Kati Amat Pengidup Jemah Ila Ulih Meruan Agi enti Kitai Nyadi Orang ke Manah?
Pengelama beratus taun, mayuh orang ngasaika enti sida nyadi orang ke manah sereta idup bemoral, sida deka bulih pengidup ti manah jemah ila. Chunto iya, mayuh orang ba menua Asia setuju enggau jaku Confucius (551-479 SM), seiku pakar falsafah ti tebilang: “Anang ngereja ngagai orang utai ke dikeenggaika nuan kereja orang ngagai nuan empu.” a
MAYUH ORANG MILIH JALAI PENGIDUP TU
Mayuh orang pechaya, enti sida ngereja pengawa ti manah, sida deka bulih pengidup ti manah jemah ila. Nya alai, sida enggau naka ulih ngayanka basa, mereti, betanggungjawap ngereja pengawa, sereta nyeliahka utai ke ngasuh sida berasai besalah. Linh, seiku indu ari Vietnam madahka, “Aku selalu pechaya enti aku lurus sereta enda pepura, aku deka diberekat.”
Sekeda orang ngereja utai ti manah laban nya meh ajar ba pengarap sida. Hsu-Yun, seiku lelaki ari Taiwan madahka, “Aku diajar, ulah kitai lebuh agi idup deka nentuka kitai nerima berekat tauka diperinsa pengudah kitai mati.”
NAMA ASIL IYA?
Endang amat, enti kitai ngereja utai ti manah ngagai orang bukai, kitai deka bulih mayuh berekat. Tang mayuh orang nguji ngereja utai ti manah, ngasaika sida enda dibalas enggau manah. Shiu Ping, seiku indu ari Hong Kong madahka, “Aku belajar ari penelaba aku empu, ukai reti iya orang ke ngereja pengawa ti manah selalu nerima berekat. Aku nguji enggau naka ulih nyaga diri sebilik aku sereta ngereja pemanah. Tang, tikah aku enda mujur lalu laki aku ninggalka kami menyanak.
Mayuh orang ngasaika, sida ke bisi pengarap bedau tentu nyadi orang ke manah. Etsuko, seiku indu ke diau ba menua Jepun madah, “Aku enggau siti gerija lalu nyadi tuai ba aktiviti sida ke nembiak. Tang aku tekenyit, lebuh meda orang dalam gerija idup enggau enda bemoral, bepekit berampaska kuasa, sereta salah guna enggau duit pemeri ba gerija.”
“Aku nguji enggau naka ulih nyaga diri sebilik aku sereta ngereja pemanah. Tang, tikah aku enda mujur lalu laki aku ninggalka kami menyanak.”—SHIU PING, HONG KONG
Sekeda orang ke kuat ba pengarap sereta bagas ngereja utai ti manah, berasai asa lebuh ulah manah sida enda dibalas enggau pemanah. Nya meh asai ati Van, seiku indu ari Vietnam. Iya madahka, “Ninting hari, aku meri buah, bungai, sereta pemakai ngagai peturun aku ke udah mati. Aku ngarapka sida merekat pengidup aku ke jemah ila. Tang, taja aku bagas besembiang sereta ngereja utai ti manah dalam betaun-taun, laki aku diserang penyakit ti balat. Udah nya, anak indu aku ke benung belajar ba menua bukai mati lebuh iya beumur 20 taun.
Enti nyadi orang ke manah, enda ulih nyamin pengidup ti manah jemah ila, nyadi nama utai ke ulih nulung kitai? Kitai begunaka iring ke ulih dipechaya, lalu ulih nyaut tanya ti penting dalam pengidup, sereta ngajar kitai chara ngulihka pengidup ti manah jemah ila. Ari ni kitai ulih ngiga iring tu?
a Enti nuan deka nemu mayuh agi pasal ajar Confucian, peda pelajar 7, genteran 31-35, bup “Pencarian Manusia akan Allah” dalam jaku Indonesia, ke dikeluarka Saksi-Saksi Jehovah, lalu udah bisi ba www.pr2711.com.
Nuan Engka Rindu Meda Tu
SAUT NGAGAI TANYA PASAL BUP KUDUS
Nama Reti Kereja Ngagai Orang Baka ke Dikedekaka Kita Kereja Sida Ngagai Kita?
Lebuh Jesus ngajar prinsip ba Matthew 7:12, iya ukai semina ngasuh nembiak iya ngereja tu ngagai orang ke sepengarap, tang iya mega ngasuh ngereja nya ngagai munsuh sida.
