Berapa iku Saksi-Saksi Jehovah dikelala nuan? Sekeda ari kami engka orang ke diau semak rumah nuan, sama enggau nuan kereja tauka sekelas enggau nuan. Tauka kami kala berandau pasal Bup Kudus enggau nuan. Sapa kami ke bendar, lalu nama kebuah kami bekunsi pasal pengarap kami?

Kami sama baka kita. Kami datai ari mayuh macham chara pengidup enggau adat. Sekeda ari kami suba bisi megai pengarap ti bukai, bisi mega sida ti nadai pengarap. Tang, sebedau nyadi Saksi-Saksi Jehovah, kami meri awak belajarka Bup Kudus enggau bebendar. (Kereja Rasul 17:11) Kami setuju enggau utai ke dipelajarka, lalu milih deka nyembah Petara Jehovah.

Kami bulih penguntung ari belajarka Bup Kudus. Baka orang bukai, kami mega bisi penusah enggau pengurang diri empu. Tang, laban kami nguji nitihka prinsip Bup Kudus ninting hari, kami ngasaika kualiti pengidup kami manah agi. (Masmur 128:1, 2) Nya siti ari kebuah kami deka bekunsika utai manah ke udah dipelajarka kami ari Bup Kudus enggau semua orang.

Kami nitihka ajar ari Petara. Prinsip Bup Kudus nulung kami bebasaka orang bukai, ngembuan ulah ti lurus sereta manah ati. Prinsip Bup Kudus mega ulih ngasuh nuan nyadi orang ke manah ba endur nuan diau, meransang penyerakup ba diri sebilik, sereta ngemansangka ulah ti manah. Kami pechaya ‘Petara endang amat enda bepilih mata.” Ba serata dunya, kami bisi menyadi ke sama pengarap, nadai ngira bansa tauka politik. Taja pan kami datai ari mayuh macham bansa, tang kami ulih begulai manah enggau pangan diri.—Kereja Rasul 4:13; 10:34, 35.

• Nama utai ti sama ba Saksi-Saksi Jehovah enggau orang bukai?

• Nama penguntung udah diulih Saksi-Saksi Jehovah ari belajarka Bup Kudus?