Rome 5:1-21
5 Diatu, kitai udah dikumbai Petara lurus ketegal pengarap ke diayanka kitai. Nya alai, aram meh kitai bebaik* enggau Petara nengah Tuan kitai, Jesus Kristus.
2 Pengarap kitai ba Jesus muka jalai ngambika kitai ulih semak ngagai Petara, lalu nerima pemanah ati Petara ti besai. Nyadi, aram meh kitai gaga ati* laban kitai andalka diri deka nerima mulia Petara.
3 Ukai nya aja, tang aram meh kitai gaga ati* lebuh napi pemerinsa, laban kitai nemu pemerinsa ulih ngasuh kitai liat ati.
4 Enti kitai ngayanka diri liat ati, Petara deka nerima kitai. Ketegal kitai diterima Petara, tu ngasuh kitai andalka utai ke dikearapka kitai.
5 Lalu utai ke dikearapka kitai enda ngasaka ati kitai, laban pengerindu Petara udah dituangka ngagai ati kitai nengah kuasa kudus ke diberi Iya ngagai kitai.
6 Endang amat, lebuh kitai agi lemi, Kristus udah mati ke orang ti bedosa, ba maya ke udah ditetapka.
7 Bisi orang engka berani mati ke orang ti manah, tang jarang amat orang ke sanggup mati ke orang ti lurus.
8 Tang Kristus udah mati ke kitai, taja pan kitai agi nyadi orang ke bedosa. Nya meh chara Petara ngayanka pengerindu Iya ngagai kitai.
9 Nya alai, ketegal kitai udah dikumbai lurus nengah darah Kristus, kitai lebih agi pechaya kitai deka diselamatka ari pengeringat Petara.
10 Taja pan suba kitai nyadi munsuh Petara, tang kitai udah bebaik enggau Iya, ketegal pemati Anak Iya. Nya alai, ketegal kitai udah bebaik enggau Petara, kitai amat pechaya kitai tentu deka diselamatka, laban Kristus udah idup.
11 Ukai nya aja, kitai mega gaga ati, laban ketegal Tuan kitai, Jesus Kristus, kitai ulih bebaik enggau Petara.
12 Dosa tama ke dunya nengah siku orang, lalu dosa mai pemati. Nya alai, pemati ngelekai ngagai semua orang, laban semua orang bela bedosa.
13 Dosa endang udah bisi ba dunya sebedau Adat bisi. Tang enti nadai adat, nadai orang deka dikumbai besalah ketegal dosa.
14 Taja pia, kenyau ari jeman Adam nyentuk ngagai jeman Moses, pemati merintah atas semua orang baka raja, taja pan sida enda bedosa baka Adam. Adam ngambarka siku orang ti deka datai.
15 Taja pia, pemeri Petara enda baka dosa Adam. Mayuh orang mati ketegal dosa siku orang nya, tang nengah pemanah ati siku orang, iya nya Jesus Kristus, mayuh orang nerima pemanah ati Petara ti besai enggau pemeri Iya ti pechuma. Nengah pemeri tu, Petara mai chukup mayuh berekat* ngagai mayuh orang.
16 Pemeri Petara ti pechuma mega bebida ari dosa siku orang nya. Tu ketegal pengudah siku orang bedosa, semua orang dikumbai besalah. Tang Petara meri pemeri Iya ti pechuma pengudah mayuh orang bedosa, ngambika sida dikumbai Petara lurus.
17 Pemati merintah baka raja ketegal dosa siku orang nya. Tang kitai ulih pechaya ketegal siku orang, iya nya Jesus Kristus, sida ke nerima pemanah ati Petara ti besai enggau pemeri iya ti lurus sereta pechuma deka idup lalu merintah nyadi raja!
18 Ketegal siku orang bedosa, semua macham orang dikumbai besalah. Pia mega, ketegal siku orang ngereja utai ti lurus, semua macham orang ulih dikumbai Petara lurus lalu bulih pengidup.
19 Ketegal siku orang enda ngasi, mayuh orang bedosa. Pia mega, ketegal siku orang ngasi, mayuh orang deka dikumbai Petara lurus.
20 Adat diberi kena nunjukka orang amat bedosa. Tang lebuh dosa majak nambah, Petara ngayanka pemanah ati Iya ti besai agi.
21 Nyadi, sama baka dosa ke merintah baka raja lalu ngujungka pemati, pia mega, pemanah ati Petara ti besai mega merintah baka raja, ngambika orang dikumbai Petara lurus. Enggau nya, orang deka bulih pengidup ti meruan belama iya nengah Tuan kitai, Jesus Kristus.
Nota Kaki
^ Tauka engka, “kitai ulih bebaik.”
^ Tauka engka, “kitai ulih gaga ati.”
^ Tauka engka, “kitai ulih gaga ati.”
^ Tauka “mai berekat ti belimpah.”
