba tengah-tengah sida lalu bejaku: “Arapka semua kita gerai magang.”
20 Pengudah bejaku munyi nya, iya mandangka kedua-dua jari iya enggau rusuk iya ngagai sida. Bala murid nya gaga ati meda Tuan Jesus.
21 Jesus bejaku baru ngagai sida: “Arapka semua kita gerai magang. Baka Apai ke udah ngirumka aku, aku mega deka ngirumka kita.”
22 Pengudah nyebut nya, iya ngesuhka seput ngagai sida lalu bejaku: “Terima meh kuasa kudus Petara.
23 Enti kita ngampunka dosa orang, orang nya deka diampun. Enti kita enda ngampunka dosa orang, iya enda diampun.”
24 Tang Thomas, siku ari 12 iku rasul, ke dikumbai Sapit, nadai enggau sida lebuh Jesus datai.
25 Nya alai, bala murid ke bukai madah ngagai iya: “Kami udah meda Tuan!” Tang ku iya nyaut: “Aku enda pechaya seagi-agi aku bedau meda abi paku lawang ba jari iya, lalu negu abi nya ngena tunjuk jari aku sereta megai rusuk iya.”
26 Lapan hari udah nya, bala murid Jesus begelumu baru dalam rumah, lalu Thomas mega bisi enggau sida. Taja pan pintu udah dikunchi, Jesus ayan lalu bediri ba tengah-tengah sida. Ku iya bejaku: “Arapka semua kita gerai magang.”
27 Udah nya, iya bejaku ngagai Thomas: “Engkahka tunjuk nuan ba ditu lalu peda jari aku. Unjurka jari nuan lalu tegu rusuk aku. Badu agi kakang, tang arap meh.”
28 Thomas bejaku ngagai iya: “Tuan aku enggau Petara aku!”
29 Jesus bejaku ngagai iya: “Kati nuan arap laban nuan udah meda aku? Gaga ati meh orang ke arap, taja pan enda meda.”
30 Jesus ngaga mayuh kereja ajih ke bukai ba mua bala murid iya. Tang nya enda ditulis ba gulung surat tu.
31 Taja pia, semua tu udah ditulis ngambika kita arap Jesus nya Kristus, lalu iya Anak Petara. Enggau nya, kita deka bulih pengidup nengah nama iya laban kita arap.
Nota Kaki
^ Jaku Asal, “hari keterubah dalam seminggu.” Ba orang Judah, Hari Minggu nya hari keterubah dalam seminggu.
