Dunya kemayaharitu amat senang alai tetemuka pornografi. a Nuan ulih tepedaka nya ari iklan, dunya fesyen, wayang, musik, majalah, TV, game, laman web, sereta media sosial. Tu nunjukka, semua utai ke bekaul enggau pornografi udah nyadi biasa ba mayuh orang kemayaharitu.—Peda kutak “ Fakta pasal Pornografi.”

Nitihka Profesor Gail Dines, “gambar lucah ke kala dikumbai utai ti amat enda manah dulu suba, udah nyadi biasa ba orang kemayaharitu.”

Ba nuan, kati pornografi nya utai ti ngagaka ati, bahaya, tauka kedua-dua nya sekali? Jesus madah, “Semua pun kayu ti galak mansutka buah ti manah, tang pun kayu ti enda galak mansutka buah ti enda manah.” (Matthew 7:17) Aram kitai mansik, nama buah tauka kesan ke diasaika sesiku orang ke rindu meda pornografi?

RUNDING ARI BALA PAKAR: Orang ulih gian meda pornografi, lalu kesan nya ulih disebakaka enggau orang ke gian dadah.

Brian, b ke gian meda pornografi ba Internet madahka, “Nadai utai ke ulih nagang aku. Aku enda ulih nagang diri. Aku selalu gegetar sereta suah pedis pala. Aku nguji ngetu tang aku udah gian. Tu nyadi pengelama betaun-taun.”

Orang ke rindu meda pornografi selalu belalaika ulah tu. Sida engka berasai besalah, malu, irau, stress, sereta ringat. Bisi mega ke deka munuh diri. “Aku enda ulih nagang diri sereta semina deka ngemuaska pengingin diri empu aja,” ku Serge. Kesan iya, ninting hari iya download bahan lucah nengah talipun iya. Ku iya nambah baru, “Aku ngasaika diri nadai guna, besalah, sunyi, sereta nadai daya. Aku mega amat malu deka minta bantu.”

Baka ni enti kitai enda sengaja tepedaka bahan lucah? Dr. Judith Reisman, siku orang ke mansik pasal kesan pornografi madahka ngagai komiti Senat Amerika Serikat, “Gambar lucah ulih ngubah reaksi untak, lalu ngasilka tindak balas ti automatik. Nya kebuah gambar ke dipeda nya tusah tauka enda ulih dipadamka ari runding.” Susan ke beumur 19 taun madahka pasal laman web ke bisi bahan-bahan lucah, “Semua gambar nya lekat ba runding aku, lalu ulih ayan ba barang maya. Asai aku, aku enda ulih muai gambar nya dalam untak aku belama iya.”

RETI IYA: Orang ke gian meda pornografi deka nyadi ulun pornografi, lalu tu ulih ngasuh pengidup sida rusak.—2 Peter 2:19.

RUNDING ARI BALA PAKAR: “Mayuh rumah tangga rusak ketegal pornografi.”—The Porn Trap, dikeluarka Wendy enggau Larry Maltz.

Pornografi ulih ngachau tikah sereta diri sebilik ketegal

• Ngasuh kaling pengidup enda pechayaka pangan diri, berasai enda dikesayau, tauka ngachau hubungan seks ba entara laki-bini.—Jaku-Dalam 2:12-17.

• Ngasuh sesiku orang mentingka diri, enda ibuhka pangan diri, sereta enda puas ati ngagai kaling pengidup.—Epesus 5:28, 29.

• Ngasuh pengingin seks nya kuat agi enggau chara ti salah.—2 Peter 2:14.

• Mejal kaling pengidup ngereja ulah seks ti enda menuku.—Epesus 5:3, 4.

• Ngujungka butang sereta ngachau emosi pangan diri.—Matthew 5:28.

Bup Kudus ngelalau laki-bini “enda bulaka semaya” ngagai pangan diri, tang “tetap ati” ngagai pangan diri. (Malaki 2:16) Butang ulih ngachau rumah tangga, ti ngujungka sarak nyadi, lalu bala anak nyadi mansa ba pekara tu.

