1. Nama tanya ke ulih ditanya kitai empu?

 KATI nuan kala berasai irau pasal utai ke deka nyadi jemah ila, baka lebuh pengarap pelesu dirusak, serang ari Gok sereta perang Armagedon? Kala nuan nanya diri empu, ‘Lebuh semua utai tu nyadi, kati aku ulih mengkang tetap ati?’ Enti nuan kala berundingka nya, jaku Jesus ba ayat tema artikel tu ulih nulung nuan. Ku Jesus madah ngagai bala murid iya: ‘Anang tusah ati. Arapka Petara.’ (Jhn. 14:1) Pengarap ti tegap deka nulung kitai tan napi sebarang utai ke deka nyadi jemah ila.

 2. Baka ni kitai ulih negapka pengarap diri, lalu nama deka dikerandauka kitai ba artikel tu?

² Baka ni kitai ulih negapka pengarap diri? Enti nuan benung napi penguji diatu, baka ni chara nuan mutarka nya? Kati bisi utai ke patut dikemansangka nuan ngambika pengarap nuan ulih majak tegap agi? Tiap kali kitai mujur mutarka penguji, pengarap kitai deka tegap agi. Enggau nya, kitai deka senang agi tan lebuh napi penanggul ke deka datai. Ba artikel tu, kitai deka bejuraika empat iti situasi ke ditapi bala murid Jesus, ke nunjukka sida begunaka mayuh agi pengarap. Enti sema kitai napi situasi ti sama baka sida, baka ni kitai ulih mutarka nya? Lalu baka ni nya ulih nyikap kitai napi utai ke deka nyadi?

 3. Nitihka Matthew 6:30, 33, nama dipadah Jesus pasal pengarap?

³ Tuai bilik bisi tanggung pengawa nyediaka pemakai, gari sereta alai endur diau ke bini sereta bala anak iya. Tang tu enda senang dikereja ba maya ti tusah tu. Sekeda bala menyadi Kristian kitai udah nadai kereja. Taja pan sida bebendar ngiga kereja, tang bedau ulih tetemuka kereja. Sekeda nulak kereja ke enda ngena ba orang Kristian. Lebuh utai tu nyadi, kitai patut andal Jehovah deka nyediaka utai ke diguna ruang bilik kitai. Jesus nerangka utai tu ngagai bala murid iya lebuh iya meri Ajar ba Atas Bukit. (Bacha Matthew 6:30, 33.) Lebuh kitai enggau pengabis ati andalka Jehovah enda ninggalka kitai, kitai ulih ngenuluka Perintah Petara ba pengidup. Lebuh kitai meda chara Jehovah nyediaka utai ke diguna kitai, kitai deka semak agi ngagai Jehovah lalu pengarap kitai mega deka majak tegap.

4-5. Nama nulung siti ruang bilik lebuh sida berasai irau pasal utai ke diguna sida?

⁴ Peratika baka ni siti ruang bilik ba Venezuela ngasaika tulung ari Jehovah lebuh sida berasai irau pasal utai ke diguna ba pengidup besehari-hari. Suba, Miguel sebilik beridup ari utai ke ditanam sida. Tang udah nya, bisi sekeda lelaki ke besenyata ngerampas tanah sida lalu muru sida. Ku Miguel madahka: “Diatu kami gawa ba tanah ti mit ke diinjau kami ari orang bukai. Tiap pagi aku besampi ngagai Jehovah, minta Iya nyediaka utai ke diguna kami sebilik sehari nya.” Pengidup Miguel sebilik amat tusah, tang sida andal Jehovah ulih meri utai ke diguna sida. Sida ngenuluka Perintah Petara ba pengidup enggau seruran datai begempuru sereta nginjil, lalu Jehovah nyediaka utai ke diguna sida sebilik.

⁵ Ba maya ti tusah nya, Miguel enggau bini iya Yurai, betatika chara Jehovah udah nyaga sida sebilik. Kekadang, Jehovah ngena bala menyadi Kristian meri sida utai ke diguna tauka nulung Miguel ngiga kereja. Ba maya bukai, Jehovah meri utai ke diguna sida nengah pampang opis. Jehovah nadai kala ninggalka sida. Ketegal nya, Miguel enggau Yurai ulih meda pengarap sida sebilik majak tegap. Pengudah ngenang baru siti chara Jehovah udah nulung sida, anak indu sida ke tuai ke benama Yoselin madahka: “Aku berasai diperansang meda chara Jehovah nulung kami. Iya Pangan aku lalu aku andal Iya deka seruran nulung aku. Utai ke ditapi kami sebilik diatu nyikap kami ke penguji ti besai agi jemah ila.”

