Jesus meri iring ngagai bala rasul iya pasal chara sida patut bejalaika pengawa nginjil. Maya nya, sida bejalai dua iku dua iku. Tang Jesus mega madah ngagai sida pasal utai bukai. Jesus meri jaku tangkan ngagai sida pasal orang ke deka nyakal sida, ku iya: “Kingatka! Aku ngasuh kita bejalai baka bedus ngagai raban serigala. . . . Kita patut bejimat, laban orang deka mai kita ngagai kot, lalu sida deka nyipat kita dalam balai gempuru sida. Kita deka dibai ngagai gabenor enggau raja ketegal aku.”—Matthew 10:16-18.

Bala murid Jesus deka balat diperinsa. Tang Jesus madahka semaya tu ngagai sida, ku Jesus madahka: “Lebuh sida nangkap kita, anang irauka utai ke deka disebut kita tauka chara kita deka nyebut iya. Laban maya nya, baru kita deka nemu utai ke patut disebut kita. Laban ukai semina kita ke bejaku, tang kuasa kudus ari Apai kita ti bejaku nengah kita. Orang deka nyerahka menyadi diri ngambika dibunuh, apai deka nyerahka anak iya empu ngambika dibunuh, lalu anak deka ngelaban apai indai, lalu nyerahka sida ngambika dibunuh. Semua orang deka begedika kita ketegal nama aku. Tang orang ke tan datai ke ujung, deka diselamatka.”—Matthew 10:19-22.

Pengawa nginjil nya pengawa ti pemadu penting. Nya alai, Jesus madahka bala murid iya patut bejimat ngambika sida ulih terus ngereja pengawa nginjil enggau bibas. Ku iya: “Lebuh sida merinsaka kita ba nengeri siti, rari meh ngagai nengeri siti. Enggau bendar aku madah ngagai kita: Anak Mensia deka datai, sebedau kita ulih nembuka pejalai kita ngagai semua nengeri ba menua Israel.”—Matthew 10:23.

Amaran ke diberi Jesus, enggau iring sereta jaku peransang iya ngagai 12 iku rasul iya amat manah! Iya ke amat, jaku nya mega bisi reti ngagai sida ke deka neruska pengawa nginjil pengudah Jesus mati sereta diangkatka idup baru. Kitai ulih nemu tu laban Jesus madah ngagai bala murid iya “semua orang deka begedika kita.” Taja pia, jaku Jesus ukai semina dituju ngagai sida ke ditemu bala rasul maya sida baru berengkah nginjil. Nambahka nya mega, kitai nadai macha pasal bala rasul dibai ngagai gabenor enggau raja maya sida ngereja pengawa nginjil ba Galili. Pia mega, ruang bilik sida enda nyerahka sida ngambika dibunuh ba maya nya.

Kebendar iya, Jesus berunding pasal utai ke deka nyadi jemah ila lebuh iya ngajar bala rasul iya. Ari jaku Jesus, kitai nemu semua murid Jesus deka terus nginjil nyentuk ngagai maya “Anak Mensia deka datai.” Reti iya pengawa nginjil pasal Perintah Petara deka terus dipejalaika nyentukka maya Raja Jesus Kristus datai  nyadi hakim ke dipilih Petara kena ngakim semua mensia.

Lebuh ngereja pengawa nginji, bala rasul enda patut tekenyit lebuh sida disakal orang. Tu ketegal Jesus madahka: “Nadai murid ke manah agi ari pengajar iya, lalu nadai ulun ke manah agi ari tuan iya.” Jesus empu diperinsa sereta disakal ketegal iya nginjil pasal Perintah Petara. Nya alai, bala murid iya mega deka napi utai ti sama. Tang Jesus meransang bala murid iya: “Anang takutka sida ke ulih munuh tubuh tang enda ulih munuh nyawa. Tang kita patut nangika Petara, ti ulih ngerusakka tubuh enggau nyawa kita ba Gehena.”—Matthew 10:24, 28.

Jesus netapka teladan ti manah lebuh iya disakal. Iya enda takut mati laban iya deka terus setia ngagai Jehovah. Ketegal Jehovah nya Petara ti Pemadu Bekuasa, Iya ulih ngemunaska “nyawa” sesiku orang (peluang orang ngambika ulih idup belama iya) tauka ngidupka baru orang ke udah mati ngambika iya ulih idup meruan. Tu tentu ngeringka pengarap semua rasul Jesus!

Tu meh chara Jesus nunjukka pengerindu sereta pengibuh Petara ngagai semua murid Iya. Ku Jesus: “Endaka dua iku burung pipit dijual enggau rega sesingkap duit seling ke mit rega? Tang taja pan siku ari burung nya labuh ke tanah, Apai kita deka nemu pasal nya. . . . Nya alai, anang takut. Kita jauh berega agi ari mayuh burung pipit.”—Matthew 10:29, 31.

Pesan ke ditusui bala murid Jesus deka mechahka ruang bilik. Tu ketegal sekeda ari diri sebilik deka nerima pesan nya, tang sekeda enggai. Jesus madahka: “Anang ngumbai aku datai mai pengelantang ngagai dunya.” Nya alai, sesiku orang patut berani enti iya deka nerima pemendar Bup Kudus. Ku Jesus: “Barang sapa rinduka apai tauka indai diri lebih agi ari rinduka aku, enda ulih nyadi murid aku. Pia mega, barang sapa rinduka anak lelaki tauka anak indu diri lebih agi ari rinduka aku, enda ulih nyadi murid aku.”—Matthew 10:34, 37.

Taja pia, sekeda orang deka nerima murid Jesus enggau manah. Ku Jesus madah: “Barang sapa meri sechangkir ai chelap ngagai siku ari murid aku, enggau bendar aku madah ngagai kita: Iya tentu deka nerima upah iya.”—Matthew 10:42.

Bala rasul udah disikap enggau manah pengudah Jesus meri sida amaran, iring, sereta jaku peransang. Pengudah nya, sida mupuk lalu “bejalai ari siti genturung pendiau ngagai siti genturung pendiau, ngambika sida nusui Berita Manah sereta ngeraika orang ba dini-dini endur.”—Luke 9:6.