Baka ke udah dipelajar nuan ba bup tu, Bup Kudus ngembuan mayuh ajar ti ulih nulung nuan enggau diri sebilik. Jehovah deka nuan gaga ati. Iya besemaya enti nuan ngemeranka sembah ngagai Iya, “semua utai nya deka mega diberi” ngagai nuan. (Matthew 6:33) Jehovah deka nuan nyadi pangan Iya. Ngena semua peluang ti bisi ngambika bulih kaul ti manah enggau Petara. Tu peluang ti pemadu manah.​—Matthew 22:37, 38.

NAMA DIPADAH BUP KUDUS: ‘Aku deka nyadi Apai kita, lalu kita deka nyadi anak lelaki enggau anak indu Aku, ku Jehovah.’ (2 Korint 6:18) Enti nuan deka nyadi pangan rapat Petara, besampi meh ngagai Iya. Jehovah ngasuh nuan “seruran besampi.” (1 Tesalonika 5:17) Iya keran deka ninga utai ti ngirauka ati nuan. (Pilipi 4:6) Enti nuan besampi enggau diri sebilik, sida deka meda nuan endang arapka Jehovah.

Kelimpah ari besampi ngagai Petara, nuan patut ningaka Iya. Nuan ulih ningaka Iya enggau belajarka Bup Kudus sereta litaricha ke ngembuan ajar Bup Kudus. (Masmur 1:1, 2) Belematika utai ti dipelajar nuan. (Masmur 77:11, 12) Ningaka Petara mega reti iya nuan patut seruran datai ngagai gempuru Kristian.​—Masmur 122:1-4.

Madah ngagai orang bukai pasal Jehovah mega siti chara nuan ulih ngeringka kaul enggau Iya. Suah agi nuan ngereja tu, nuan deka ngasaika diri semak agi ngagai Iya.​—Matthew 28:19, 20.

NAMA PATUT DIGAGA NUAN:

• Netapka jam macha Bup Kudus enggau besampi ninting hari

• Ngemeranka peneka Petara lebih agi ari pemerindang ba diri sebilik

NAMA DIPADAH BUP KUDUS: ‘Datai semak ngagai Petara, lalu Iya deka datai semak ngagai kita.’ (James 4:8) Nuan patut netapka jam, lalu seruran nitihka program nyembah Petara enggau diri sebilik. (Pemungkal 18:19) Ukai semina nya aja, Petara mega patut seruran ba pengidup nuan ninting hari. Keringka kaul kita sebilik enggau berandauka pasal Petara “lebuh kita di rumah, enggau lebuh kita bejalai kebukai, lebuh kita belelak, enggau lebuh kita gawa.” (Ulang Adat 6:6, 7) Nuan patut nitihka teladan Josua. Ku iya: ‘Aku enggau semua kami sebilik deka betuaika Jehovah.’​—Josua 24:15.

NAMA PATUT DIGAGA NUAN:

• Terus belajar Bup Kudus, nitihka utai ti diguna diri sebilik