Titus 2:1-15
2 Tang nuan patut terus nyebut utai ti sejalai enggau ajar ti manah.*
2 Awakka bala lelaki ke tuai ngereja semua utai enggau pengumbas iya,* berunding baka orang ke besai tuai, nemu berunding enggau manah, tegap ba pengarap, ngembuan pengerindu ti dalam, sereta amat liat ati.
3 Pia mega, awakka bala indu ke tuai ngembuan ulah baka orang ti kudus, enda bejaika orang, enda gian ngirup* mayuh wain, lalu sida patut ngajar utai ti manah.
4 Enggau nya, sida ulih ngelalau* bala indu ke biak ngambika rinduka laki enggau anak sida,
5 nemu berunding enggau manah, tuchi, bebendar ngereja pengawa ba rumah, manah ati, sereta ngasika laki sida ngambika orang enda bejaika jaku Petara.
6 Pia mega, anang ngetu ngasuh bala lelaki ke biak ngambika nemu berunding enggau manah.
7 Nuan patut nyadi teladan ba pengawa ti manah dalam semua pekara. Ajar utai ti tuchi* enggau bebendar.*
8 Kena meh jaku ti manah* ke enda ulih dipejaika orang, ngambika orang ke ngelaban berasai malu laban enda ulih nyebut nama-nama utai ti jai pasal kitai.
9 Awakka ulun ngasika tuan sida ba semua pekara sereta bebendar ngelantangka ati tuan sida. Ulun mega enda patut ngelaban jaku tuan sida
10 tauka ngenchuri ari tuan sida, tang sida patut nunjukka diri amat-amat tau dikearapka. Enggau nya, ba semua pekara, sida ulih ngias ajar Petara ti Penyelamat kitai.
11 Petara udah ngayanka pemanah ati Iya ti besai lalu nya nyelamatka semua macham orang.
12 Pemanah ati nya ngelatih kitai nulak pengawa ti jai sereta pengingin dunya. Pemanah ati nya mega ngelatih kitai ngambika nemu berunding enggau manah, lurus, sereta enda bebagi ati nyembah Petara lebuh kitai idup ba dunya* tu.
13 Lebuh kitai ngereja nya, kitai mega nganti enggau andal utai ti ngagaka ati sereta nganti Petara ti Pemadu Bekuasa enggau Jesus Kristus ti Penyelamat kitai, dipandangka enggau mulia.
14 Kristus nyerahka diri kena ngelepaska kitai ari semua macham penyai sereta ngasuh kitai nyadi tuchi ngambika kitai ulih nyadi nembiak iya,* ke ngereja pengawa ti manah enggau ransing.
15 Ngena kuasa ke udah diberi ngagai nuan, anang ngetu bejaku pasal pekara nya sereta anang ngetu ngelalau* enggau ngerara orang. Anang nejuka sapa-sapa ngemaruhka nuan.
Nota Kaki
^ Tauka “ti mai penguntung.”
^ Tauka “enggau seimbang.”
^ Tauka “enda nyadi ulun.”
^ Tauka “ngelatih.”
^ Tauka engka, “Ngajar ari ati ti tuchi.”
^ Tauka “serius.”
^ Tauka “ti mai penguntung.”
^ Tauka “jeman; sistem dunya.” Peda Penerang Leka Jaku, “Sistem dunya.”
^ Tauka “nembiak iya ti istimewa.”
^ Tauka “meransang.”
