“Pengudah mati, roh orang ti bedosa deka diukum ba ‘api neraka.’” (Catechism of the Catholic Church) Sekeda bala tuai pengarap pechaya, neraka reti iya sida diseraraka ari Petara.

Mensia ke bedosa—deka mati. (Esekiel 18:4) Orang ke mati “nadai nemu utai.” (Pengajar 9:5) Nya alai enti mensia mati sereta enda nemu nama-nama, baka ni kitai ulih ngumbai iya deka diperinsa ba “api neraka” tauka diseraraka ari Petara?

Dalam Bup Kudus, leka jaku “neraka” ba dalam jaku Hebrew enggau Gerika mai reti pendam mensia. Mayuh orang ngumbai leka jaku “hades” reti iya neraka. Tang, leka jaku “hades” kebendar iya bekaul enggau pemati. Ambika chunto, Bup Kudus madahka jaku benabi pasal Jesus: “Nuan enda ninggalka aku dalam Hades.” (Surat Kereja Rasul 2:27, nota kaki.) Jesus tentu enda diperinsaka ba siti endur tauka dilalaika ari Petara, tang iya semina mati aja.

Enti sema Petara amat jai, kitai tentu ngenyauhka diri ari iya. Ku Rocío, ke diau ba Mexico madahka: “Kenyau ari ada, aku diajar pasal neraka. Aku amat takutka Petara. Aku ngasaika Iya nadai kualiti ti manah. Aku berunding, Iya mangah sereta enda siruka orang.”

Pemendar Bup Kudus pasal ukum Petara sereta pendiau orang ke udah mati ngubah runding Rocío pasal Petara. “Aku berasai bibas—aku ngasaika tangkun ke dibai aku udah diangkat ari bau aku. Aku berengkah pechaya, Petara dekaka utai ti pemadu manah ke kitai. Iya rinduka kitai, lalu aku pan ulih rinduka Iya. Iya baka seiku apai ti penyayau ke dekaka utai ti pemadu manah ke anak Iya.”—Isaiah 41:13.

Mayuh orang nyembah Petara laban sida takut diukum ba neraka. Tang, Petara enggai kitai nyembah Iya ketegal asai ati ke takut. Jesus madah: ‘Kita enda tau enda rinduka Jehovah Petara kita.’ (Mark 12:29, 30) Nambahka nya, enti kitai nemu Petara enda ngereja utai ti enda lurus, kitai ulih andal, ba jemah ila Iya deka ngakim enggau lurus. Baka utai ke dipadah kaban Jop ke benama Elihu: ‘Petara ti Pemadu Bekuasa enda ngereja penyai, lalu Iya enda kala meri atur ti enda lurus.’—Jop 34:12.