 6. Baka ni nuan ulih negapka pengarap nuan lebuh napi penanggul ba penatai pemisi?

⁶ Kati nuan benung napi penanggul ba penatai pemisi? Tu tentu maya ti tusah ba nuan. Taja pia, nuan ulih ngena maya tu negapka pengarap nuan. Baka ni chara iya? Besampi meh ngagai Jehovah. Nuan mega tau macha sereta belematika jaku Jesus ba Matthew  6: 25-34. Peratika mega pengalaman bala menyadi Kristian kemayaharitu. Taja pan sida bisi penanggul ba penatai pemisi, Jehovah agi nyediaka utai ke diguna sida lebuh sida bebendar gawa ke Iya. (1 Kor. 15:58) Enti nuan ngereja nya, nuan deka andal agi Jehovah deka nulung nuan, baka Iya ke udah nulung menyadi bukai ke napi penanggul ti sama. Iya nemu utai ke diguna nuan, sereta chara deka nyediaka nya. Lebuh nuan ngasaika tulung Jehovah ba pengidup nuan, pengarap nuan deka majak tegap. Enggau nya, nuan ulih tan lebuh napi penguji ti besai agi dudi hari.—Hab. 3:17, 18.

 7. Nitihka Matthew 8:23-26, baka ni “kabut” nguji pengarap bala murid Jesus?

⁷ Bisi sekali Jesus enggau bala murid iya nepan perau. Maya nya kabut nyadi. Jesus ngena utai ke nyadi tu nulung bala murid iya nemu sida patut negapka pengarap. (Bacha Matthew 8:23-26.) Kabut balat amat nyadi nyentukka ai tama ngagai perau sida. Tang Jesus agi tinduk enggau jenak. Bala murid iya berasai takut. Nya alai, sida ngerakka Jesus lalu minta iya nyelamatka sida. Ku Jesus nanya sida: “Nama kebuah kita takut? Mit amat meh pengarap kita.” Murid Jesus patut sedar, Jehovah ulih nyaga Jesus sereta orang ke enggau iya ari utai ti tau nganu nyawa sida. Nama ulih dipelajarka kitai? Pengarap ti tegap ulih nulung kitai tan napi sebarang penanggul, enda ngira nya kabut ti amat tauka penanggul ti besai ke tau disemaka baka kabut.

8-9. Baka ni pengarap Anel diuji, lalu nama utai ke nulung iya?

⁸ Peratika pengalaman seiku menyadi indu ke benama Anel, ari Puerto Rico. Pengarap iya majak tegap pengudah iya tan napi penanggul ti besai. Kena taun 2017, rumah Anel dirusak Taufan Maria. Ketegal taufan nya mega, iya lenyau kereja. Anel madahka, “Lebuh nya nyadi, aku berasai balat irau. Tang aku belajar bepanggai ba Jehovah ngena sampi lalu enda ngelakka pengirau nagang aku ari ngereja utai ke patut digaga aku.”

⁹ Anel mega madahka, ulah ti ngasi udah nulung iya tan napi penanggul. Ku iya madah: “Lebuh aku nitihka iring ari gerempung Jehovah, tu nulung aku berasai tenang. Jehovah ngena bala menyadi Kristian nulung aku. Sida meransang aku sereta meri utai ke diguna kena beridup. Utai ke diberi Jehovah lebih agi ari utai ke dipinta aku, lalu nya ngasuh pengarap aku majak tegap.”

10. Nama ulih digaga nuan enti nuan bisi napi penanggul ti besai?

¹⁰ Kati nuan benung napi penanggul ti besai ba pengidup? Engka diatu nuan benung napi pemerinsa ketegal pengerusak alam. Tauka nuan benung napi penyakit raya ke ngasuh nuan berasai asa sereta enda nemu nama utai ke patut digaga. Nuan engka berasai  balat irau. Tang anang ngelakka utai nya ngasuh nuan badu arapka Jehovah. Mengkang semak ngagai Jehovah nengah sampi. Perundingka baru chara Jehovah udah nulung nuan suba lalu tu ulih negapka pengarap nuan. (Mas. 77:11, 12) Nuan tentu ulih andal Jehovah enda sekali-kali ninggalka nuan.

