Ba malam ti penudi Jesus begulai enggau bala rasul iya, iya ngajar sida pasal pemaruh ati lebuh iya masu kaki sida. Jesus ngereja nya laban bala rasul iya bisi siti pengelemi. Taja pan sida rinduka Petara, tang sida agi bekelikuh pasal sapa ke pemadu besai entara sida. (Mark 9:33, 34; 10:35-37) Lalu utai tu nyadi sekali agi ba malam nya.

Bala rasul “balat bekelikuh pasal sapa entara sida ke pemadu besai.” (Luke 22:24) Jesus tentu tusah ati meda sida belaya baru. Nyadi, nama utai ke digaga Jesus maya nya?

Ari ke nganu bala rasul ketegal nya, Jesus enggau sabar madah ngagai sida: “Bala raja orang bansa bukai bekuasa atas pengidup rayat sida, lalu sida ke merintah dikumbai orang ke ngereja utai ti manah ngagai orang bukai. Tang kita enda tau baka nya. . . . Ni bagi orang ke besai agi? Orang ke makai ba mija tauka orang ke ngintu iya?” Udah nya, Jesus ngingatka sida pasal teladan iya empu lebuh iya madah: “Tang ba bala kitai, aku meh ke ngintu kita.”—Luke 22:25-27.

Taja pan sida enda sempurna, tang sida selalu bisi enggau Jesus napi mayuh penusah. Nyadi, Jesus madahka: “Apai aku ke udah ngaga sempekat enggau aku deka meri aku siti perintah, aku mega deka ngaga sempekat enggau kita.” (Luke 22:29) Bala rasul Jesus setia nitihka iya. Iya ngasuh sida yakin, nengah sempekat ke digaga iya, sida deka merintah enggau iya ba Perintah Petara.

Taja pan bala rasul bisi harapan ti istimewa, tang sida agi mensia ti enda sempurna. Nya alai, Jesus madah ngagai sida: “Sitan udah minta deka nampi semua kita baka gandum.” (Luke 22:31) Iya mega nangkan sida: “Malam tu, semua kita deka ninggalka aku magang, ketegal utai ke deka nyadi ba aku. Laban endang udah ditulis: ‘Aku deka nyerang pengibun bedus, lalu raban bedus iya deka pambar.’”—Matthew 26:31; Sekariah 13:7.

Taja pia, Peter madah ngagai Jesus: “Taja pan semua sida ke bukai deka ninggalka nuan, ketegal utai ke deka nyadi ba nuan, tang aku enda sekali-kali deka ninggalka nuan!” (Matthew 26:33) Jesus madah ngagai Peter, sebedau manuk engkukuk dua kali, Peter deka madahka diri enda ngelala iya. Taja pia, Jesus madah: “Aku udah bebendar minta ngagai Petara ngarika nuan, ngambika nuan enda lenyau pengarap. Sepengudah nuan nesal ati, keringka pengarap bala menyadi nuan.” (Luke 22:32) Tang Peter madah: “Enti sema aku patut mati enggau nuan, enda meh aku madahka diri enda ngelala nuan.” (Matthew 26:35) Bala rasul ke bukai mega madahka utai ti sama.

Jesus madah ngagai bala murid iya: “Aku deka enggau kita enda lama aja. Kita deka ngiga aku, tang baka ke udah dipadah aku ngagai orang Judah, aku mega deka madah ngagai kita diatu, ‘Kita enda ulih datai ngagai endur ke dituju aku.’” Udah nya, iya madah: “Aku meri kita siti pesan ti baru: Kita patut rinduka pangan diri. Baka aku ke udah rinduka kita, kita mega patut rinduka pangan diri. Enti kita rinduka pangan diri, semua orang deka nemu, kita meh murid aku.”—John 13:33-35.

Lebuh Peter ninga Jesus deka enggau sida enda lama aja, iya nanya: “Tuan, kini ke nuan?” Jesus nyaut: “Diatu nuan enda ulih nitihka aku ngagai endur ke deka dituju aku. Tang ila, baru nuan ulih nitihka aku.” Taja pia, Peter enda meretika jaku Jesus, lalu iya madah: “Tuan, nama kebuah aku enda ulih nitihka nuan diatu? Aku sanggup nyerahka nyawa diri ke nuan.”—John 13:36, 37.

 Pengudah nya, Jesus nyebut pasal maya iya kala nganjung bala rasul iya nginjil ba Galili. Maya nya, iya enda ngasuh sida mai kambut duit tauka kambut pemakai. (Matthew 10:5, 9, 10) Ku iya nanya sida: “Kati kita bisi kurang nama-nama utai?” Sida madah: “Nadai!” Tang nama utai ke diasuh Jesus ngagai sida pengudah iya mupuk? Iya madah: “Orang ke bisi kambut duit tauka kambut pemakai patut mai utai nya. Lalu orang ke nadai pedang, patut nyual gari luar iya kena meli pedang. Endang udah ditulis: ‘Iya deka dikumbai orang jai.’ Aku madah ngagai kita, ayat tu bejaku pasal aku. Kebendar nya, utai ke ditulis pasal aku tu benung dikeamatka.”—Luke 22:35-37.

Iya ke amat, Jesus merujuk ngagai maya iya deka dipantang ba tiang enggau orang ke jai. Pengudah nya, bala murid iya deka balat disakal. Tang sida ngasaika diri udah besedia. Ku sida: “Tuan, peda nuan. Ditu bisi dua iti pedang.” Ku Jesus nyaut sida: “Nya pan udah chukup.” (Luke 22:38) Lalu, dua iti pedang nya deka meri Jesus peluang ngajar sida siti da agi utai ti beguna.