Beberapa taun ti udah, Venezuela bisi penanggul ekonomi enggau sosial baka ke nadai kala nyadi ba menua nya. Siku Saksi ke benama Edgar madah, “Dalam beberapa taun aja, ketegal rega duit kami balat nurun, gaya pengidup kami berubah nyentukka kami asai baka ke idup ba menua bukai, tang kami agi ba Venezuela!”

 Nama nulung Edgar napi penusah tu? Ku iya: “Aku enggau bini aku Carmen berundingka teladan sida ke nyadi pengerintis seberai tasik ke pindah ngagai menua ti seranta lalu belajar chara idup penumbas iya. Tu meransang kami idup enggau penumbas iya sereta nguji utai ti baru baka betanamka sayur.”

 Tang Edgar enggau Carmen ngereja mayuh agi ari nya. Seduai iya meransang bala menyadi nyengkaum sida ke napi kemurungan. (1 Tesalonika 5:11) Ku Edgar, “Kami ukai semina ngelantangka ati sida, tang kami mega nguji meransang sida ngasaika pengaga ati lebuh nulung orang ke begunaka bantu.”—Surat Kereja Rasul 20:35.

 Maya pandemik COVID-19 berengkah, Argenis mutus deka nginjil ngagai kaban belayan iya. Sekeda ari sida besetuju deka belajarka Bup Kudus nengah talipun.

 Argenis mega deka nulung kaban belayan iya meda konvensyen taun 2020, tang sida nadai internet. Siku Saksi ke semak endur sida diau meri sida program konvensyen ke udah dirikut. Udah nya, kaban belayan Argenis nginjau TV enggau sepika. Argenis talipun ngagai sida kena besampi sebedau sida meda program nya. Ketegal usaha ke digaga Argenis, 4 iku ari kaban belayan iya sereta 15 iku orang bukai ulih meda konvensyen nya.

 Ba siti eklisia, semina Jairo enggau Johana aja ke bisi kerita. Nyadi, laki-bini tu amat gerah jari nulung orang bukai. Ba Venezuela, tusah deka bulih minyak ke kerita nya. Ku Jairo: “Kami bebaris ngena mayuh jam kena meli minyak, indah kekadang sepemanjai malam.”

 Jairo ngasaika usaha sida enda lebu ngapa laban sida nulung orang bukai. Ku iya: “Lebuh kami nganjung barang ngagai bala menyadi, kami amat gaga ati meda sida beterima kasih ukai ngagai kami, tang ngagai Jehovah ke meri nembiak Iya utai ke diguna sida.”—2 Korint 9:11, 14.

 Taja pan udah beumur 28, siku menyadi ke benama Norianni ngasaika orang bukai ngumbai iya kelalu biak nulung orang bukai. Tang udah nya iya macha 1 Timoti 4:12: “Anang nejuka orang ngemaruhka nuan ketegal nuan agi biak, tang awakka nuan . . . nyadi teladan ke orang ti arap.”

 Ayat tu meransang Norianni begulai enggau menyadi ke tuai ba eklisia iya, nulung sida nginjil ngena surat, indah mai sida sama begulai enggau iya ngajar pemelajar Bup Kudus. Iya mega talipun enggau nganjung mesej ti meransang ngagai sida. Norianni madah: “Jehovah udah nunjuk ngagai aku, aku ulih ngereja mayuh utai.”

 Bala menyadi ba Venezuela napi mayuh penanggul ba maya ti tusah tu. Taja pia, sida mengkang ransing ba pengawa nginjil lalu sida “udah ngelantangka ati” pangan diri.—Kolosi 4:11; 2 Timoti 4:2.