11. Nama kebuah kitai keran deka ngasi ngagai sida ke ngiring?

¹¹ Nama utai bukai ke ulih nulung nuan tan napi penanggul? Baka ke dipadah Anel, ulah ti ngasi udah nulung iya. Belajar meh andalka menyadi ke udah dipilih Jehovah enggau Jesus ngiring kitai. Kekadang, sida ke ngiring meri iring ke tusah diterima kitai. Taja pia, Jehovah merekatka orang ti ngasi. Ari utai ti dibacha ba Bup Kudus enggau pengalaman nembiak Iya ke tetap ati, kitai nemu ulah ti ngasi ulih nyelamatka nyawa. (P-sut. 14:1-4; 2 Ban. 20:17) Lebuh kitai belematika tu, kitai deka keran agi ngasika iring gerempung diatu sereta jemah ila. (Heb. 13:17) Enggau tu, nuan enda ibuh agi takutka penusah ti besai ke deka datai.—J-lam. 3:25.

12. Nitihka Luke 18:1-8, nama kaul entara tan napi ulah ti enda lurus enggau ngembuan pengarap?

¹² Jesus nemu ulah ti enda lurus deka nguji pengarap bala murid iya. Kena nulung sida tan, Jesus madahka pasal sempama ke bisi ditulis ba bup Luke. Jesus madahka pasal seiku indu balu ke enda ngetu-ngetu minta seiku hakim mutarka ulah ti enda lurus. Iya pechaya enti iya enda ngetu minta tulung, hakim nya deka nulung iya. Lalu utai nya amat nyadi. Nama ulih dipelajarka kitai? Jehovah Petara ti lurus. Nya alai Jesus madahka: ‘Enda ka Petara deka nulung bala nembiak Iya, ke nyabak ngangauka Iya siang malam?’ (Bacha Luke 18:1-8.) Udah nya ku Jesus agi: ‘Lebuh Anak Mensia datai, kati iya deka tetemuka orang ke arap di dunya tu?’ Lebuh kitai napi ulah ti enda lurus, kitai patut ngayanka diri bisi pengarap ti tegap baka indu balu nya. Kitai nunjukka nya lebuh kitai liat ati sereta terus tan. Kitai andal Jehovah tentu deka nulung kitai ba maya ti ngena. Kitai mega patut andal enggau kuasa sampi. Kekadang, Jehovah deka nyaut sampi kitai enggau chara ti enda disadang.

13. Baka ni sampi nulung siti ruang bilik lebuh napi ulah ti enda lurus?

¹³ Peratika utai ke nyadi ba seiku menyadi indu ke benama Veronica, ke diau ba Republik Demokratik Congo. Kampung iya diserang seraban soldadu. Ketegal nya, Veronica enggau laki iya ke ukai Saksi sereta anak indu seduai iya ke beumur 15 taun patut ngerarika diri. Lebuh sida ba rantau jalai, sida menyanak ditan raban soldadu. Bala soldadu nya ngemba deka munuh sida. Lebuh Veronica berengkah nyabak, anak indu iya besampi enggau inggar lalu suah nyebut nama Jehovah dalam sampi iya. Maya iya badu besampi,  tuai soldadu nanya anak indu nya: “Endu, sapa ke ngajar nuan besampi?” Ku anak indu nya nyaut: “Indai aku. Kami ngena chunto sampi ke bisi ba Matthew 6:9-13.” Tuai soldadu nya madah: “Endu, mupuk meh kita, lalu ngarapka Jehovah, Petara kita nyaga kita!”

14. Nama ulih nguji pengarap kitai, lalu nama ulih nulung kitai tan napi penanggul?

¹⁴ Utai ke nyadi ba Veronica sebilik ngajar kitai kebuah sampi amat beguna. Tang baka ni enti sampi nuan enda disaut tekala nya tauka enggau chara ti ngalitka ati? Baka indu balu ba sempama Jesus, anang meh ngetu besampi. Andal meh Petara enda sekali-kali ninggalka nuan. Iya tentu deka nyaut sampi nuan. Terus meh minta roh kudus ari Jehovah. (Plp. 4:13) Kingatka, enda lama da agi Jehovah deka merekatka nuan lalu nuan enda ingat agi ke pemerinsa ti kala ditapi nuan. Lebuh nuan tan napi penanggul ketegal tulung ari Jehovah, nuan deka nyadi kering agi. Lalu nuan mega ulih tan napi penguji ke deka datai dudi hari ila.—1 Pet. 1:6, 7.

