Surat Kereja Rasul 15:1-41
15 Sekeda orang ke datai ari Judea belabuh ngajar bala menyadi ba Antiok. Sida madahka: “Kita enda ulih diselamatka enti kita enda disunat* nitihka Adat Moses.”
2 Nya alai, sida balat bekelikuh sereta beserekang* penemu enggau Paul seduai Barnabas. Udah nya, bala menyadi ngasuh Paul, Barnabas, enggau sekeda ari bala sida, mansang ngagai Jerusalem ngambika ulih berandau pasal pekara nya enggau bala rasul sereta bala tuai gempuru ba din.
3 Raban gempuru bejalai enggau sida naka setengah jalai aja. Udah nya, sida neruska pejalai nengah Finisia enggau Samaria. Ba din, sida madah enggau silik pasal baka ni orang ari bansa bukai udah nguing lalu nyembah Petara. Nya alai, semua bala menyadi ba din balat gaga ati.
4 Lebuh sida datai ba Jerusalem, raban gempuru, bala rasul, enggau bala tuai gempuru, nyambut penatai sida enggau gaga ati. Lalu sida madahka mayuh utai ke udah digaga Petara nengah sida.
5 Tang sekeda ari raban pengarap orang Parisi ke udah nyadi murid Jesus bediri lalu bejaku: “Sida ke ukai orang Judah ke arapka Jesus mesti disunat lalu patut nitihka Adat Moses.”
6 Nya alai, bala rasul enggau bala tuai gempuru begelumu berandauka pekara nya.
7 Pengudah sida bendar amat beserekang* penemu, Peter angkat lalu bejaku: “Bala menyadi, sebedau tu, semua kita udah nemu, Petara udah milih aku ari bala kita ngambika nengah aku, orang ari bansa bukai ulih ninga ajar pasal Berita Manah lalu arap.
8 Petara ke nemu utai ke bisi dalam ati, udah nunjukka Diri nerima sida lebuh Iya meri sida kuasa kudus Iya, baka Iya ke udah meri nya ngagai kitai.
9 Ba Iya, kitai enggau sida nadai bida. Tang Iya ngasuh ati sida tuchi laban sida arap.
10 Nya alai, nama kebuah kita ngasuh bala murid tu ngesan utai ti berat kena nguji Petara, enti kitai empu enggau bala aki ini kitai pan enda tesanka utai nya?
11 Tang kitai arap kitai diselamatka ketegal pemanah ati Tuan Jesus ti besai. Sida mega arapka utai ti sama.”
12 Pengudah Peter bejaku munyi nya, semua orang ba dia enda bemunyi. Udah nya, semua orang lalu ningaka Barnabas enggau Paul, lebuh seduai iya nusui pasal tanda enggau kereja ajih ke digaga Petara ba bansa bukai nengah seduai iya.
13 Pengudah seduai iya bejaku, James lalu bejaku: “Bala menyadi, dinga kita.
14 Simeon* udah madahka enggau terang baka ni Petara berengkah beratika orang bansa bukai, ngambika Iya ulih milih orang ari bala sida nyadi nembiak ke dikangau ngena nama Iya.
15 Lalu utai tu sejalai enggau utai ke udah ditulis ba Ajar Sida Nabi:
16 ‘Udah nya, Aku deka datai baru lalu nirika rumah* David ke udah rubuh. Aku deka ngaga baru tembawai iya, lalu ngaduka iya baka ke asal,
17 ngambika orang ke agi tinggal ari bala sida ulih bebendar ngiga Jehovah begulai enggau orang ari semua bansa, iya nya orang ke dikangau ngena nama Aku. Nya meh utai ke dipadah Jehovah ke ngereja semua utai tu,
18 iya nya utai ke udah ditemu kenyau ari kelia menya.’
19 Nya alai, ba runding aku, anang ngenusahka orang ari bansa bukai ke ingin deka nyembah Petara.
20 Tang kitai patut nulis surat ngagai sida, madahka sida patut nyeliahka diri ari nama-nama utai ti bekaul enggau engkeramba,* ari ulah seks ti kamah,* ari makai dagin jelu ti mati dichekal,* sereta ari darah.
21 Ari kelia menya, bisi orang madah pasal Moses ba tiap iti nengeri, laban utai ke ditulis iya nya dibacha ba balai gempuru ninting Hari Sabat.”
