ANG ỌJẸ́JẸ 03

À ka Jẹ́-ẹ Dahịhile ỊBayịbụụ?

ỊBayịbụụ chịhị ehe lụmẹ-lụmẹ bala o-juhi irya u-uhye nya ang lụmẹ-lụmẹ. Ọhẹka ọ chịng kpakpaakpa nyọka jẹ́ ang ọlẹ kọ mẹjẹ, ma ọhẹka à tịtọ nyọka dụmwọ-dụmwọ ịnyịnyị. Ọ chịla nyọka dahịhile ehe ọchịchị bala ang ọmẹjẹ ọlẹpwụ nya ụpwụ onyogo ọlịịwẹ? Ẹla ọlẹ ká ịBayịbụụ ya ju apyobwuna hang alẹ ịnyịlẹhị? Ịnyịnyị, à ka jẹ́-ẹ dahịhile ẹla ọlẹ kọ ya u-uhye nya ijuju? Uku-uku nya angịnyị myị ọnụ. Ahị yẹ kori káahụ-ụ́ ka myị jwoo ịnyịnyị wẹẹ.

1. Oja ịlẹ kahị yẹ ẹ-ẹpwụ nya ịBayịbụụ ri ẹla nyịlẹhị?

ỊBayịbụụ ya nyori ẹla ịlẹpwụ nyamwụ wuu nyị ri “ẹla . . . i-ju ọdahịhile.” (Ọngọlirya 12:10) O joja nyịlẹhị u-uhye nya ẹla ịlẹ kị họ ta angịnyị ịlam. (Wa iLuku 1:3; 3:1, 2.) Iru nya alego bala angị jẹ́ ang nya alene myị ọnụ nyori ẹla ọlẹ ká ịBayịbụụ ya u-uhye nya ụka, angịnyị, ẹga bala ẹla ịkpọnchị ịlẹ kị họ nyị ri ẹlịlẹhị.

2. Ịyẹ tị́ du kahị ka jẹ́-ẹ ya nyori ịBayịbụụ-ụ́ hogo ka?

Ụka lụmẹ-lụmẹ ịBayịbụụ kaa ya ẹla u-uhye nya ang ịlẹ ká angịnyị ịlụka nyamwụ jẹ́ ka. Ọ-chụ pwokwita, o ya ẹla u-uhye nya ang ọjẹ́jẹ nya angị chị ang ehe. Angịnyị-ị́ myị ju ẹla ọlẹ ko ya u-uhye nya ala ịwẹ ụka ọlẹ kị dọọ ka. Ma, ọlẹẹlẹẹ, angị chị ang ehe myị ọnụ ju ẹla ọlẹ ká ịBayịbụụ ya lẹ. Ọ ka “godayị rịrị [lee o-ju ọdahịhile] gbe oyi myị oyi.”—Eje Ọnyịịla 111:8.

3. Ịyẹ tị́ du kahị ka dahịhile ẹla ọlẹ ká ịBayịbụụ ya u-uhye nya ijuju?

Ọmwụ ọyẹyẹ * u-uhye nya “ang ịlẹ kị họhọ lẹka” juwa ẹ-ẹpwụ nya ịBayịbụụ. (Ayịsaya 46:10) Ọ yọmwụ neeji tataata u-uhye nya ang lụmẹ-lụmẹ ene kịị họ. Ọ chabwọ nya ẹla ọlẹ kọ jam họ odehe alẹ rige-rige ịnyịnyị. A-ang ọjẹ́jẹ ọlẹ, ahị ka kụ ẹhị yẹ ọmwụ ọyẹyẹ ịlẹpwụ nya ịBayịbụụ. Ọkpẹẹkpẹẹ nyaa la ẹbyẹbyị lụmẹ!

JẸ́ GỤ ỌỌWA

Kụ ẹhị yẹ jaabwọ ká angị chị ang ehe ịlụka nyahị myị ọnụ ju ẹla ọla ịBayịbụụ, bala ọ-jẹ́ ang u-uhye nya ọmwụ ọyẹyẹ ịmanyị-ịmanyị ịlẹpwụ nya ịBayịbụụ ịlẹ kị kpịpyọ yẹẹyẹẹ.

4. Ang ọjẹ́jẹ nya angị chị ang ehe myị ọnụ ju ịBayịbụụ

Ụka onyogo, angịnyị lụmẹ-lụmẹ ya nyori odehe nyị godayị u-uhye nya ịngịhyẹ. Yẹ IFIM ọwẹ.

IFIM: Odehe-é Nọ u-Uhye nya Ịngịngịhyẹ ka (1:13)

Yẹ ẹla ọlẹ kị da ju ụ-ụpwụ nya iJobu la ẹka 3,500 kẹkpẹ. Wa iJobu 26:7, kanụ ya ẹla u-uhye nya ịtọ ẹla ọlẹ:

Ịyẹ tị́ du kọ la ẹbyẹbyị nyọlẹ ká ịBayịbụụ ya nyori odehe nyị juwa “ẹ-ẹga ọlẹ ká ịngịngịhyẹ ji ka lichi-lichi”?

Lala ẹka 200 kẹkpẹ angịnyị ehe à jẹ́ ang yẹẹyẹẹ u-uhye nya abwọlẹ ká enyi kaa bwu do wẹẹ lẹ. Ma, yẹ ẹla ọlẹ ká ịBayịbụụ ya ẹka ụnọ ịmanyị tị́ kẹkpẹ lẹẹ. Wa iJobu 36:27, 28, kanụ ya ẹla u-uhye nya ịtọ ẹla ịlẹ:

Ịyẹ à tị́ kpụng ịpyọ u-uhye nya ụgbẹyị ohukee ọlẹ ká ẹgẹwẹ chabwọ nya abwọlẹ ká enyi kaa bwu do?
Ụpwụ ịgọgọ ịlẹ ká wa wẹ ju ahị ọdahile nyang ọngịrị u-uhye nya ịBayịbụụ?

5. ỊBayịbụụ yọmwụ u-uhye nya ẹla ịkpọnchị ịlẹ kị ka họ

Wa Ayịsaya 44:27–45:2, kanụ ya ẹla u-uhye nya ịtọ ẹla ọlẹ:

Ọmwụ oyina ịBayịbụụ à tị́ yẹ ẹka 200 ene nya ayịreji nya ịBabịlọn?

Yẹ IFIM ọwẹ.

IFIM: ỊBayịbụụ Yọmwụ u-Uhye nya Ayịreji nya ịBabịlọn (0:58)

Ego mẹjẹ nyori ịSayịrọsị adịrahụ nya iPechiya bala alẹwụ nyamwụ nyị kụrụ epweji nya ịBabịlọn lẹka 539 ene nya ọmama nya ịKịrayịsị. Ị gu enyi ọlẹ kọ kaa chewu ke epweji ọọwa ọba rụ ka ẹga ọkịla. Ị́ tị tụ́ ogirigba nya epweji ọọwa ku ka, lẹ ị jẹ́ ju ka ẹpwụ nyamwụ kaka tọọ ayịreji la ọ-dọmwụ dẹwụ ka. Ẹlẹwẹ la ẹka 2,500 alẹ anyị lẹ, ịBabịlọn tị tayịreji juwa daalẹ wẹẹ. Kụ ẹhị yẹ ọmwụ ọlẹ ká ịBayịbụụ yẹ neeji wẹẹ.

Wa Ayịsaya 13:19, 20, kanụ ya ẹla u-uhye nya ịtọ ẹla ọlẹ: