Mayuh orang ngumbai Saksi-Saksi Jehovah nya siti pengarap ti baru. Tang, lebih ari 2,700 taun ti udah, nembiak Petara ti bendar dikumbai “saksi.” (Isaiah 43:10-12) Datai ke taun 1931, kami dikumbai Nembiak Bup Kudus. Taja pia, nama kebuah kami dikumbai Saksi-Saksi Jehovah?

Nama tu nunjukka sapa Petara kami. Nitihka manuskrip jeman kelia, nama Petara, Jehovah, bisi ayan beribu kali dalam Bup Kudus. Dalam mayuh salin Bup Kudus, nama Iya udah ditukar ngena gelar Tuan tauka Tuhan. (Bacha Jaku Penerang Bup Kudus, “Tuhan.”) Tang, Petara ti bendar udah ngayanka diri ngagai Moses ngena nama Iya ti bendar, ku Jehovah: “Tu nama Aku, lalu nama tu deka meruan belama iya.” (Pemansut 3:15) Enggau tu, Iya nunjukka Diri enda sebaka enggau semua petara pelesu. Kami enggau gaga ati ngena nama Petara ti kudus.

Nama tu nerangka pengawa kami. Kelia menya, belabuh ari Abel, mensia ke lurus ati, udah meri saksi pasal pengarap sida ngagai Jehovah. Sida tu nyengkaum Noah, Abraham, Sarah, Moses, David, enggau mayuh agi saksi ke bukai. (Hebrew 11:4–12:1) Baka seiku orang ke nyadi saksi ba rumah bechara, besaksika orang ke enda salah, pia mega kami deka madahka pemendar pasal Petara kami.

Kami nitihka teladan Jesus. Bup Kudus ngumbai Jesus saksi ke tetap ati sereta bendar. (Pemandang 3:14) Jesus empu madahka iya ‘udah ngasuh sida nemu nama Petara’ sereta terus besaksika pemendar pasal Petara. (John 17:26; 18:37) Nya alai, bala murid Jesus ke bendar enda tau enda ngena sereta madahka nama Jehovah ngagai orang bukai. Tu meh pengawa ke deka dikereja Saksi-Saksi Jehovah.

• Nama kebuah Nembiak Bup Kudus ngena nama Saksi-Saksi Jehovah?

• Berapa lama Jehovah udah bisi saksi ba dunya tu?

• Sapa Saksi Jehovah ti pemadu nyulut?