22 Udah nya, bala rasul, bala tuai gempuru, enggau semua raban gempuru, ngaga pemutus deka milih dua iku orang ari bala sida lalu nganjung seduai iya ngagai Antiok begulai enggau Paul sereta Barnabas. Nya alai, Silas enggau Judas, ke mega dikumbai Barsabas, dipilih. Seduai nya meh ke ngiring bala menyadi.
23 Tu munyi surat ke dikirum nengah sida:
“Bala menyadi, kami ke rasul enggau bala tuai gempuru ngirumka tabi basa ngagai semua bala kita ke ari bansa bukai ke diau ba Antiok, Siria, enggau Kilikia.
24 Kami ninga sekeda orang ari ditu mansang ngagai kita lalu madahka utai ke ngasuh kita irau sereta charut runding, taja pan kami nadai ngasuh sida ngereja nya.
25 Nya alai, kami setuju ngaga pemutus deka milih dua iku orang, lalu nganjung seduai iya ngagai kita begulai enggau Barnabas enggau Paul, ke dikerinduka kami.
26 Barnabas enggau Paul udah berambun nyawa ketegal nama Tuan kitai, Jesus Kristus.
27 Kami nganjung Judas enggau Silas ngambika seduai iya mega ulih madah ngagai kita pasal utai ke ditulis ba surat tu.
28 Kuasa kudus nulung kami mutuska ngambika kita enda ibuh ditating enggau pekara bukai kelimpah ari utai tu:
29 nyeliah ari nama-nama utai ke diberi ngagai engkeramba, ari darah, ari makai dagin jelu ti mati dichekal,* sereta ari ulah seks ti kamah.* Enti kita seruran bejimat sereta ngenyauhka diri ari semua pekara tu, kita deka mujur. Ngarapka semua kita seruran gerai.”*
30 Nya alai, sida ke dianjung nya mupuk ngagai Antiok. Sida ngempuruka semua bala murid Jesus ba dia lalu nyuaka surat nya ngagai sida.
31 Pengudah macha surat nya, sida gaga ati lebuh ninga jaku peransang nya.
32 Judas enggau Silas ke mega nabi, udah madahka mayuh jaku peransang kena negapka bala menyadi ba dia.
33 Seduai iya lama diau ba Antiok. Lebuh seduai iya deka mupuk, bala menyadi ba dia madahka selamat tinggal ngagai seduai iya. Judas enggau Silas pulai baru ngagai orang ke nganjung seduai iya.
34 * ——
35 Taja pia, Paul enggau Barnabas terus diau ba Antiok ngambika ngajar orang. Ba dia, seduai iya madahka Berita Manah pasal jaku Jehovah begulai enggau mayuh orang bukai.
36 Pengudah siti timpuh, Paul madah ngagai Barnabas: “Aram tua pulai baru ngagai tiap iti nengeri ke alai tua udah nusui jaku Jehovah, ngambika ulih meda baka ni gaya bala menyadi ba dia.”
37 Barnabas keran deka mai John, ke mega dikumbai Mark.
38 Tang Paul enggai mai iya, laban iya udah ninggalka seduai iya lebuh ba Pampilia, lalu enda bejalaika pengawa begulai enggau seduai iya.
39 Ketegal nya, Paul enggau Barnabas balat belaya, lalu seduai iya beserara ari pangan diri. Barnabas mai Mark lalu belayar ngagai Saiprus.
40 Tang Paul milih Silas. Seduai iya mupuk pengudah bala menyadi besampi ngambika Jehovah meri pemanah ati Iya ti besai ngagai Paul.
41 Iya bejalai ngagai serata Siria enggau Kilikia, ngambika ngeringka raban gempuru ba dia.
Nota Kaki
^ Tauka “ditutus.”
^ Tauka “belaban.”
^ Tauka “belaban.”
^ Nama bukai Simon Peter.
^ Tauka “langkau; langkau kain.”
^ Jaku Asal, “enggau utai ti kamah laban engkeramba.”
^ Jaku Gerika, “por·nei′a.” Peda Penerang Leka Jaku.
^ Tauka “jelu ke dibunuh tang darah enda dibuai ari tubuh jelu nya.”
^ Tauka “jelu ke dibunuh tang darah enda dibuai ari tubuh jelu nya.”
^ Jaku Gerika, “por·nei′a.” Peda Penerang Leka Jaku.
^ Tauka “Selamat tinggal.”
^ Ayat tu nadai ditemu ba sekeda manuskrip ke lama, lalu engka ukai sebagi ari ayat ba Bup Kudus.
