Gịnị Mere Anyị Ji Ekpe Ekpere n’Aha Jizọs?

JIZỌS kụziiri ndị mmadụ banyere ekpere ọtụtụ mgbe. N’oge ọ nọ n’ụwa, ndị ndú okpukpe ndị Juu na-anọ n’ebe “ụzọ nwere ngalaba na-ekpe ekpere.” N’ihi gịnị? “Ka ndị mmadụ wee na-ahụ ha.” O doro anya na ha chọrọ ka ndị mmadụ hụ ezi omume ha. Ọtụtụ n’ime ha na-ekpe ogologo ekpere, na-ekwughachi otu ihe ugboro ugboro, dị ka à ga-asị na “ọtụtụ okwu ha na-ekwu” ga-eme ka a nụ ekpere ha. (Matiu 6:5-8) Jizọs kwuru hoo haa na ime otú ahụ abaghị uru. O si otú ahụ mee ka ndị nwere ezi obi mara ihe ha na-agaghị eme mgbe ha na-ekpe ekpere. Ma, ọ bụghị naanị ihe a na-agaghị eme mgbe a na-ekpe ekpere ka Jizọs kụziri.

Jizọs kụziri na ekpere anyị kwesịrị igosi na anyị chọrọ ka e doo aha Chineke nsọ, ka Alaeze Ya bịa, nakwa ka uche Ya mee. Jizọs kụzikwara na o kwesịrị ka anyị na-arịọ Chineke ka o gbooro anyị mkpa anyị. (Matiu 6:9-13; Luk 11:2-4) Jizọs ji ihe atụ dị iche iche gosi na ọ bụrụ na Chineke ga-anụ ekpere anyị, anyị kwesịrị ịnọgidesi ike na-arịọ ya arịrịọ. Anyị kwesịrị inwe okwukwe, kwesịkwa ịdị umeala n’obi. (Luk 11:5-13; 18:1-14) O jikwa ihe nlereanya ya gosi na ihe ọ kụziri dị mkpa.—Matiu 14:23; Mak 1:35.

O doro anya na ihe ndị a Jizọs kụziri nyeere ndị na-eso ụzọ ya aka ka otú ha si ekpe ekpere kakwuo  mma. Ma, Jizọs cheere ruo n’abalị ikpeazụ ya n’ụwa tupu ya akụziere ndị na-eso ụzọ ya ihe dị oké mkpa banyere ekpere.

“Mgbe A Gbanwere Otú E Si Na-ekpe Ekpere Kemgbe Ụwa”

N’abalị ikpeazụ Jizọs nọrọ n’ụwa, o wepụtara oge dị ukwuu gbaa ndịozi ya kwesịrị ntụkwasị obi ume. Ọ bụ oge kwesịrị ekwesị iji kọọrọ ha ihe ọhụrụ. Jizọs sịrị: “Ọ bụ m bụ ụzọ na eziokwu na ndụ. Ọ dịghị onye na-abịakwute Nna m ma ọ́ bụghị site na mụ.” Mgbe e mechara, o kwere ha nkwa nke na-emesi obi ike, sị: “Ihe ọ bụla unu rịọkwara n’aha m, m ga-eme ya, ka e wee nye Nna m otuto site n’aka Ọkpara ya. Ọ bụrụ na unu arịọ ihe ọ bụla n’aha m, m ga-eme ya.” Mgbe o kwuchawara ihe ọ na-ekwu, ọ sịrị: “Ruo ugbu a, unu arịọbeghị otu mkpụrụ ihe n’aha m. Rịọnụ, unu ga-anatakwa, ka e wee mee ka ọṅụ unu zuo ezu.”—Jọn 14:6, 13, 14; 16:24.

Okwu ndị a dị oké mkpa. Otu akwụkwọ e ji eme nnyocha kọwara ya dị ka “mgbe a gbanwere otú e si na-ekpe ekpere kemgbe ụwa.” Ihe Jizọs bu n’obi abụghị ka a malite ikpeku ya ekpere kama ikpeku Chineke. Kama nke ahụ, ọ na-eme ka a mata ụzọ ọhụrụ a ga-esi na-agakwuru Jehova bụ́ Chineke.

