É Má Ɛgɛ Nɛ Ujɔ A Mafu Ihɔtu Lɛ Uwa A
YOMARA mla ayinɛ nu nɔnyilɔ Marcelo mla u Hiver lā ipɔlɛ nɛ̄ŋcɛ́ éyi ipu Guatemala. Yomara gbɔɔ ō klɔcɛ ku Ubáyíbu mla Ācɛ Ocijali Ku Ujehofa, igbihaajɛ a, ayinɛ nu nɔnyilɔ a gbɔɔ ō klɔcɛ ku Ubáyíbu duu. Amáŋ ó lɛ unwalu éyi nōo yɔ. Ɛjɛɛji uwa wɛ opeyi, é klla jé ɔkpá ku aopeyi gla ŋ. Ohigbu ɛnyā, itica ku uwa nōo gē klɔcɛ ku Ubáyíbu mla uwa a gē jé aogwotu a tɛɛcɛ mla aɛga ku Ubáyíbu nōo yɔ ɛlā ō nwu néē yɔ i klɔcɛ a.
Ō gā ōjila ku ujɔ i klla wɛ ɔdā ō tɔɔtɛ lɛ uwa ŋ duu. É gā Agbla Ku Ajɔɔcɛ nōo kwu uwa ajaajɛ nōo wɛ uminiti ofu ɛpa a abɔyi uwa gla ŋ. Amáŋ ayinɛ nōo yɔ ipu ujɔ a gē ta uwa abɔ kéē gā ɛjɛɛji ōjila ku ujɔ a. Eko nɛ ayinɛ ɛta nyā kē lɛ ɛga lɛ ō yuklɔ ŋma ɛyi ede ipu ōjila ku ɔtahɛ ku alaadi a, ayinɛ nōo yɔ ipu ujɔ a klla gē ta uwa abɔ kéē bi aya ku uwa ɛyi lɔɔlɔhi.
Ipu Ɔya Ɔmɛhɔ ku 2019, é gbɔɔ ō ya ōjila ku ujɔ ipɔlɛ néē lā a. Ɛpleeko ɔɔma, ɔba mla ɔnyā éyi nōo wɛ ācɛ ō gbɔbu ɔna ō ta a le calɛ gā ipɔlɛ ɔɔma ɛ. É jé ō jé ɔkpá klla ta ɔkpá ku aopeyi gla ŋ, amáŋ é dɔka ō nwu ayinɛ ɛta nōo wɛ aopeyi a ɛgɛ néē gē jé ō ya ɔɔma a. Ohigbu ɛnyā, é le yɛ gā ɛga ō gwo ɔkpá tu gáā lɛ ɔkpá ku aopeyi miyɛ, o ya ɛɛ kéē nwu ɛgɛ néē lɔfu nwu ācɛ ɔhá ō jé ō bi ɔ le yuklɔ a.
Marcelo yɔ i toohi ipu ōjila ku ujɔ
Ó gboji ŋ, ayinɛ ɛta nōo wɛ opeyi nyā gbɔɔ ō jé ɔkpá ku aopeyi lɔɔlɔhi, ɛnyā kē jɛga lɛ uwa kéē lɛ ɛma olɔfu mla Ujehofa. a Babanya Yomara, Marcelo, mla u Hiver wɛ ācɛ o gbɔbu ɔna ō ta eko doodu. Marcelo wɛ ɔcɛ o ta anyakwɔcɛ ku ujɔ abɔ. Ipu alaadi doodu, é gē lɛ abɔ bi odee gē ya lɛ Ujehofa. É lɛ ɔtu caca ō gba Ujehofa ɛ̄gbā, ɛnyā kē ya ku ācɛ ɔhá nōo yɛ jila uwa ta a kéē lɛ ɔtu caca ɔɔma duu.
Ó je ayinɛ ɛta nōo wɛ aopeyi nyā eyī nɛɛnɛhi ku ɔwɛ ihɔtu nɛ ujɔ a bi le je otabɔ lɛ uwa a. Yomara kahinii: “Oŋma eko aflɛyi nɛ alɔ má Ācɛ Ocijali Ku Ujehofa a, é humayi mafu ihɔtu ɔkwɛyi ku Ācɛ O Yɛce Ukraist lɛ alɔ.” Marcelo klla kahinii: “Alɔ lɛ ɛnɛɛnɛ aɔkpa ipu ujɔ nɛ alɔ yɔ a, alɔ klla lɛ apɔlɛ ipu oduudu ɛcɛ nōo piyatɔha ipu ihɔtu.” Yomara mla ayinɛ nu nɔnyilɔ a yɔ i leyice eko néē géē má ɛcɛ nyā je piya Uparadais a.—Aíjē 37:10, 11; Ayis. 35:5.
a É ya ubrociɔ nōo kahinii: Learn to Read Braille a, o ya ɛɛ kóō ta ɔcɛ nōo wɛ opeyi amāŋ nōó gē mɛɛbɛ lɔɔlɔhi ŋ ma abɔ, ka ó jé ō jé ɔkpá klla ta ɔkpá ku aopeyi.
