Kira-kira enam bulan pengudah John berengkah nginjil, Jesus diatu ke kira-kira beumur 30 taun, mansang ngagai iya ba Sungai Jordan. Nama kebuah Jesus mansang ngagai John? Kati iya ngabas petunggal iya tauka deka meda pemansang pengawa nginjil John? Ukai, Jesus deka minta John maptisa iya.

Tang, John nulak peminta nya, lalu madah: “Nuan ke patut maptisa aku. Nama kebuah nuan datai ngagai aku?” (Matthew 3:14) Iya nemu Jesus nya Anak Petara. Lebuh John agi dalam kandung indai iya, iya engkebut gaga ati lebuh Maria ke benung ngandungka Jesus datai ngabas indai iya. Indai John tentu udah madahka pekara nya ngagai iya. Iya mega tentu nemu pasal melikat ke madahka pengada Jesus sereta pasal bala melikat ke ayan ba mua pengibun bedus maya malam Jesus ada.

John semina maptisa orang ke nesal ati ari dosa sida. Nya alai John enggai ngereja utai ke dipinta Jesus, laban Jesus enda bedosa. Tang Jesus nyaut: “Diatu, awakka baka nya dulu. Laban ngena chara nya, kitai deka ngamatka semua utai ti dikedekaka Petara.”—Matthew 3:15.

Nama kebuah Jesus patut dibaptisa? Iya enda bedosa. Nyadi, iya ukai dibaptisa kena nunjukka diri nesal ati ketegal dosa. Tang iya dibaptisa kena nunjukka iya nyerahka diri ngereja peneka Apai iya. (Hebrew 10:5-7) Suba Jesus nya siku tukang kayu, tang diatu iya sedia deka ngereja pengawa ke diberi Apai iya. Kati John udah nemu utai ti deka nyadi lebuh iya maptisa Jesus?

Ku John: “Petara ke nganjung aku ngambika maptisa ngena ai udah bejaku ngagai aku: ‘Lebuh nuan meda kuasa kudus Petara nurun ngagai sesiku orang lalu mengkang ba atas iya, iya meh orang ke deka maptisa ngena kuasa kudus Petara.’” (John 1:33) Amat, John nganti kuasa kudus Petara nurun ba atas sesiku orang. Nya alai, iya enda tekenyit lebuh “kuasa kudus Petara ke baka burung achang nurun ngagai Jesus” lebuh Jesus pansut ari ai.—Matthew 3:16.

 John mega meda ‘langit tebuka.’ Utai tu engka mai reti, lebuh Jesus dibaptisa, iya ulih ingat baru pengidup iya ba serega ke nyadi Anak Petara, nyengkaum pemendar ke diajar Petara ngagai iya sebedau iya nurun ke dunya.

Kelimpah ari nya, lebuh Jesus dibaptisa, bisi nyawa ari serega bejaku: “Tu Anak ke dikesayauka Aku. Aku gaga ati ke iya.” (Matthew 3:17) Nyawa sapa nya? Tu tentu ukai nyawa Jesus laban iya ngimbai John. Nyawa nya nyawa Petara. Endang terang, Jesus nya ukai Petara tang iya Anak Petara.

Baka Adam, Jesus nya anak Petara maya iya ba dunya. Luke nulis: “Umur Jesus kira-kira 30 taun lebuh iya belabuh ngereja pengawa nginjil. Nitihka penemu orang, iya anak Josep; anak Heli; anak David; anak Abraham; anak Noah; anak Adam; anak Petara.”—Luke 3:23-38.

Adam nya “anak Petara,” pia mega enggau Jesus. Tang pengudah Jesus dibaptisa, iya mega Anak Petara secara rohani laban iya bisi kaul ti baru enggau Petara. Nya alai iya ulih ngajar pemendar Bup Kudus sereta ngiring kitai ngagai tuju pengidup ti bendar. Jesus belabuh ngereja pengawa nginjil lalu ke pengujung iya, iya nyerahka nyawa iya kena nebus dosa mensia.