Petara besemaya seiku ari peturun Abraham deka mai berekat ngagai “semua bansa.” (Pemungkal 22:18) Sapa peturun Abraham nya?

Nyauka 2,000 taun ti udah, Petara meri kuasa kena ngereja pengawa ajih ngagai Jesus, ti seiku ari peturun Abraham. Pengawa ajih ti digaga iya nunjukka, semaya Petara ngagai Abraham nya deka dikeamatka nengah Jesus.—Galatia 3:14.

Pengawa ajih ke digaga Jesus nya nulung orang nemu iya udah dipilih Petara, kena mai berekat ngagai semua mensia. Tu mega nunjukka chara Petara deka ngena Jesus meri berekat ngagai mensia belama iya. Peratika kualiti Jesus ke diayanka nengah pengawa ajih iya.

Penelap—Jesus ngeraika orang ke sakit.

Bisi sekali, seiku lelaki ke sakit lan minta Jesus ngeraika iya. Jesus negu orang nya lalu nyaut: “Aku deka.” Tekala nya, penyakit nya lalu nadai agi.—Mark 1:40-42.

Pengerah jari—Jesus meri pemakai ngagai orang ke lapar.

Jesus enggai nejuka orang merinsa lapar. Ukai sekali aja iya ngena pengawa ajih nyadika beberapa tuku roti enggau beberapa iku ikan, chukup pemakai ke beribu iku orang. (Matthew 14:17-21; 15:32-38) Pengudah pemakai nya diempa, semua orang ke makai nya kenyang. Taja pia, teda pemakai nya agi mayuh.

Penyinu—Jesus ngangkatka orang ke udah mati.

Enggau “sinu ati,” Jesus ngidupka baru anak tunggal seiku indu balu, ti nadai orang bukai ngibun.—Luke 7:12-15.