N’ezie, ọ dịghị mgbe Chineke na-anaghị anụ ekpere ndị ohu ya kwesịrị ntụkwasị obi. (1 Samuel 1:9-19; Abụ Ọma 65:2) Ma, malite n’oge ụmụ Izrel na Chineke gbara ndụ, ndị chọrọ ka Chineke nụ ekpere ha aghaghị ikweta na ndị Izrel bụ mba Chineke họọrọ. Mgbe e mechara, malite n’oge Sọlọmọn, ha aghaghị ikweta na ụlọ nsọ ahụ bụ ebe Chineke họọrọ ka a na-achụrụ ya àjà. (Diuterọnọmi 9:29; 2 Ihe E Mere 6:32, 33) Ma, ofufe ahụ adịteghị aka. Dị ka Pọl onyeozi dere, Iwu ahụ e nyere ndị Izrel na àjà ha chụrụ n’ụlọ nsọ ahụ bụ “onyinyo nke ihe ọma ndị gaje ịbịa, ma ọ bụghị ihe ndị ahụ kpọmkwem.” (Ndị Hibru 10:1, 2) Ihe bụ́ ezie nke gaje ịbịa ga-anọchi onyinyo ahụ. (Ndị Kọlọsi 2:17) Kemgbe afọ 33 O.A., mmadụ idebe Iwu Mozis anaghị eme ka ya na Jehova dị ná mma. Kama nke ahụ, ihe na-eme ka mmadụ na Jehova dị ná mma bụ irubere onye Iwu ahụ kwuru banyere ya isi, ya bụ, Kraịst Jizọs.—Jọn 15:14-16; Ndị Galeshia 3:24, 25.

Aha “Dị Elu Karịa Aha Ọ Bụla Ọzọ”

Jizọs kwuru ụzọ ọhụrụ ka mma a ga-esi na-abịakwute Jehova. O kwuru na ya bụ ezigbo enyi dị anyị oké mkpa, onye na-emeghere anyị ụzọ ka Chineke wee na-anụ ekpere anyị ma na-aza ya. Gịnị mere Jizọs ji emere anyị ihe a?

 Ebe ọ bụ na a mụrụ anyị ná mmehie, ọ dịghị ọrụ anyị ga-arụ ma ọ bụ àjà anyị ga-achụ ga-asachapụ mmehie anyị ma ọ bụ mee ka anyị na Chineke anyị nke dị nsọ, bụ́ Jehova, dị ná mma. (Ndị Rom 3:20, 24; Ndị Hibru 1:3, 4) Ma, Jizọs ji ndụ ya zuru okè mgbe ọ bụ mmadụ chụọ àjà wee kwụọ ụgwọ mmehie nke ụmụ mmadụ ndị ha na Chineke nwere ike ịdịghachi ná mma. (Ndị Rom 5:12, 18, 19) Jehova na ndị niile chọrọ ka a sachapụ mmehie ha nwere ike ịdịghachi ná mma, ha nwekwara ike iji “nkwuwa okwu” na-agwa Chineke okwu, naanị ma ọ bụrụ na ha nwere okwukwe n’àjà Jizọs chụrụ ma na-ekpe ekpere n’aha ya.—Ndị Efesọs 3:11, 12.

Ọ bụrụ na anyị ekpee ekpere n’aha Jizọs, anyị na-egosi na anyị nwere okwukwe, ma ọ dịghị ihe ọzọ, n’ụzọ ọrụ atọ Jizọs na-arụ iji mezuo nzube Chineke: (1) Ọ bụ “Nwa Atụrụ Chineke,” onye chụrụ àjà nke mere ka a na-agbaghara anyị mmehie. (2) Jehova kpọlitere ya n’ọnwụ, ugbu a kwa, ọ bụ “onyeisi nchụàjà” nke na-eme ka àjà ahụ ọ chụrụ baara anyị uru. (3) Ọ bụ naanị ya bụ “ụzọ” e si agakwuru Jehova n’ekpere.—Jọn 1:29; 14:6; Ndị Hibru 4:14, 15.

Ikpe ekpere n’aha Jizọs na-ewetara Jizọs nsọpụrụ. Nsọpụrụ a kwesịrị ekwesị, n’ihi na ọ bụ uche Jehova ka ‘ikpere ọ bụla gbuo n’ala n’aha Jizọs, ka ire ọ bụla kwupụtakwa na Jizọs Kraịst bụ Onyenwe anyị iji wetara Chineke bụ́ Nna otuto.’ (Ndị Filipaị 2:10, 11) Ma, ihe ka mkpa bụ na ikpe ekpere n’aha Jizọs na-ewetara Jehova otuto, bụ́ onye nyere Ọkpara ya maka ọdịmma anyị.—Jọn 3:16.

Baịbụl ji ọtụtụ utu aha na aha dị iche iche kọwaa Jizọs iji mee ka anyị ghọta ụdị ọkwá o nwere. Ha na-enyere anyị aka ịghọta ọtụtụ uru na-abịara anyị n’ihi ihe ndị Jizọs mewooro anyị, ihe ndị ọ na-emere anyị, na ihe ndị ọ ka ga-emere anyị. (Lee igbe nke isiokwu ya bụ, “Ọrụ Ndị Dị Mkpa Jizọs Na-arụ,” nke dị na peeji nke iri na anọ.) N’ezie, e nyewo Jizọs “aha dị elu karịa aha ọ bụla ọzọ.” * E nyewo ya ikike niile n’eluigwe na n’elu ụwa.—Ndị Filipaị 2:9; Matiu 28:18.