Kesan nya nyadi balat agi enti bala anak mega gian meda pornografi. Brian ke disebut tadi madahka, “Maya aku dalam urung 10 taun, aku tepedaka siti majalah lucah ke enggi apai aku maya aku benung main belalai. Aku pan belalai meda majalah tu. Aku enda nemu, nama kebuah aku rindu meda majalah tu. Tang tebiat nya terus dikembuan aku nyentukka aku besai.” Beberapa iti pansik nunjukka, bala anak ke meda pornografi senang agi ngereja ulah seks ba umur ti amat biak. Sida enda nemu nagang diri ba seks, ganas ba seks, sereta enda stabil ba emosi sereta mental.

RETI IYA: Pornografi ulih ngerusak kaul ti manah, sereta ngenataika mayuh pemedis enggau penusah ati.—Jaku-Dalam 6:27.

LALAU ARI BUP KUDUS: “Buai abis pengingin perengka tubuh kita, pengingin ngereja ulah seks ti kamah, pengingin ke utai ti kamah, pengingin seks ke enda ditagang, pengingin ti jai, enggau pengamu, ti sama enggau pengawa nyembah engkeramba.”—Kolosi 3:5.

Amat terang, Petara Jehovah c amat begedika pornografi. Iya ke amat, Jehovah ngaga mensia bisi pengingin seks ngambika pasangan laki-bini ulih ngelantangka pangan diri, nyemakka seduai iya ba emosi, sereta ngadaka peturun.—James 1:17.

Nama kebuah Jehovah begedika pornografi? Aram kitai meda kebuah iya.

• Iya nemu pornografi nya ulih ngerusak pengidup.—Epesus 4:17-19.

• Iya sayauka kitai, lalu Iya deka ngelindung kitai ari kesan ti enda manah.—Isaiah 48:17, 18.

• Iya deka nyaga tikah sereta diri sebilik.—Matthew 19:4-6.

• Iya deka kitai beresi ba moral sereta bebasaka hak orang bukai.—1 Tesalonika 4:3-6.

• Iya dekaka kitai beterima kasihka peluang ngadaka peturun, lalu ngena peluang nya enggau chara ti betul.—Hebrew 13:4.

• Pornografi ngambarka runding Sitan pasal seks, lalu meransang orang mentingka diri empu.—Pemungkal 6:2; Jude 6, 7.

RETI IYA: Pornografi ngerusak kaul kitai enggau Petara.—Rome 1:24.

Jehovah kasihka orang ke bebendar deka bibas ari nyadi ulun pornografi. Iya dekaka sida nerima pengasih lebuh sida begunaka bantu. (Hebrew 4:16; peda kutak “ Ngelepaska Diri ari Nyadi Ulun Pornografi”) Dalam Bup Kudus bisi madahka, ‘Jehovah endang kasih sereta rindu, lubah ringat, sereta penuh laban pengerindu ti meruan belama iya. Iya nemu utai ti udah dikena ngaga kitai. Iya ingatka kitai tu endang amau.’—Masmur 103:8, 14.

Mayuh orang nerima bantu ari Petara sereta mujur muai tebiat ti enda manah tu. Bup Kudus madahka, “Tang dalam nama Tuan Jesus Kristus sereta nengah kuasa kudus Petara, diatu kita udah dituchi, dikuduska, lalu dikumbai lurus.” (1 Korint 6:11) Nya alai, sida ulih madahka diri, “Aku ulih napi semua utai ketegal pengering ke diberi Petara ngagai aku.”—Pilipi 4:13.

Susan ke udah mujur muai tebiat tu madahka, “Semina Jehovah ulih nulung nuan muai ulah ti enda manah tu. Enti nuan minta iring ari Iya, nuan tentu mujur. Iya enda sekali-kali ngelebuka nuan.”