Pemansut 20:1-26
20 Udah nya, Petara madahka semua pesan tu:
2 “Aku tu meh Petara kita, Jehovah, ke udah mai kita pansut ari Ejip, menua* alai kita nyadi ulun.
3 Anang nyembah petara-petara bukai.* Semina Aku aja ke patut disembah kita.
4 “Anang ngaga patung tauka utai bukai ke nunda gamal nama-nama utai ke bisi ba langit, ba dunya, tauka ba dalam ai.
5 Anang besugang ngagai utai nya tauka tetarit ati deka nyembah utai nya, laban Aku tu meh Jehovah, Petara kita. Sembah meh Aku siku aja. Enti bisi orang ke ngereja penyalah sereta begedika Aku, Aku deka ngukum anak, uchu, enggau ichit iya.
6 Tang, Aku deka setia ngayanka pengerindu Aku ngagai orang ke rinduka Aku enggau ngasika pesan Aku. Aku indah deka ngayanka pengerindu tu ngagai semua bala peturun iya, nyentuk ngagai beribu-ribu generasi* iya.
7 “Anang ngena nama Aku, Jehovah, enggau chara ti enda bebasa,* laban Aku, Jehovah, Petara kita, deka ngukum sapa-sapa ke ngena nama Aku baka nya.
8 “Anang enda ingat ngintu Hari Sabat, lalu tentuka hari nya kudus.
9 Kita tau gawa dalam enam hari.
10 Tang hari ketujuh nya Hari Sabat ke Aku, Petara kita, Jehovah. Ba hari nya, kita enda tau gawa, pia mega enggau anak kita, bala ulun kita, jelu tupi kita, enggau orang asing ke diau ba kuta kita.
11 Aku, Jehovah, udah ngaga langit, dunya, enggau tasik, sereta semua utai ke bisi ba langit, dunya, enggau tasik dalam enam hari. Tang ba hari ti ketujuh, Aku berehat. Nya meh kebuah Aku, Jehovah, merekatka Hari Sabat lalu nguduska hari nya.
12 “Bebasaka apai indai kita, ngambika kita panjai umur diau ba menua ke diberi Aku, Petara kita, Jehovah.
13 “Anang munuh orang.
14 “Anang ngereja ulah seks enggau orang ke ukai kaling pengidup diri.
15 “Anang ngenchuri.
16 “Anang bula lebuh meri saksi pasal orang bukai.
17 “Anang inginka nama-nama utai ke diempu orang bukai, sekalika nya rumah iya, bini iya, ulun iya, sapi iya, tauka keledai iya.”
18 Orang Israel meda gunung nya berasap, lalu bisi kilat nyelar. Sida mega ninga bunyi guntur sereta bunyi terumpit.* Lebuh sida ninga sereta meda utai ke nyadi nya, sida gegetar takut lalu bediri jauh ari endur nya.
19 Ku sida bejaku ngagai Moses: “Nuan aja meh ke bejaku enggau kami, lalu kami deka ninga. Anang ngasuh Petara bejaku enggau kami, enggaika kami mati.”
20 Ku Moses nyaut: “Anang takut. Petara ti bendar udah datai deka nguji kita, ngambika kita seruran nangika Iya lalu enda ngereja dosa.”
21 Orang Israel bediri jauh ari endur nya. Tang, Moses mansang ngagai mua hari ti chelum, ngagai endur Petara ti bendar.
22 Udah nya, Jehovah bejaku ngagai Moses: “Tu meh utai ke patut dipadahka nuan ngagai orang Israel: ‘Kita empu udah meda Aku bejaku enggau kita ari serega.
23 Anang ngaga petara ari emas tauka pirak, laban kita enda tau nyembah petara bukai kelimpah ari Aku.
24 Kita mesti ngaga alta ari tanah ke Aku. Serah meh pemeri tunu, pemeri bebaik, enggau jelu tupi kita ba atas alta nya. Aku deka datai lalu merekatka kita ba tiap iti endur ke dipilih Aku nyadi endur alai orang ngingatka nama Aku.
25 Enti kita ngaga alta ari batu ke Aku, anang mutung batu nya, laban enti kita mutung batu nya ngena pat, kita deka ngasuh alta nya nyadi enda tuchi.
26 Anang ngaga tangga lalu niki ngagai alta Aku, ngambika perengka seks kita enda ayan.’
Nota Kaki
^ Jaku Asal, “rumah.”
^ Tauka “nyembah petara-petara bukai laban deka ngelaban Aku.”
^ Tauka “serak.”
^ Tauka “chara ti salah.”
^ Jaku Asal, “bunyi tanduk bedus lelaki disepu.”