 Ọ Bụghị Iji Mezuo Iwu

N’eziokwu, anyị aghaghị ikpe ekpere n’aha Jizọs ma ọ bụrụ na anyị chọrọ ka Jehova nụ ya. (Jọn 14:13, 14) Ma, anyị ekwesịghị ịdị na-ekwu “n’aha Jizọs” naanị iji mezuo iwu. N’ihi gịnị?

Tụlee ihe atụ a. Ọ bụrụ na onye na-achụ nta ego edetara gị akwụkwọ ozi, o nwere ike ịsị ná ngwụcha akwụkwọ ozi ahụ na ya bụ “ezigbo onye ahịa gị.” Ì chere na ihe ahụ o dere si ya n’obi, ka ò dere ya naanị maka na ọ bụ otú e si akwanyere ndị mmadụ ùgwù ma e dewe ụdị akwụkwọ ozi ahụ? N’ezie, mgbe anyị na-akpọ aha Jizọs n’ekpere anyị, o kwesịghị ịdị ka ihe ahụ na-adịghị esi ndị mmadụ n’obi nke a na-ede ná ngwụcha akwụkwọ ozi. Ọ bụ eziokwu na anyị kwesịrị ikpe “ekpere n’akwụsịghị akwụsị,” anyị kwesịrị iji ‘obi anyị dum’ na-ekpe ya, ọ bụghị iji mezuo iwu.—1 Ndị Tesalọnaịka 5:17; Abụ Ọma 119:145.

Olee otú ị ga-esi ghara ịdị na-ekwu “n’aha Jizọs” naanị iji mezuo iwu? Ọ́ gaghị adị mma ka i chee echiche banyere àgwà na-enye obi ụtọ ndị Jizọs nwere? Chee echiche banyere ihe ndị o mewooro gị na ndị ọ ka dị njikere imere gị. Mgbe ị na-ekpe ekpere, kelee Jehova ma nye ya otuto maka ihe ndị magburu onwe ha o ji Ọkpara ya mee. Ọ bụrụ na ị na-eme nke a, obi ga-esikwu gị ike na nkwa Jizọs kwere ga-emezu. Ọ sịrị: “Ọ bụrụ na unu arịọ Nna m ihe ọ bụla, ọ ga-enye ya unu n’aha m.”—Jọn 16:23.

[Ihe e dere n’ala ala peeji]

[Ihe odide gbatụrụ okpotokpo dị na peeji nke 13]

Anyị kwesịrị iji ‘obi anyị dum’ na-ekpe ekpere, ọ bụghị iji mezuo iwu

[Igbe/Foto dị na peeji nke 14]

ỌRỤ NDỊ DỊ MKPA JIZỌS NA-ARỤ

Iji ghọtachaa ọrụ Jizọs na-arụ, chebara utu aha ya ụfọdụ echiche, nakwa otú e si kọwaa onye ọ bụ, na aha ndị a na-akpọ ya.

Adam Ikpeazụ.—1 Ndị Kọrịnt 15:45.

Amen.—2 Ndị Kọrịnt 1:19, 20; Mkpughe 3:14.

Chineke nke Bụ́ Dike.—Aịzaya 9:6.

Eze.—Mkpughe 11:15.

Isi nke Ọgbakọ Ahụ.—Ndị Efesọs 5:23.

Ịmanuel.—Matiu 1:23.

Kraịst/Mesaya.—Matiu 16:16; Jọn 1:41.

Maịkel Onyeisi Ndị Mmụọ Ozi.—1 Ndị Tesalọnaịka 4:16; Jud 9.

Nna Mgbe Ebighị Ebi.—Aịzaya 9:6.

Nwa Atụrụ Chineke.—Jọn 1:29.

Nwa nke Mmadụ.—Matiu 8:20.

Okwu Ahụ.—Jọn 1:1.

Onye Àmà Kwesịrị Ntụkwasị Obi.—Mkpughe 1:5.

Onyeikpe.—Ọrụ 10:42.

Onyeisi Nchụàjà.—Ndị Hibru 4:14, 15.

Onyeisi Udo.—Aịzaya 9:6.

Onye Ndú.—Matiu 23:10.

Onye Ndụmọdụ Dị Ebube. —Aịzaya 9:6.

Onye Nnọchiteanya Ukwu nke Ndụ.—Ọrụ 3:15.

Onye Nzọpụta.—Luk 2:11.

Onyenwe Anyị.—Jọn 13:13.

Onye Ogbugbo.—1 Timoti 2:5.

Onyeozi.—Ndị Hibru 3:1.

Onye Ozizi.—Jọn 13:13.

Onye Ọzụzụ Atụrụ Ọma.—Jọn 10:11.

Ọkpara Chineke.—Jọn 1:34.