Pemansut 21:1-36
21 “Tu meh adat ke patut dipadahka nuan ngagai orang Israel:
2 “Enti kita meli orang Hebrew nyadi ulun kita, iya patut nyadi ulun kita pengelama enam taun. Tang ba taun ti ketujuh, iya mesti dibibaska, lalu iya enda ibuh mayar nama-nama utai ngagai kita.
3 Enti iya bedau kawin maya iya nyadi ulun kita, iya aja ke deka dibibaska. Tang, enti iya udah kawin maya iya nyadi ulun kita, bini iya mega patut mupuk enggau iya maya iya dibibaska.
4 Enti tuan iya meri iya siku bini, lalu bini iya ngadaka anak lelaki tauka anak indu, bini enggau bala anak iya deka diempu tuan iya. Nya alai, maya iya dibibaska, semina iya aja ke tau mupuk.
5 Tang, enti ulun nya enggai mupuk lalu iya keran madahka: ‘Aku sayauka tuan aku, bini aku, enggau bala anak aku. Aku enggai dibibaska,’
6 tuan iya mesti mai iya ngagai Petara ti bendar. Udah nya, iya mesti nyandih ba pintu tauka ba bingkai pintu, lalu tuan iya deka nebuk pending iya ngena siti pekekas. Udah nya, iya deka nyadi ulun tuan iya seumur idup.
7 “Enti siku orang nyual anak indu iya nyadi ulun, chara indu nya dibibaska enda sama enggau chara ulun lelaki dibibaska.
8 Enti tuan iya enda rinduka iya lalu enggai agi ngambi iya nyadi siku ari bini iya, tuan iya patut nyual iya ngagai orang bukai. Tang, tuan iya enda tau nyual iya ngagai orang asing, laban tuan iya enda ngamatka semaya iya.
9 Enti tuan nya ngasuh indu nya kawin enggau anak lelaki iya, tuan nya mesti meri indu nya hak nyadi anak indu iya.
10 Tang, enti anak lelaki tuan* nya kawin baru, iya agi patut nyediaka pemakai, gari, enggau utai ke diguna* bini iya ti keterubah.
11 Tang, enti anak lelaki tuan nya enda nyediaka tiga iti utai nya, indu nya mesti dibibaska, lalu iya enda ibuh mayar nama-nama utai.
12 “Sapa-sapa ke malu orang sampai mati mesti dibunuh.
13 Tang, enti iya enda sengaja munuh orang, lalu Aku, Petara ti bendar, nejuka utai nya nyadi, iya ulih ngerarika diri ngagai endur ke udah ditentuka Aku.
14 Enti bisi orang balat ringat ngagai orang bukai lalu iya sengaja munuh orang nya, iya mesti dibunuh, taja pan iya ngerarika diri ngagai alta Aku kena nyelamatka diri.
15 Sapa-sapa ke malu apai tauka indai diri mesti dibunuh.
16 “Enti sema bisi orang ditemu nabanka orang bukai, sekalika orang nya dijual iya tauka agi ditan iya, iya mesti diukum bunuh.
17 “Sapa-sapa ke nyumpah apai tauka indai diri patut diukum bunuh.
18 “Tu meh utai ke patut digaga enti dua iku orang belaya, lalu siku ari seduai iya ngemediska siku agi ngena batu, tauka mukut orang nya* sampai orang nya balat bakal, lalu enda ulih angkat ari peninduk iya, tang orang nya enda mati:
19 Enti orang ke bakal nya ulih angkat lalu bejalai ngena tungkat, orang ke ngemediska iya enda diukum. Tang, orang ke ngemediska iya patut mayar ganti rugi ngagai iya, nyentukka iya amat-amat gerai lalu ulih gawa baru.
20 “Enti bisi orang malu ulun lelaki tauka ulun indu iya ngena kayu, nyentukka ulun iya mati, iya mesti diukum.
21 Tang, iya enda diukum enti ulun iya mati sehari tauka dua hari pengudah nya, laban ulun nya udah dibeli iya.
22 “Enti bisi orang belaya lalu ngemediska siku indu ke ngandung, lalu indu nya ngadaka anak enda chukup bulan, tang indu nya tauka anak iya enda mati,* orang ke salah mesti mayar ganti rugi ke dipinta laki indu nya, lalu penyampau ganti rugi nya mesti ditentuka bala hakim.
23 Tang, enti indu nya tauka anak iya mati, nyawa mesti ganti nyawa,
24 mata ganti mata, ngeli ganti ngeli, jari ganti jari, kaki ganti kaki,
25 abi betu ganti abi betu, abi telih ganti abi telih, lalu abi bukut ganti abi bukut.
26 “Enti bisi orang malu mata ulun lelaki iya tauka malu mata ulun indu iya, nyentukka ulun nya buta, ulun nya mesti dibibaska, nyadika ganti rugi ke mata ulun nya.
27 Enti bisi orang malu ulun lelaki iya tauka ulun indu iya, lalu ngeli ulun nya patah, ulun nya mesti dibibaska, nyadika ganti rugi ke ngeli ulun nya.
28 “Enti siku sapi nanduk siku lelaki tauka siku indu nyentukka orang nya mati, sapi nya mesti ditikau ngena batu sampai mati. Tang dagin iya enda tau diempa, lalu orang ke ngempu sapi nya enda diukum.
29 Tang, enti sapi nya endang selalu nanduk orang, lalu orang ke ngempu sapi nya enda ngurung sapi nya taja pan iya udah diberi amaran, lalu sapi nya munuh siku lelaki tauka siku indu, sapi nya enggau orang ke ngempu sapi nya mesti ditikau ngena batu sampai mati.
30 Enti orang ke ngempu sapi nya dipinta mayar duit tebus, iya mesti mayar abis semua duit tebus nya, ngambika ulih nebus nyawa diri.
31 Adat tu mega mesti dikena enti sapi nya nanduk anak mit lelaki tauka indu sampai mati.
32 Enti sapi nya nanduk siku ulun lelaki tauka ulun indu, orang ke ngempu sapi nya mesti mayar 30 singkap* pirak ngagai tuan ulun nya, lalu sapi nya mesti ditikau ngena batu sampai mati.
33 “Enti siku orang enda nutup lubang, tauka iya numbak siti lubang lalu nejuka lubang nya tebuka, lalu siku sapi tauka keledai labuh ngagai lubang nya,
34 orang* nya mesti mayar ganti rugi ngagai orang ke ngempu jelu nya, lalu jelu ke udah mati nya deka diempu iya.
35 Enti siku sapi ngemediska sapi orang bukai nyentukka sapi nya mati, tu meh utai ke mesti digaga: Orang ke ngempu dua iku sapi nya, mesti nyual sapi ke agi idup, lalu bebagika duit ke diulih seduai iya. Seduai iya mega mesti bebagika sapi ke udah mati nya.
36 Tang, enti sapi nya endang selalu nanduk jelu bukai, lalu orang ke ngempu sapi nya enda ngurung sapi nya, orang ke ngempu sapi nya mesti meri siku sapi nyadika ganti rugi, lalu sapi ke udah mati nya deka diempu iya.
Nota Kaki
^ Tauka engka, “enti tuan.”
^ Reti iya, pengawa seks.
^ Tauka engka, “malu orang nya ngena sesiti perengka.”
^ Tauka “enda balat bakal.”
^ Jaku Asal, “30 shekel.” Peda Rujukan B14.
^ Jaku Asal, “orang ke ngempu lubang.”
