Di na nwunye malite ibi, ọtụtụ ihe nwere ike ịna-akpatara ha esemokwu. Ụfọdụ n’ime ihe ndị nwere ike ịna-akpata esemokwu ndị ahụ bụ na otú ha si eche echiche abụghị otu, otú ha si ele ihe anya abụghịkwa otu. Ihe onye ọzọ mere ma ọ bụ ihe ha na-atụghị anya ya nwekwara ike ịkpatara ha esemokwu.

Mgbe ụfọdụ, di na nwunye nwere ike iche na e nweghị ihe esemokwu ndị ahụ bụ, ma Baịbụl gbara anyị ume ka anyị na-edozi esemokwu. (Matiu 5:23, 24) Ime ihe Baịbụl kwuru ga-enyere di na nwunye aka idozi esemokwu ọ bụla ha nwere.

IHE BAỊBỤL KWURU: “E nwere oge . . . ikwu okwu.” (Ekliziastis 3:1, 7) Unu kwesịrị ịna-ewepụta oge nọdụ ala kwuo banyere ihe na-esere unu. Kwuo otú ihe ahụ dị gị n’obi. Ezola ihe ọ bụla ezo. Na-agwa di gị ma ọ bụ nwunye gị eziokwu mgbe niile. (Ndị Efesọs 4:25) Ọ bụrụgodị na ihe merenụ na-ewute gị, gbalịa jide onwe gị. Okwu ọma ị gwara di gị ma ọ bụ nwunye gị mgbe unu na-ekwurịta ihe seere unu ga-eme ka unu dozie esemokwu ahụ kama isere okwu na-aga.—Ilu 15:4; 26:20.

Ọ bụrụgodị na ihe di gị ma ọ bụ nwunye gị na-ekwu adịghị gị mma, agwala ya okwu ọjọọ. Na-agwa ya okwu otú ga-egosi na ị hụrụ ya n’anya ma na-akwanyere ya ùgwù. (Ndị Kọlọsi 4:6) Gbalịanụ kpezie ihe ọ bụla na-esere unu ozugbo. Unu agbachikwala ibe unu nkịtị.—Ndị Efesọs 4:26.

IHE I NWERE IKE IME:

• Wepụtanụ oge dị mma unu ga-eji kwurịta ihe na-esere unu

• Di gị ma ọ bụ nwunye gị kwuwe ihe na-ese, gewe ya ntị, anapụla ya okwu n’ọnụ. Ya kwuchaa, gị ekwuo nke gị

IHE BAỊBỤL KWURU: “Na-enwenụ obi ọmịiko n’ebe ibe unu nọ. N’inye ibe unu nsọpụrụ, na-ebutenụ ụzọ.” (Ndị Rom 12:10) Na-ege di gị ma ọ bụ nwunye gị ntị nke ọma ka i wee ghọta ihe ọ na-ekwu. Ime otú ahụ ga-egosi na ihe ọ na-ekwu na-emetụ gị n’obi nakwa na ị dị umeala n’obi. (1 Pita 3:8; Jems 1:19) Emela ka à ga-asị na ị na-ege ntị ma ọ bụrụ na ị naghị ege ntị. Ọ bụrụ na o kwe mee, kwụsị ihe ị na-eme, gewe ya ntị ma ọ bụkwanụ gị agwa ya ka unu kwuo banyere ya mgbe i mechara. Ọ bụrụ na ị ghọtara na gị na di gị ma ọ bụ nwunye gị na-agba mbọ ka unu ghara ịna-esekarị okwu, ihe ọ bụla o mere agaghị na-ewe gị iwe ọsọ ọsọ.—Ekliziastis 7:9.

IHE I NWERE IKE IME:

• Ọ bụrụgodị na ihe di gị ma ọ bụ nwunye gị na-ekwu na-ewe gị iwe, gee ya ntị

• Gbaa mbọ ghọta ihe ọ na-ekwu. Olu o ji agwa gị okwu na otú ihu ya dị ga-eme ka ị mara otú obi dị ya

IHE BAỊBỤL KWURU: “Uru dị n’ụdị ndọgbu n’ọrụ niile, ma okwu egbugbere ọnụ efu na-eme ka a nọrọ n’ụkọ.” (Ilu 14:23) Ọ bụghị unu kpebie otú unu ga-esi dozie ihe na-esere unu, gị afanyezie aka n’ụkwụ. I kwesịrị ịna-eme ihe unu kparịtara. O nwere ike ọ gaghị adịchara gị mfe, ma mbọ ọ bụla ị gbara agaghị ala n’iyi. (Ilu 10:4) Ọ bụrụ na unu jikọọ aka dozie ihe na-esere unu, unu ga-enwe “ezi ụgwọ ọrụ.”—Ekliziastis 4:9.

IHE I NWERE IKE IME:

• Kpebienụ ihe onye ọ bụla n’ime unu ga-eme ka unu ghara ịna-esekarị okwu

• Unu nọtụ, unu amara ma ùnu na-emekwa ihe unu kpara