Bryn, seiku Komiti Besilih Penemu Sepital ba Carolina Utara, Amerika Serikat. Iya bekerejasama enggau piak sepital nyaga utai ke diguna bala Saksi-Saksi Jehovah ke sakit.

 Ketegal penyakit COVID-19, mayuh sepital enda ngemendarka orang ngabas pesakit. Nyadi, ngambika iya ulih nyukung pesakit ke Saksi Jehovah, Bryn talipun ngagai pengarah ke ngatur begian pengarap ba sesiti sepital.

 Lebuh Bryn talipun, penulung pengarah nya ke nyaut talipun iya. Bryn minta tulung penulung nya, meri lumur talipun iya ngagai Saksi, ngambika iya ulih berandau enggau sida. Penulung nya pan ka nulung.

 Kelimpah ari nya, Bryn pan berundingka bala pekereja ke bukai ba sepital nya. Iya madahka, iya amat beterima kasihka pengawa sida, lalu ngarapka sida gerai magang. Iya mega bekunsika utai ti dibacha iya ke madah, mayuh orang kelebih agi bala pekereja ba sepital, napi stres ketegal penyakit berampit tu.

 Penulung nya mega setuju enggau utai ke disebut Bryn. Mayuh bala pekereja ba sepital berasai balat stres ketegal utai ke nyadi.

 Udah nya, Bryn madah, “Laman web kami bisi penerang ke ulih nulung orang mutarka stres. Enti nuan ngelawa jw.org lalu taip ‘stres’ ba begian Giga, nuan ulih tepedaka mayuh artikel ke ulih meri peransang ngagai bala pekereja sepital.”

 Lebuh seduai iya benung berandau, penulung nya lalu ngelawa jw.org sereta naip leka jaku ‘stres’ ba begian Giga. Udah nya iya meda mayuh lis artikel munyi ke disebut Bryn. Penulung nya lalu madah, “Wah! Aku ka nunjukka tu ngagai pengarah kami. Penerang tu ulih nulung bala pekereja sepital enggau orang bukai mega. Aku ka nyelak lalu meri tu ngagai sida.”

 Beberapa minggu udah nya, Bryn berandau enggau pengarah begian ke ngatur pengarap ba sepital. Pengarah nya madahka, sida udah ngelawa jw.org lalu nyelak artikel ke bekaul enggau stres. Sida mega meri nya ngagai bala misi sereta pekereja sepital ke bukai.

Ku Bryn, “Pengarah nya madahka aku, iya amat beterima kasih ngagai bala Saksi Jehovah, enggau semua artikel ti manah nya. Artikel nya nulung sida.”