15. Nitihka Matthew 17:19, 20, nama penanggul ke ditapi bala murid Jesus?

¹⁵ Jesus deka bala murid iya nemu, pengarap ulih nulung sida mutarka penusah. (Bacha Matthew 17:19, 20.) Bala murid Jesus kala muru antu. Tang bisi sekali, sida enda ulih ngereja nya. Nama penanggul iya? Jesus nerangka sida begunaka mayuh agi pengarap. Enti pengarap sida chukup tegap, sida ulih mujur mutarka sebarang penanggul, indah penanggul ti baka bukit ti besai! Kemayaharitu, kitai mega engka napi penanggul ke ngasuh kitai tusah deka betan.

16. Baka ni pengarap nulung Geydi betan pengudah laki iya mati dibunuh?

¹⁶ Peratika utai ke nyadi ba seiku menyadi indu ke benama Geydi, ari Guatemala. Laki iya Edi, mati dibunuh lebuh seduai iya pulai ari gempuru. Baka ni pengarap nulung Geydi betan taja pan iya balat tusah ati? Iya madahka: “Sampi nulung aku nyerahka semua penusah ngagai Jehovah. Tu ngasuh aku berasai lantang agi ati. Aku ulih ngasaika pengibuh Jehovah nengah ruang bilik aku sereta bala menyadi Kristian ba eklisia. Aku mega seruran ngereja pengawa ke Jehovah. Tu nulung nyumanka pemerinsa ba ati aku, nulung aku betan sereta enda berasai irau pasal utai ke deka nyadi pagila. Ari utai ke nyadi, aku nemu aku ulih betan enggau tulung ari Jehovah, Jesus sereta gerempung Iya enda ngira nama penguji ke datai dudi hari ila.”

17. Nama ulih digaga kitai lebuh napi penusah?

¹⁷ Kati nuan benung merinsa ketegal orang ke dikesayauka nuan udah nadai? Uji meh ngena awak negapka pengarap nuan pasal pengangkat ari mati. Nuan ulih macha pasal orang ke diangkatka idup baru dalam Bup Kudus. Kati nuan tusah ati ketegal seiku ari diri sebilik nuan dibuai ari gerempung? Enti pia,  bebendar meh belajarka Bup Kudus ngambika nuan ulih andal chara Petara ngenataika disiplin seruran manah. Enda ngira nama penusah ke ditapi nuan, kena meh peluang nya ngemansangka pengarap nuan. Bantaika semua asai ati nuan ngagai Jehovah. Begulai meh enggau bala menyadi Kristian, anang kediri. (J-lam. 18:1) Kereja utai ke ulih nulung nuan betan, taja pan nuan engka nyabak lebuh teringatka utai ke udah nyadi ba nuan. (Mas. 126:5, 6) Terus meh datai begempuru, nginjil sereta macha Bup Kudus. Perundingka berekat ke deka diberi Jehovah ngagai nuan jemah ila. Lebuh nuan meda chara Jehovah nulung nuan diatu, pengarap nuan ngagai Iya deka tegap agi.

18. Enti nuan nemu pengarap diri kurang, nama ulih digaga nuan?

¹⁸ Lebuh nuan napi penanggul, nuan engka sedar pengarap nuan kurang. Enti tu nyadi, anang asa ati. Tang kena meh peluang tu negapka pengarap diri. Nuan ulih minta utai ti sama baka bala rasul Jesus: “Tambahka pengarap kami.” (Luk. 17:5) Pia mega, perundingka baru utai ke nyadi ngagai bala menyadi Kristian ba artikel tu. Baka Miguel enggau Yurai, seruran ingat chara Jehovah udah nulung nuan. Baka Anel enggau anak indu Veronica, suah meh besampi ngagai Jehovah, kelebih agi lebuh napi penanggul ti besai. Lalu baka Geydi, peda meh tulung Jehovah nengah diri sebilik tauka bala menyadi Kristian. Lebuh nuan ngelakka Jehovah nulung nuan betan napi penusah diatu, nuan deka arap agi Iya tentu nulung nuan betan napi sebarang penusah dudi hari ila.

19. Nama utai diandalka Jesus, lalu nama ulih diandalka nuan?

¹⁹ Jesus nulung bala murid iya nemu, sida begunaka mayuh agi pengarap. Jesus mega andal Jehovah deka nulung sida mujur napi sebarang penanggul. (Jhn. 14:1; 16:33) Iya mega pechaya lebuh penusah ti besai nyadi, seraban orang mayuh deka selamat ketegal pengarap sida ti tegap. (Pem. 7:9, 14) Kati nuan seiku ari raban orang mayuh nya? Enggau tulung ari Jehovah, nuan ulih! Enggau naka ulih meh ngemansangka sereta negapka pengarap diri diatu.—Heb. 10:39.